Kalaallit piviusulersaarusiaat Nunat Avannarliit Siunnersuisoqatigiivisa Filminut Nersornaasiuttagaannut innersuunneqartoq
Kalaallit piviusulersaarusiaat WALLS – Akinni Inuk nersornaammut innersuunneqarpoq.
Piviusulersaarummi Wallsimi arnat marluk, Ruth Ninalu, Kalaallit Nunaanni pineqaatissinneqarsimasunut inissiisarfiup qarmarsuisa iluini Nuummi inuunerat oqaluttuarineqarpoq.
Assi: Anorak Film
Piviusulersaarut Walls – Akinni Inuk Nunat Avannarliit Siunnersuisoqatigiivisa Filminut nersornaasiuttagaannut 2025-mi innersuunneqartut arfineq-marluk ilagaat. Taama Nunat Avannarliit Siunnersuisoqatigiivi tusagassiuutinut nalunaarummi allapput.
Piviusulersaarut ukiuni arfineq-pingasuni suliaavoq, tassanilu arnat marluk, Ruth Ninalu, Kalaallit Nunaanni pineqaatissinneqarsimasunut inissiisarfiup Nuummiittup matoqqasup qarmarsuisa iluini imminnut ataqatigiilernerat pillugu filmiliarineqarpoq.
Filmimi ikinngutigiilluarneq, misigisimasat sakkortuut assigiiffillit kiffaanngissuseqalernissamillu neriuuteqarneq pillugit oqaloqatigiinnerit pineqaatissinneqarsimasunut inissiisarfimmi immiussat, Kalaallit Nunaannilu pinngortitarsuaq alutornangaartoq atorlugit takusassiarineqarput.
Sofie Rørdam aamma Nina Paninnguaq Skydsbjerg filmimi ilitsersuisuupput Emile Hertling Péronardilu Ánorâk Filmimi ingerlatsisuulluni.
Qanilaarneq isumalluarnerlu
Piviusulersaarusiornermi sivisuumik immiussisoqartarnerata qanoq pisoqarsinnaanneranik siuliuttuisoqarsinnaannginneranik filmip takutitsinera, Kalaallit filmilianik nalilersuisartut piviusulersaarutip innersuunneqarneranut tunngavilersuutiminni ilaatigut allapput:
- Filmi pingasunik sammisaqarpoq - pineqaatissinneqarsimasut immiussaat inuttaasumik ilisarititsisoq. Pineqaatissinneqarnikoq Ruthi, taassumalu Ninalu ikinngutigiileriartornerat - tamarmik immikkut assigiinngitsorpassuarnik imaqartut.
Qanilaarneq, isumalluarneq sammisanilu oqimaassinnaagaluartuni, soorlu toqutsineq, pineqaatissinneqarneq sumiginnagaanerlu, quianartortaqarnerani filmimi takuneqarsinnaasoq naliliisartut aamma allapput.:
- Piviusulersaarutip kalaallinit suliarineqarnerata misigissutsit poortornagit toqqaannartumik oqaluttuarnerit, ilaannikkut quiasaarluni pisoqarnerata takutippaa.
