Kalaallit Nunaat Tivolimi nipilersornikkut, eqqumiitsulianik saqqummersitsinikkut kulturikkullu pikialaartoqassasoq

Kalaallit Nunaat Tivolimi juulip 31-aniit aggustip aallaqqaataa ilanngullugu aaqqissuunneqaraangat kalaalerpassuaqartarpoq, ukioq mannalu aamma taamaassugunavilluni. Ulluni marlunni taakkunani kulturitsinnut attuumassutilinnik pikialaartitsisoqassaq, kalaallinik nipilersortartunik appisimaartoqassaaq, saqqummiisoqassaaq, eqqumiitsulianik saqqummersitsisoqassaaq qajarnermillu takutsisoqassalluni. 

Julie Berthelse, Rasmus Lyberth, Naneruaq, Kamik, Ikumasa aamma René Brandt appisimaartussanut ilaapput. Danskit nipilersortartut TV-2-kkut aamma appissapput – taakkua nunatsinni ukiorpassuarni kingullerni tusarnaartitsisaqattaarnikuullutillu ilisimaneqarluarlutillu nuannarineqarluartuupput.

Aamma soorlu kinaassutsimiit atuakkianiillu nunatsinni ilisimatusarnermut politikkkimullu tunngasunik oqalugiarluni saqqummiisoqassaaq, taakkununngalu ilaapput Naja Dyrendom Graugaard, Mira Kleist, Julie Rademacher GEUS-imeersullu, tassa Danmarkimi Kalaallit Nunaannilu ujarassiuut misissuivianeersut.

Kalaalerpaluttunik aamma saqqummiisoqassaaq, Shazia Khan assinik saqqummersitsissaaq, Magda-Maria Treur qalipaaffissaqartitsissaaq ilaqutariinnullu assigiinngitsunik sammisassaqartitsisoqassalluni. Qajarnermik Tivolip Tasiani ukioq manna aamma takutitsisoqassaaq.

Kalaallit Nunaat Tivolimi Kalaallit Illuutaat suleqatigalugu aaqqissuunneqassaaq, aaqqissuussarlu taanna tassa Købehavnip qiterpasissuani ukiorpassuanngortuni aasaanerani aaqqissuunneqartarpoq.

– Kalaallit Nunaat pillugu ilisimannittunut alapernaattunullumi assigiinngitsorpassuarnik misigisassaqartitsisoqassaaq, aaqqissuussisut oqarput.

Aaqqissuussami pisussat aaqqissuunneqarneri UANI takussinnaavatit.