Katsorsaaneq, inuunermik eqqarsaatersuuteqarneq aliasunnerlu

Issittumeersoq Lana Del Rey. Popperpalaarnerusumik saqqummersitaq.

Nipilersukkat eqqissisimanartut. Taallat eqqarsaatigeqqissaarneqarsinnaasut.

Athena Lingsip saqqummersitaani siullermi  "Dominant Fly”-imi nipaa, misigissutsinik isumaliornartunillu imalik tusarnaartillugu, ataqatigiissitsisutut ippoq, taannalu februaarip 14-ianni tusarnaagassiat saqqummiunneqartartut annerit ilaani saqqummersinneqarluni.

Tusarnaartoq assersuusiarpalaartunik eqqarsalersitsisunik taalliarpalaartunillu erinarsukkat assigiinngitsut tallimat ukua atorlugit ingerlateqqinneqarpoq: ”Dominant Fly”, ”Forever Is a Long Time”, ”Catching Caterpillars”, ”She Is Missing” kiisalu ”In the Morning”.

- Arctic Sounds saqqummersitaq pillugu allappoq, saqqummersitseqqaartoq nipilersortartoq 21-iinnarnik ukiulik, Nunatsinni nunanilu avannarlerni maluginiarneqarlualereersoq saqqummersitsinermigut sakkortuumik aallartittoq.

Killissamik qaangiisartoq

Athena Lingsip nipilersukkamigut killissamik qaangiisarnini ilisimaneqaatigaa. Silap pissusiata allanngoriartornera, isummakkut nanertisimaneq, nalornineq, suiaqatinillu atoqateqartarneq nipilersornikkut sammisarpai.

Athena Lings 21-nik ukioqarpoq, Kangerlussuarmi inunngorpoq peroriartorlunilu. 15-inik ukioqarluni nipilersorneq ilinnialerpaa, 18-inillu ukioqarluni tusarnaartitsisalerluni, nipilersortartutullu suliniuteqarnerulerluni. Erinarsukkani siulleq „I know it’s different“ nittartakkakkut tusarnaartitsivimmi SoundCloudimi 2019-imi saqqummiuppaa. Tassani Nunatsinni inuusuttuunermi suiaqatinoortuunermilu ajornartorsiutit erinarsuutigai.

Itisuumik paasiuminartumillu isumalik

Saqqummersitaa nutaaq ”Dominant Fly” aamma pakatsinanngilaq.

Taallani katsorsaasinnaaneq, inuunermik eqqarsaatersuuteqarneq, annaasaqarneq, aliasunneq inuttullu ineriartorneq sammineqarput, taallioriaasialu sakkortooq pissutigalugu itinerusutut paasiuminartutullu misiginartarlutik.

Paasineqarneq akuerineqarnerlu misiginarput, tamannalu piffissami matumani naleqqulluinnartutut isigaara. Athena qujanaq.

Athena Lingsip nipilersugai assigiinngitsorpassuarnut tunngassuteqarput, nipilersoriaatsimullu aalajangersimasumut taamaallaat tunngassuteqaratik. Saqqummersitaani erinarsugai kiffaanngissuseqarluni popimik nipilersugaapput sakkortuumik punkerpalaarlutik elektroniskimillu imaqarlutik.

Athena Lings nipilersortartut angutaanerusut silarsuaanni, arnanut nipilersortartunut aqqutissiuussivoq, minnerunngitsumik nipilersuutinik nipilersornermi.

Saqqummersinneqartoq Mads Berglandimit aqqissuunneqarlunilu nipinik immiussanik akoorneqarpoq, aaqqissuisup saniatigut Athena Lings nammineq guitarertuuvoq aamma Steen Olsen (Ujarock) tumerparpaartuullunilunilu bassertuulluni.