Inuit nipilersoriaasaat Danmarkimi tusarnaartitsissuutaalersut
Odensemi eqqumiitsulianik saqqummersitsivik Kalaallit Nunaanneersunit Alaskameersunillu sapaatit akunnerani matumani appisimaarfigineqassaaq.
Inuit nipilersoqatigiit pingasut Odensemi marlunngorpat unnukkut tusarnaartitsissapput.
Naggueqatigut Inunneersut nipilersoqatigiit pingasut Odensemi Galleri Galschiøtimi saqqummersitsivimmi marlunngornermi unnukkut tusarnaartitsilerpata tusarnaariat nuannersumik misigisassaqarput.
Nipilersoqatigiit Danmarkimeersut Inuanima, Aviaja Lomholtimik Igor Radomillu peqataaffigineqartut appisimaassapput.
Uummannami meeqqat angerlarsimaffianneersut erinarsoqatigiit Uummannaq Kids-imik taaguuteqartut aamma Alaskameersut Pamyua ilaatigut Karina Møller aamma Philip Blanchetimit peqataaffigineqartut nalunaaquttap akunneri marluk affarlu Odensep ilaani Næsbymi tusarnaartitsissapput.
Naakkiunneq ajornaatsuinnaanngilaq
Eqqumiitsuliortoq Jens Galschiøt Odensemi sannavimmini alutornartorpassuarnik sanasarpoq. Pinnersaatit, qiperukkat ilusilersukkallu politikkimut tunngassuteqartut.
Nunarsuup sinneranit naapertuilluanngitsuliornerit annertuut maluginiarneqarnissaat siunertaralugu nunanit tamalaanit peqataaffigineqartut ukiut ingerlaneranni aaqqissuunneqartarsimapput.
Jens Galschiøtip silap pissusiata allanngoriartornera arlaleriarluni sammisarsimavaa, ilaatigut pissutsit qanoq ajortiginerat ersersinniarlugu nannumik naalinneqarsimasumik suliaqarnikuulluni.
Naggueqatigiit Inuit nuannereqigai
Jens Galschiøtip ikiortaasalu tallimanngornermi ualikkut appisimaarfissap piareersarnerani Jens Galschiøtip naggueqatigiit inuit kulturiallu qanoq nuannaritiginerlugit oqaluttuaraa.
- Rasmus Lyberthip erinarsornera tusarnaartillugu nuannarisaqaara. Eqqumiitsuliarisartakkannut arlaatigut eqqaanarsinnaavoq. Arlaanni aallartiffeqariarluni qanoq inerneqassanersoq nalunartuaannarluni.
- Eqqarsarnartumik pissanerpunga, soorlu killissanik arlaannik qaangiillunga. Mongoliamiut torlorsortartut tusarnaartillugit taamaattarpunga, aammalu Rasmus Lyberthimut, Jens Galschiøt oqaluttuarpoq.
- Marlunngorpat unnukkut tusarnaarianut naggueqatigiit inuit nipilersugaasa qanoq qamuuna attuisinnaatiginerannik ersersitsiniarlunga tusarnaartitsinissara qilanaaraara.
- Tusarnaartitsinissarput nuannissaqaaq, Jens Galschiøt naggasiivoq.
Tusarnaartitsivissaq tallimanngormat ualikkut ulapaarfiugaluartoq Jens Galschiøtillu gaffeltruckerluni ulapaaraluartoq nipilersoqatigiit pingasut marlunngornermi unnukkut arfineq-pingasunut tusarnaartitsinissaannut piareersimassaaq.
