Inuunermini ingerlavissaminik aalajangiisussanngortoq

Tusagassiortoq Nuummi Quassussuup naqqaniit sisorarfimmukartillugu nuissat akimorlugit seqinnilerpoq. Nuna ujarattarasaarpoq ippernaqaqaarlu. Illoqarfik suli aasaammat pingaarnertut inuttaasup soqutigisaanut, tassa sisorarnermut, suli ungaseqaaq.

45-nik ukiulik Malik Hegelund Olsen meeraallunili Sisimiut qaqqaani sisorartarsimavoq. Meeraanermini nunatsinni pissartanngorniuunnernut arlalinnut, sineriammi sumiiffinni assigiinngitsuni ingerlanneqartartunut, peqataasarluni sungiusariarluni Frankrigimut angalasarlunilu Danmarkimi pissartanngorniuunnerni, Sverigemi Norgemilu ingerlanneqartartuni, peqataasarpoq.

Nunarsuaq misigisassarfiorfigerusullugu Norgemi Lillehammerimi sisoraatigaluni ilinniarnertuunngorniarfimmi ilinniarnertuunngornilerpoq. Qaammatilli qulit ingerlaneranni seeqqumi ujalorsuagut marloriarluni ajoquserami sisorarnermik unammisartuunissamik takorluugaa piviusunngorsinnaanngilaq. Taamaammat Nuummi ilinniarnertuunngorniarnissani aalajangiuppaa. Sisorarnermik soqutiginninnini ilaatigut Nuummi sisorarfimmi ingerlatiinnarsimavaa, nammineq sisorartarluni, meeqqanut sungiusaasusarluni minnerunngitsumillu soqutiginninnini qitornaminut ingerlateqqillugu.

- Sunngiffinni suli sisorartaqaanga. Kangerlummi sumiiffinnut assigiinngitsunukartarpugut, qattunikkullu qummukariarluta ammut sisusarluta. Maani Nuummi aamma sisorarfik suli ammanngitsoq qummukariarluta sisorartarpugut. Sisorarneq suli initullunilu uannut pingaaruteqarpoq.

- Meeqqakka tamarmik aamma sisorarnermik nuannarisaqarput. Ernera snowboardertarpoq, marluullutillu sisorarfimmiinnissartik nuannareqaat. Ernera aamma mikinerugallarami unammisunut peqataasarpoq, soqutigisaali maanna allanngorput, Malik Hegelund Olsen oqaluttuarpoq.

Pinngortitaq asimiinnerlu Maliup nuannarilluartuugamigit asimiikulasarpoq.

- Peroriartorninneersuusimassaaq. Umiatsiartaqigatta eqalunniarlutalu, aavarlutalu pilisarpugut. Ataataga Sisimiuni qimmeqarpoq, taamaammat qimussertarpugut. Ukiuugaluarpat aasaagaluarpalluunniit asimiittarpugut, tamannalu nammineq periuseqarlunga ingerlateqqinnikuuara.

Ilaqutariit aaqqissuussaanerat allanngorartoq

Maliup angutaa tassaavoq nakorsaallunilu siornatigut politikeriusimasoq Ove Rosing Olsen, arnaalu tassaavoq namminersortoq Liisi Egede Hegelund. Malik Nuummi 1979-imi inunngorpoq, Nuummulli uteqqinnginnermini Sisimiuni peroriartorpoq.

- 20-it missaannik ukioqartunga angajoqqaakka avipput, ataatagalu nuliartaaminik pingasunik meerartaaqqippoq. Nukarliit meeqqama peqatigipajaarpaat, Malik oqaluttuarpoq immikkuullarinneralu erseqqissarlugu.

- Ataatagalu meerartaaqatigiipajaarpugut, taamaammat immikkuullarilaarpoq, qatanngutikkali asavakka ilaqutariillu taama amerlatiginerat nuanneqaaq. Meeqqat aamma ataqatigiilluarput.

Malik nammineerluni avinnikuuvoq, nuliakunilu erinarsortartoq Nina Kretzmann Jørgensenilu marlunnik qitornaqarput.

- Arnakkuluk Jo Kleist, piffissap affaani uagutsinni najugaqartartumik paneqartoq, inooqatigaara. Angerlarsimaffitsinni qassiusarnersugut ukiut ingerlaneranni allanngorarnikuuvoq. Ilaannikkut marluinnaasarpugut, ilaannikkut pingasuusarluta, sisamaasarluta tamattaallutaluunniit tallimaasarluta. Meeqqakka maanna perorami namminneq angerlarsimaffeqarput.

