Henriup nunarsuaq tamaat suliffigaa

Henrik Inuk Poulsen savaateqarfimmi Nuugaarsummi peroriartortoq Italiami akunnittarfiit ataqqineqarnerpaat ilaata neriniartarfiani Michelimillu ullorialerneqarsimasumi igasuuvoq.

Nunat nunatta avataaniittut qulit maannamut suliffigereerlugit Amalfip sineriaa kusanassutsimigut tusaamasaasoq nuannarilluinnalersimavaa. Igasoq misigisassarsiorumaartoq sineriammi citroneqarfissuarmi naapipparput.

Amalfip sineriaa sinerlugu ikaartaammik illoqarfimmut Amalfimut ingerlaarpugut. Naak kjole aasarsiut kisiat atisarigaluarlugu angallatip qaavani qiiaammerfissaanngilaq. Qiiaammerfissatuaasinnaasut tassaapput takusat. Sineriammi qaqqartuumi illut tamani tamaaniipput imarlu tungutsoreqaluni.

Illoqarfik tusaamasaq Amalfi tikiinnaqaarput. Tamaani utaqqivoq Nuugaarsummiu Henrik Inuk Poulsen.

- Ullumikkut kiappallaanngilaq, Henrik naapikkatsinni illarlunilu taama oqarpoq.

29-nik kiannera inuttaanut kiammut sungiussillualersimasumut “kiappallaanngilaq”. Nalinginnaasumimmi aggustip aallartinnerani 35-t missaannik kiattaraluarpoq. Henrik ullumikkut freerpoq, sapaatip-akunneranummi ullup aappaa avillugu freertarami. Ullullu taakkua atorluartarpai.

- Turistiusaartarpunga illoqarfinnut allanukarlunga. Ineeqqanik attartorlunga unnuillunga, Henrik oqarpoq.

Unnummi ataatsimi unnuineq 16.122 kr.

Henrilliuna tamaani sulerisoq? Italiami hotelini inuulluataarfiusinnaasuni pitsaanerpaat ilaat Il San Pietro di Positano suliffigaa. Taanna hotelit Michelininik ullorialersorneqartarnerannut assersuunneqarsinnaasumit pingasunik Michelin Keysinnaqqeqqammivoq. Italialu tamaat qiviaraanni hotelit arfineq-pingasuinnaat taama ittumik tunineqarsimapput.

- Tanngassimaarnartarpoq taamatut suliffeqarluni, Henrik taama oqaluttuarpoq.

Tanngassimaarnissaminullu pissutissaqarluarpoq. Hoteli suliffia Amalfip sineriaani illoqarfiit akisunersaanni Positanomiippoq. Nittartakkatigullu misissuipallakkaanni septembarimi unnuineq ataaseq 16.122 koruuneqarpoq.

- Piumasaqaateqaqaaq, taamaakkami aamma hotelit pitsaanerpaat ilaattut inissisimavoq, Henrik suliffini pillugu taama oqaluttuarpoq.

Piumasaqaatillu misigisareersimagamigit nalunngilluarpai. Henrik igasunngorniarnermi nalaani 2014-imi praktikkernermini hotelimi tassani siullermeerluni sulivoq. Taamanilu unngiaqqusaasarneq sulinermi maleruaqqusanut ilaasoq eqqaamalluarpaa.

- Ilinniartuugallarama ullut tamaasa unngiaqqusaasarnikuuvugut kusanassagatta. Kisianni massakkut allanngulaarnikuuvoq, unngiaqqusaasarunnaarnikuuvugut, Henrik illalaarluni taama oqarpoq.

Innga kinaana? Michael B. Jordan

Amalfip sineriaa ukiumut 5 miliuuninik takornariaqartarpoq. Takornarianut ilaasarput nunarsuaq tamakkerlugu tusaamasat. Henriup akunnittarfik suliffigisaa pitsaanerpaanut ilaanera peqqutigalugu tusaamasarpassuit najugaqarfigisarpaat. Kingullertigut akunnissimasut ilaatigut tassaapput: Katy Perry, Orlando Bloom, Dua Lipa aamma Jennifer Lopez.

Tusaamasalli akunnittarfimmiittut Henriup tamatigut takusanngilai.

- Suliffitsinni suleqatigut suliaminnut pikkorilluinnartuugamik inuttut illersornissaat ataqqillugit ilaanni nipaarsaaruppasittarpaat, Henrik oqaluttuarpoq.

Ilaatigulli naammattuueriasaarsinnaasarpoq. Siorna sulitillutik aneersuartarfimmiinnerminni isiginnaartitsisartoq tusaamasaq Michael B. Jordan naammattooriasaarpaa.

- Angut ilisaralugu suleqatiga aperaara kinaanersoq. Akivoq Michael B. Jordanigooq, Henrik illalaarluni oqaluttuarpoq.

