Lisathe Møller atuakkiortunut nersornaammut innersuunneqartoq
Atuakkiortoq Lisathe Møller atuakkiani “Qaamarngup taartullu akisugunneri” pillugu Nunat Avannarliit Siunnersuisoqatigiivisa atuakkiortunut nersornaasiuttagaannut innersuunneqarpoq.
Atuakkiortup Lisathe Møllerip atuakkiaa kingulleq 2024-meersoq ima nuannarineqartigisimavoq allaat Nunat Avannarliit Siunnersuisoqatigiivisa atuakkiortunut nersornaasiuttagaannut innersuunneqarluni
Foto: Dida G. Heilmann
Atuagaq, 2024-mi saqqummersinneqartoq, „atuakkiatut killitsinnartutut eqqarsalersitsisutullu“ nersornaasiinermut ataatsimiititaliamit taaneqarpoq.
- Atuakkami pingaarnertut inuttaasut marluk, angut Siiva arnarlu Ane, aqqutigalugit inuiaqatigiinni politikkikkullu sammisat pingaarutillit Kalaallit Nunaannut attuumassuteqartut, ilinniartitaanerup ineriartornera, inooriaatsit ileqquusut nutaaliaasullu akornanni unammillernartut kiisalu Kalaallit Nunaanni inuusunnerusunut oqaatsit pillugit unammilligassat nutaat sammineqarput.
Taamaalilluni atuakkami kulturikkut aaqqissuussaanermillu allannguutit, ullumikkut kalaallit kinaassusiannut ilusilersuisut, paasisaqarfiulluartumik sammineqarput, Nunani Avannarlerni Suleqatigiinnerup nittartagaani allassimavoq.
Pingaarutilik
Nersornaasiinermut ataatsimiititaliaq innersuussineq pillugu ima nangippoq:
- Atuagaq taanna kalaallisut atuakkiornermut pingaarutilimmik ilanngussassatut immikkuullarilluinnarpoq, Kalaallit Nunaanni nutaaliaasumi inuit ataasiakkaat ajornartorsiutaat sammineqarlutillu pinngitsuuisinnaannginneq, misigissutsikkut naalliuutit, akiuussinnaaneq inuunerullu siunertaqarluartup ujarneqarnera sammineqarmata. Oqaluttuarisaanermi killitsinnartumik inuttullu pissuserilluinnartunik inuttaqarluni atuakkami Kalaallit Nunaanni nutaaliaasumi inuttut inuiaqatigiinnilu allanngornerup ilungersunarnera pineqarpoq.
Atuakkiortut 14-it innersuunneqartut
Atuakkiaq taanna “kalaallisut atuakkiornermut iluaqutaaginnarani aammali nunarsuaq tamakkerlugu atuartartunut sunniuteqarluartoq” aamma allassimavoq.
Atuakkiortut 14-it Finlandimeersut, Savalimmiuneersut, Kalaallit Nunaanneersut, Islandimeersut, Norgemeersut, Sverigemeersut Ålandimeersullu kiisalu samisut oqaasillit nersornaaserneqarnissamut innersuunneqarput. Nersornaatisisoq oktobarip 21-ani saqqummiunneqassaaq. Nersornaat qallunaat aningaasaannik 300.000 koruuninik aningaasartaqarpoq, ilisimatitsissutigineqarpoq.
Lisathe Møller pillugu paasissutissat:
- Lisathe Møller (Maniitsumi 1973-imi inunngortoq) Ilisimatusarfimmi Oqaatsinut, Atuakkiornermut Tusagassiuutinullu tunngasuni qaffasissumik ilinniagaqarsimavoq.
- Saammaateqatigiinnissamut Isumalioqatigiissitap oqaluttualiassanik 2016-imi unammisitsineranut peqataavoq, oqaluttualiarlu Eqqarsaatit silarsuaat, sittartorlu ajugaassutigaa.
- Lisathe Møllerip atuakkiaa Qinngusersaarfik, oqaluttualianik arfineq-pingasunik taallinillu 44-nik imalik, 2019-imi saqqummerpoq.
- Lisathe Møllerip atuakkiaa siulleq Qaamarngup taartullu akisugunneri 2024-mi saqqummerpoq.
Najoqqutaq: Nunani Avannarlerni Suleqatigiinneq