- Ilaqutariittut aaqqissuussaanermut ulluinnatsinni allanngorartuaannarpoq. Sungiukkaanni ajunngilluinnarpoq. Meeqqat aallaavigalugit ikioqatigiikkaanni toqqissisimanartumik aaqqiisoqarsinnaavoq, Malik Hegelund Olsen, arnaatini meeqqallu tamaasa ilagalugit aasaq manna feeriarsimasoq, nassuiaavoq.

Oqaatsinut pikkorinngitsoq

Maliup sooq tunisassiornermi ingeniøritut ilinniarnissani toqqarsimanerlugu eqqaamanngilaa. Københavns Ingeniørskolemi Ballerupimiittumi ilinniareerluni 2005-imi naammassivoq.

- Ilinniagaq taannarpiaq sooq toqqarnerlugu eqqaamanngilara, meeqqalli atuarfianni atuarama oqaatsit pinnagit kisitsisilerineq pikkoriffigineruara. Kemi, fysik kisitsisilerinerlu pikkoriffigaakka. Ilinniakkamik toqqaanialerama tamanna tunngavigisimagunarpara.

- Tunisassiornermi ingeniøri sulerisuugami?

- Tunisassiornermi ingeniøri, ingeniørimut nalinginnaasumut, immikkut ilisimasaliusumut, sanilliullugu, assigiinngitsorpassuarnik pisinnaasaqartarami aqutsinermi tunisassiornermillu pilersaarisiornermi siammasissumik suliaqartarpoq. Ilaatigut tunisassiornernut aalajangersimasunut periutsit sorliit naleqqunnersut, naleqalersitsinermi tunisassiornermik ataqatigiissaarineq tunisassiornerlu qanoq naammassiuminarsarneqarsinnaanersoq kiisalu tunisassiarput sumi, assartuinerit ataqatigiissaarinerillu suut atorlugit, qanoq avammut tunineqarsinnaanersoq pineqarpoq, Malik Hegelund Olsen nassuiaavoq.

Ilinniarnini nunanilu allani ilinniagaqarnissamut soqutiginninnini pissutigalugit Royal Greenlandip tunisassiorfiani Tysklandimiittumi sulinermik misiliinissaminik periarfissaqalerpoq.

- Ilinniarnerma nalaani sulinermik misiliisussanngoratta nunani allani suliffissarsiornissara pingaartippara. Royal Greenlandip tunisassiorfiani Tysklandimi Wilhelmshavenimiittumi sulinermik misiliisussanngorpunga. Taamanili Royal Greenlandip tunisassiornera pillugu paasisaqartalerpunga. Suliffeqarfissuarmi kingusinnerusukkut suliffittaarnissannut tamanna iluaqutigeqaara.

Malik Hegelund Olseniip oqaatsit pikkoriffiginngikkaluarlugit Tysklandimiitilluni tyskisut ilinniartariaqarsimavoq.

- Inuppassuit tuluttut oqalussinnaanngimmata nunaqavissut attaveqarfigissagukkit tyskisut oqaluttariaqarpunga. Oqaatsit ilikkalaaraluarpakka, atunnginnakkilli annerpaartai puigoreerpakka, illarluni oqarpoq.

Aqutsisuunissaminik takorluugaqanngitsoq

Malik Hegelund Olsenip ilinniareerluni Nunatsinni suliffia siulleq tassaavoq Air Greenland, tassani sulliviit sisamat aqunnissaat akisussaaffigaa.

- Aqutsisuunissara takorloornikuunngilara, aamma angunianngilara. Aallartikkamali nuannareqaara. Inuit allat aqutsisuuffigigaanni akisussaaffeqaraannilu sulianut tunngasuniit allanik piumasaqaateqarpoq. Suliamik naammassinninnissaq suliffillu pitsaasoq inunnit aallaaveqarpoq. Taamaammat uannut soqutiginartorujussuummat aqutsinermi pikkorissarnerit arlallit ingerlannikuuakka, Malik Hegelund Olsen, Air Greenlandimi sulinermini Ilisimatusarfimmi aaqqissuussinermut aqutsinermullu qaffasissumik ilinniaqqippoq. Taamaalilluni ilaatigut aqutseriaatsit, ingerlariaatsit tarnillu pissusii ilisimasaqarfigilerpai.