Michelinimit ullorialerneqarsimasumi igasuuneq

Henriup takornariaqarfik aallartikkaangat marsip naaneraniit oktobarip naaneranut Amalfip sineriaa najortarpaa. Tassani neriniartarfiit marluupput - maannakkullu aappaani - italiumiusut kusanasaakkanik neriniartarfimmi Michelinimillu ullorialerneqarsimasumi igasuuvoq.

- Nuannertaqaaq. Sakkortusarpoq. Qasunartarpoq. Nuannaarnartarpoq, Henrik oqaluttuarpoq.

Taanna Positanomi sulinngikkaangami Praianomi angerlarsimaffeqartarpoq. Suleqatigiillu ineqatigiiaakkamik ataatsimik najugaqateqarpoq.

- Kollegiartutut ilaanni misiginarsinnaasarpoq, Henrik oqarpoq.

Naak ineqateqarneq ilaanni pikkunarsisaraluartoq uteqqiaffigiuarpaa.

-Suliffik suleqatillu ataqatigiinnerput. Taavalu nuna nerisassallu, Henrik oqarpoq.

Assigiissuteqarpugut

Takornariarnerput nangillugu Amalfimiit illoqarfimmut qatsinnerusumiittumut Ravellomut ingerlaqqippugut. Ravello immamiit 365 miiterinik qatsinnerusumi inissisimavoq, tamaangalu pigaanni isikkivik takorannerluinnarmat oqaaseqarani isigeqqaartariaqarpoq.

- Soorlu kujataata qaqqarsui, Henriup isikkivissuaq saallugu taama oqarpoq.

Nunamut ungalluinnalersimanera isikkivissuaq isigigaanni paasinarseriasaarpoq. Nunamulli ungaginninnera alianaannerinnaanik pissuteqanngilaq. Tamaani najugaqartut ataqatigiilluarnerat Henriup angerlarsimasutut misigineranut peqqutaaqataalluartarpoq.

- Soorlu Kalaallit Nunaanni illoqarfinni mikinerni inuit sanioqqutagut ilassisarpagut, aamma maani ilassisarpugut. Amerlanerit soorlu saneqqullugit: Buongiorno (kumoorn / kutaa), buonasera (godaften), ciao (aluu / baarj). Aamma illarumatoqaat, illartaqaagut ilaanni. Inuppalaarnerat kalaallinut assiguffeqartaqaaq, Henrik oqarpoq.

Aaqqiigasuartariaqalersillutillu italiamiut pipallattarsimanerat maluginiagaanut ilaavoq.

- Soorlu uagut oqartarpugut: Kalaallisut iluarsiinnartigu. Aamma italiamiut iluarsiipallanniaraangamik taama oqartarput, Henrik illarlunilu oqarpoq.

Neriniartarfiutitaarusuppoq

Henrik Tasermiut kangerluani savaateqarfimmi Nuugaarsummi peroriartorami qatanngutini sisamaasut angajoqqaatillu kisimiillutik. Meeraanermini angerlarsimaffimminni atuartinneqartarput. 5. Klassenngortussaatillutilli, qulingiluaannarnik ukioqarluni ilaquttani qimallugit atuariartorpoq. Angajoqqaat qimallugit nammineersinnaaneq taamani ilinniapiloortariaqalerpaa.

- Inuttut namminersorneq ilinniarlugu aallartiaarnikuunermik namminersortaqaanga, Henrik oqarpoq.

Nammineernerlu eqqaaneqartillugu nammineerluni neriniartarfiutitaarnissani eqqarsaatigillattaasarpaa.

- Siunissami neriniartarfiutitaarusussinnaavunga Kalaallit Nunaanni, Henrik oqarpoq.

Henriup Amalfip sineriaani ullormut peqatiginera naajartuaalerpoq. Freernini atorluarlugu Praianomut angerlarnani Salernomut ikaartaammik ikaarpoq. Naak Italiami inuunini iluarsimaartaraluarlugu ilaquttani ukiorpassuit qimaqqagamigit ilaanni maqaasisarlugit isertuutinngilaa.

- Ilaquttatsinnik annaasaqaraangatta imaluunniit ullorsiorfinni anginerni. Taavalu soralussat mikisut peroriartornerani najuutinnginneq. Tamakkua sakkortusarput.

Qujanartumilli ullut amerlanerpaartai nuannersuusarput. Oktobari naappat Positano qimakkallassavaa. Danmarkimukarnissanilu maannamut siunniukkallaqqavaa. Kisianni suli aalajangiussivissimanani. Qimannginneranilu apeqqut ataaseq akissutissarseqqaartariaqarpoq. Qaqugumita nunatsinnut angerlarumaarpa?

- Kalaallit Nunaannut angerlartuaannarsinnaavugut. Angerlarumaarpungalu. Kisianni soormi maaniilaaqqaarutta nuannertigisoq?, Henrik qungujulluni naggasiivoq.