Itsaq pisimasut qaffakaateqqinneqartut

Varnap aatani sinnattoraa. Taassuma aqarpaa. Iterami suli tusaasinnaavaa. Sinnattoreerluni siuaasani paasisaqarfigerusulerpai. Varnap pereersut maannakkullu inuuneranut sunniuteqartut akissutissarsiumavai.

Piviusulersaarut “The Forbidden Songs / Inngerutit Inerteqqutaammata” naatsunik filmiliaavoq sisamanik immikkoortulik.Immikkoortoq siulleq siorna Nuuk International Film Festivalimi takuteqqaarneqarsimavoq, aappaalu festivalimi tassani takuteqqaarneqaqqammerluni.

Varna Marianne Nielsen eqqumiitsuliortuuvoq assigiinngitsorpassuarnik suliaqartoq, nipilersuusiortoqnammineq taalliaminik erinniaminillu erinarsortartuuvoq, isiginnaartitsisartuuvoq, erinarsortarpoq, qilaatersortarlunilu, ilisimatuujuvoq qilaat.org-imillu, qilaatersornermik ilisimatusarfimmik ilisimasanillu katersuiffimmik, pilersitsisuulluni.

Filmi naatsoq ”The Forbidden Songs / Inngerutit Inerteqqutaammata” (immikkoortoq 2) qilaatersornermik aallartippoq. Varna Tunumi tunumiutuulerluni immap sinaaniippoq qilaatersorlunilu. Filmiliarinera arriillisaavoq. Tunuani iluliarsuit nipaatsumik eqqissinartumillu nuisapput. Nipaa inimi – tarnikkullu – tusaaneqarsinnaavoq, sivitsunngitsorlu iliveqarfik nuisinneqarpoq, siuaasanut attaveqarnermut taakkununngalu uternissamut assersuutaalluartumik.

Qilaatersornerata katuarpalaarnera malillugu qulequtaq “The Forbidden Songs / Inngerutit Inerteqqutaammata” nuivoq, aappalaartumik titarneqarluni. Titarneq aappaluttoq qilaatersornerup nunasiaataanerup nalaani inerteqqutaasimaneranik - naqisimanninnerullu tamatuma kinguaariinni ileqqumik innarliisimaneranik - eqqaasitsivoq.

Varna Tasiilameersuuvoq, ilaqutariinnilu qilaatersortarneq inngernerlu kinguaariinni arlalinni atugaasimavoq. Aanaava taassumalu qatanngutai qulingiluat Angakkoq Maratsemit ernutaasimapput, taanna Ammassaliusimasumi Tunumiittumi 1906-ip missaani angakkutut ilisimaneqarluartunngorpoq.

Itsaq oqaluttuat

Filmi inuttaajutigaluni piviusulersaarutaavoq, Varnallu filmimi nammineq inuttaanini isiginnittaasinilu filmimi qitiutippai. Tamanna filmimi qanilaarnermik misigisimanermik sakkortunerulersitsivoq, filmilu inuttut kinaassutsimut attuumassuteqarnerulersillugu.

Varnap inuit oqaluttuarisaanerannik misissuinera eqqumiitsuliornermilu misilittagaqarluarnera, kiisalu kalaallit Inuit qilaatersortartut pillugit allagaatinik katersugaasivimmiittunik misissuisimanera filmimi naatsukullaliami tunngavigineqarput.

Qilaatersornermigut siuaasanut uterfiginninnerani qilaatersornerup oqaluttuallu nukingata taakku uummarteqqillugit misigissusii eqqarsaatailu isiginnaartutut malinnaavigineqarsinnaapput.

Filmimi naatsukullaliami Odin Maratsep qilaatersorneranit filmiliat pisoqqat ilaatigut takuneqarsinnaapput. Qanilaarneq, qilaammik ataqqinninnerat, qilaatip anersaakkut qanoq nakussannartiginera, aammali meeqqanut, inersimasunut utoqqarnullu quiatsannarsinnaasut, qungujunnarsinnaasut illarnartullu isiginnaariartutut takuakka.

Filmimi kalaallit kulturiat kalattoortunik swingertunillu takutitsisoqarneratigut, utoqqaat oqaluttuartinnerisigut tunumiullu qilaatersortut takorannersumik filmiliarineqarsimanerisigut kusanartumik takutinneqarpoq.

Varnap katuariarnini tamaasa akissutissanik, paasinninnissamik saammaateqatigiinnissamillu qinuvoq – matumanilu kulturip, eqqaamasat anersaallu naapitsinneranni “The Forbidden Songs/Inngerutit Inerteqqutaammata” siuliinut ataqqinaataalerlunilu imminut paasinissamut tunngavoq.

Filmi naatsukullaliaq immap assinganik, inuunermi ilisimanngisanik killeqanngitsumillu periarfissaqarnermik takussutissaasumik, aallartillunilu naggaserneqarpoq.

Varnap nammineq oqarneratuut assiliami qujamasungaarneq aamma ersersinneqarpoq: utoqqaat pingaaruteqassusaat, ilisimasanik naleqangaartunik pigisaqarnerat taakkualu ataqqillugit kinguaariinnut tulliuttunut ingerlateqqinnissaata pingaaruteqassusiat pillugit qujamasunneq.