- Sisorarnermi sungiusaasuunerma nalaani aqutsinermik misilittagaqareerpunga, tassani angalanermut atatillugu meeqqanut akisussaaqataasarpunga. Tamatuma saniatigut peqatigiiffileringaatsiarnikuuvunga. Aammalu aaqqissuusseqataaneq akisussaaqataanerlu soqutigiuarsimavakka. Misilittakkat ilisimasallu pissarsiakka inunnik allanik aqutsinissamut tunngangaatsiarput. Taamaammat aqutsinermik sulinissannut soqutiginnilerpunga, taanna oqarpoq.

Royal Greenlandimi tunisassiornermi pisortap tulliatut 2012-imi atorfininnermigut inuussutissarsiornermi malunnaateqarnerulerpoq.

Royal Greenland suliffeqarfissuuvoq nunani allani immikkoortortaqarfilik, Malillu tunisassiornermi pisortap nunani assigiinngitsuni tunisassiornermi suliai tapersersortussaavai. Malik ukiut pingasut kingorna suliffeqarfissuarmi tuniniaanermut ingerlatsisunngorami tuniniaaneq nunagisamilu tunisassiornermik inerisaaneq akisussaaffigilerpai.

- Suliffeqarfimmi pisortaanikuunngilanga, assigiinngitsutigulli ulluinnarni aqutsinermut peqataasarpunga, Malik Hegelund Olsen oqarpoq, taannalu ukiuni arfineq-pingasuni tuniniaanermut ingerlatsisooreerluni Royal Greenlandimi piujuartitsinermut tunngasumik allamik atorfittaarpoq.

Siulersuisuni sulineq

Malik Hegelund Olsen atorfimmi saniatigut siulersuisuni sulinermik aamma aallussaqarpoq. Københavnimi ilinniarnermini arsartartoqatigiinni IT-79-ikkunni, kingorna FC Nanormik taaguuteqalersuni, siulersuisunut ilaasortanngorpoq. Aamma ukiup ingerlanerani ornigarneqarnerpaamut, Kalaallit Nunaat Tivolimi-mut, siulersuisuni sulisarpoq.

- Peroriartorninni ataataga siulersuisuni sulisoq malinnaaffigisarpara, tassani taamatut sulineq pillugu apersortarpara. Ilinniareerluta Nuummut uteratta Elite Sport Greenlandip Ilimmarfiullu siulersuisuinut ilaasortanngorpunga. Tamatuma saniatigut Royal Greenlanfip siulersuisuini sulisut sinnerlugit ilaasortaanikuullungalu Nuummi Kofoeds Skolemi Inuk Hostels ApS-imilu siulersuisunut siulittaasuunikuuvunga, Malik Hegelund Olsen oqaluttuarpoq.

Taanna kingorna Elite Sport Greenlandimi siulersuisunut siulittaasunngorpoq, Air Greenlandimili siulersuisunut ilaasortanngorusunnerluni aperineqarami tassanngaanniit tunuarpoq.

- Ullumikkut aalisarnermik ingerlatseqatigiiffimmi Ice Trawl Greenland A/S-imi Air Greenland A/S-imilu siulersuisuni siulittaasuuvunga.

Silarluk meeqqallu nappaataat

Malik Hegelund Olsen ukiut ingerlanerini misilittagarpassuaqarpoq, taakkulu Air Greenlandimi siulittaasuunermini atorluartarpai.

- Siulersuisuni ilaasortaanikkut suliffeqarfiup inuiaqatigiinni sunniuteqarnerata ilanngullugu eqqarsaatiginissaa suliassaraarput. Siulersuisulli ulluinnarni ingerlatsinermi toqqaannartumik akuliuttussaanngillat. Assersuutigalugu Air Greenlandimi taamaatitsiinnartoqarpat akuliuffigissanngilarput. Tamanna pisortat suliassaraat, taanna nassuiaavoq.

Nuummi mittarfissuup ammarneqarneraniilli tusagassiuutit mittarfimmi ajornartorsiutit silallu ilaasunut aningaasaqarnermullu sunniutaat oqaluuserisarpaat. Malillu siulittaasutut aamma pisumit sunnerneqarpoq.

- Eqqarsarnarpoq, pisunillu soorunami sunnerneqartarpunga. Sunaluunniit ingerlanerlukkaangat sunnerneqanngitsoorsinnaanngilagut. Siulersuisuni siulittaasuuvunga, kisimiinngilangali. Suleqatigiippugut, siulersuisuni oqaluuserisanut ilanngussaqartarluta.

