Kulturikkut allatut siammarterineq

Aalborgimi Kalaallit Illuutaat Nykøbing Morsimi sapaatip-akunnerani kingullermi kulturikkut ataatsimiinnermut peqataavoq.

Kulturikkut ataatsimiinnerit Danmarkimi ukiuni kingullerni inunnik ataatsimiititsinerit amerlasuut ilagaat. Ataatsimiinneq nipilersortartunik festivalertitsinertut oqaatigineqarsinnaalluarpoq, tassani nipilersorneq oqaloqatigiinnernik oqallinnernillu taarserneqartarpoq.

Festivalertitsinerit taamaattut nuannarineqarlualersimapput. Nykøbing Morsimi ataatsimeersuarnermi ulluni pingasuni ingerlanneqartumi inuit 37.000-it peqataapput, sammisallu assigiinngitsut 700-t sammineqarput.

Naatsiivimmi nuannatsitsineq

Aalborgimi Kalaallit Illuutaat aaqqissuussanut marlunnut qaaqqusisimavoq, taakku tamarmik Antje Abrahamsenimi, ukiut tamaasa illoqarfiup aqquserngani pingaarnermi naatsiivimmini Kulturikkut ataatsimiinnermi peqataasunut ammatitsisartumi, pisimapput.

Aaqqissuussinermi siullermi atisaliortartoq Nickie Isaksen saqqummiivoq – aappaanilu assammik arsartartoq Jacob Larsen aamma Inuit Gamesimi pissartaq Arnajaraq Motzfeldt saqqummiimmata kalaallit timersornerat sammineqarpoq. Aaqqissuussinerni taakkunani marlunni inuit 50-it missaanniittut najuupput.

Aammattaaq Aalborgimi DGH-mi kalaallinut kulturikkut attaveqartartoq Lisa Bundgaard Jensen, nammineq Morsimi najugaqartoq, kalaallit eqqumiitsuliaannik, sanalugaannik qilaatersornermillu saqqummiivoq.

Kalaallit Nunaat pillugu paasisaqarneruneq

- Aaqqissuussinitta soqutigineqarluarnerat naammagisimaarluarparput. „Oqalugiaatit“ aaqqissuukkagut Kalaallit Nunaanni inuunerup aamma kalaallit Danmarkimi inuunerisa, qallunaat tusagassiiviini ulluinnarni takuneqartartunit allaanerulluinnartunik, paasinarsisitsinissatsinnut tunngapput. Soorunami kulturi aallaavigalugu. Tamanna iluatsilluartoq isumaqarpunga, DGH-Aalborgimi pisortaq Jeppe Bülow Sørensen oqarpoq.

Peqataasut aamma takusatik tusakkatillu nuannaarutigaat.

- Kalaallit Nunaat pillugu ilisimasaqarpianngilanga, atisanilli atisalersoriaatsinillu soqutigisaqarama Nickie Isaksen tusarnaariarpara. Misigisaq tupinnarlunilu nuannerluinnartoq. Nickiep inuunini ilaquttanilu quiasaarluni oqaluttuarai – ilusilersuisartutut tusaamaneqaraluarluni nuannaartunarlunilu pingaarniartuunngilaq, qallunaaq Hanne Kodal Sørensen oqaluttuarpoq.

- Nickiep ilusilersuinera tupigusuutigingaarakku ulloq taanna kingusinnerusukkut kalaallit eqqumiitsulianik saqqummersitsineq takuniarakku kiuulimik 1200 koruuninik akilimmik pisivunga. Akisuallaanngilaq, Nickiemmi ilusilersuinera piffissamut aalajangersimasumut tunngassuteqaranilu ukiorpassuarni atorneqarsinnaavoq, qallunaaq atisanik soqutigisaqartartoq, maanna kalaallit atisalersoriaasiannik ilusilersuineranillu soqutiginnilersimasoq, oqarpoq.

Antjesip naatsiiviani oqallinnerit marluk taakkua Lisa Bundgård Jensenimit aamma Jeppe Bülow Sørensenimit ingerlanneqarput, taakkualu tusarnaartut ilitsersorlugillu kikkut tamarmik malinnaanissaat isumagaat, naak kalaallisut oqaaserpassuit atorneqaraluartut - ilaatigut aanaa, aataa, ajunngilaq aamma asavakkit.