Inuuteq Storchip suliai Folketingimi nivingalertut
Eqqumiitsuliortup Inuuteq Storchip suliai 14-it Folketingimi ataatsimiititaliat ataatsimiittarfiisa ilaanni iikkamut nivinngarneqarput
Inuuteq Storchip assilisaasa 14-it saqqummersinneqarnerat pingasunngormat ammaanersiorneqarpoq, taakkulu Folketingip ataatsimiititaliaasa ataatsimiittarfiini maanna takuneqarsinnaapput
Foto: Trine Juncher Jørgensen
Inuuteq Storchip assilisai 14-it Folketingimi ataatsimiititaliat ataatsimiittarfianni inimi 2-080-imi nivinngagaaqqammerput.
– Neriuppunga politikerit inuit sumiiffinni orninneqariaannaanngitsuni najugallit eqqarsaatiginerunissaannut iluaqutaajumaartut. Inuit tusaaniarneqanngitsoortartut tusaaneqartariaqartulli, Inuuteq Storch saqqummersitsinerup ammaanersiorneqarnerata kingorna oqarpoq. Saqqummersitsineq Folketingimi Eqqumiitsuliornermut Ataatsimiititaliap aaqqissuussaraa.
Ataqatigiinneq
Ammaanersiornermi Inuit Ataqatigiit sinnerlugit Folketingimut ilaasortaq Aaja Chemnitz aamma peqataavoq, taassumalu kalaallit suliaat nutaaliat tamat oqartussaaqataanerisa aqqani suliaqarfiusumi iikkami takussaalermata.
– Maani ilulissanik qalipagarsuit kuultiusunik sinillit sungiusimavavut, nuanneqaarlu kalaallit assilisaat nutaaliaanerusut Kalaallit Nunaanni maanna pissutsinik ersersitsisut iikkami takusinnaaleratsigit. Inuutip assilisai inuit ataqatigiinnerannut tunngassuteqarput, tamannalu Kalaallit Nunaanni pingaaruteqartorujussuuvoq. Kinguaariit akornanni, ikinngutit akornanni ilaqutariinnilu ataqatigiinneq, Aaja Chemnitz oqarpoq.
Inuuteq Storch Københavnimi Politikens Forhalimi Fotocenterimilu aamma saqqummersitsingajalerpoq.
Assilissani 14-iusuni ulluinnarni inuuneq, inuit ataqatigiinnerat Kalaallit Nunaannilu pinngortitaq takuneqarsinnaapput.
Assi: Trine Juncher Jørgensen
– Neriuppunga politikerit inuit sumiiffinni orninneqariaannaanngitsuni najugallit eqqarsaatiginerunissaannut iluaqutaajumaartut. Inuit tusaaniarneqanngitsoortartut tusaaneqartariaqartulli, Inuuteq Storch oqarpoq.
Assi: Trine Juncher Jørgensen