- Siulersuisunut siulittaasutut ilaasortat tamarmik isummernissamut periarfissaqarnissaat isumagissallugu siulersuisuni sulinermi soqutiginartut ilagaat. Piginnaasagut assigiinngitsut tunngavigalugit piginnittunit – Namminersorlutik Oqartussanit – toqqarneqarpugut. Piginnaasat tamakku tamaasa atorluarsinnaanissaat uannut pingaaruteqarpoq. Ajornartorsiuteqaraangatta periutsit, periarfissat akornutaasinnaasullu ulluinnarni aqutsisut peqatigalugit oqaloqatigiissutigisartussaavagut, Malik Hegelund Olsen nassuiaavoq, aalajangiipallanneq siulersuisuni sulinermi tulluanngitsoq, taamaammallu suleqatigiinneq ammasuunerlu pissuserineqartariaqartut taanna isumaqarpoq.

- Taamaalillunga nalunngilara kisimiinnanga, naak siulittaasutut akisussaaffeqarnerugaluarlunga. Aalajangigassaqarnitsinnili tamatta suleqataavugut. Taamaammat nutaamik aqqutissiuussinissaq aamma ataatsimoorluta akisussaaffigaarput. Tamanna uannut toqqissisimanartorujussuuvoq. Naatsorsuutigineqartumit allaanerusumik pisoqaraangat siulersuisunut saqqummiuttarpavut.

Malik Hegelund Olsenip aalajangikkat ullormiit ullormut allanngortinneqartannginnerat pingaartippaa. Allanngortinnginnerinilu oqaloqatigiissutigilluarneqartarnissaat.

- Aalajangigaq allanngortinnginnerani misilinneqaqqaartariaqarpoq. Anguniagaq aalajangereeraangatsigu aqqutaa sangujoraarsinnaasarpoq, anguniagarpulli puigussanngilarput. Anguniagaq allanngortinneqarsinnaavoq, nunarsuarmimi allanngortoqartuaannarpoq. Ukiup affaani kingullermi susoqarsimanera eqqarsaatigiinnaruk. Kalaallit Nunaata nunarsuarmi inissisimaffia allanngorluinnarpoq.

- Siornatigut nunatsinnut soqutiginnittoqarsimanngitsoq oqarsinnaanngilanga, tusagassiuutilli nunatsinnullu isiginnittaasiat allanngorluinnarpoq. Pissutsit tamakku siunissaq ungasinnerusoq eqqarsaatigalugu soorunami aalajangiisuupput. Allanngortoqartillugu tunuarsimaartassanngilagut. Nalimmassarlutalu anguniakkagut naleqqussassavagut, taanna oqarpoq.

Suliunnaarallartoq

Malik Hegelund Olsen aatsaat piukkunnarseruttorami suli ukiorpassuarni sulisinnaavoq. Taanna annerusumik Royal Greenlandimi assigiinngitsunik aqutsisuuffeqartarsimavoq, tamannali maannamuugallartoq qaangiuppoq.

- Ukiorpassuarni sulinikuulluni sulinani eqqumiippoq, aammali oqiliallannarpoq. Periarfissaqarnera nuannaarutigaara. Suliffissannut tullermut ingerlariaqqipallannginnissara ukkatarinikuuara. Taamaammat piffissami matumani eqqissillunga allanik sammisaqarpunga, Malik Hegelund Olsen, sulinermini ukiut 13-ingajaat Royal Greenlandimi sulisimasoq, oqarpoq.

Nutaamik misiliinissamut piffissanngorpoq, taanna oqarpoq, taamaammallu nutaamik atorfittaanngikkaluarluni ingerlatsisutut atorfimminit 2025-mi upernaakkut soraarpoq.

- Sammivimmik nutaamik toqqaanikuunanga siullerpaamik taamatut aalajangiivunga. Taamaaliornikkut anersaartorfeqarlungalu tunniaqqaarama suliffik sorleq suliassallu suut suliarerusunnerlugit sukumiisumik eqqarsaatigaara.

Malik suli siulersuisuni ilaasortaavoq, taamaalillunilu sulinngiffeqarnissaminut periarfissaqarsimalluni. Maannali sulinngiffeqareerluni allamik suliffittaarnissaminut piareerpoq.

- Aasaanerani feeriap kingorna aalajangiissallunga eqqarsaatigaara. Upernaaq umiatsiara immamut aqqarlugulu angalaarutiginikuullugulu suliassat suulluunniit isumageriarlugit feeriarnikuuvunga. Maanna qaangiupput, taamaammat suliffissarsiullattaalereerpunga. Qanoq ingerlajumaarnersoq pissanganaqaaq, Malik Hegelund Olsen oqarpoq.