Maasi Qeqertarsuarmiu

Taanna saattuanik uumasunik 1.600 kilonik oqimaassusilinnik avammut tunisassanik Air Greenland timmisartuussisoralugu Danmarkimi akitsorterivimmut nassiussisuuvoq.

Namminersorluni timmisartortartutut ilinniarsimavoq Maniitsumilu timmisartoqarfimmi pisortaanikuulluni. Ullumikkut namminersortuuvoq. Nukappiaraalluni timmisartortartunngorusunnikuuvoq.

44-nik ukiulik Mads Petersen siunnersuinermut suliffeqarfimmi pilersinneqaqqammersumi Nutaaq Seafoodimi, aalisartut pisaminnik avammut tunisinissaannut ikiuisartumi, aallarniisuuvoq.

Angut ulapaartoq suliarpassui paasisaqarfigineruniarlugit AG-mit naapipparput.

Mads Petersen 1981-imi juulip 21-ani Qeqertarsuarmi inunngorpoq. Ataataminit - Ujuunnguaq Henningsenimit - pingasunik qatannguteqarpoq. Arnaa Dorthe Johansen angutissaalu nunaqarfimmut minnerusumut nuuttussanngormata Mads aanamini aataminilu Qeqertarsuarmiiginnarniarluni aalajangerpoq.

- Aatama kajumissaarpaanga. Ilinniagaqarluarnissara pingaartippaa, Mads Petersen oqaluttuarpoq.

- Ilinniarneq inuunermi angusassat pingaarnerit ilagimmassuk pingaaruteqartoq ilinniartippaanga. Tamanna ullumikkut qitornannut ingerlateqqinniarsaraara, oqarpoq.

Arsaq qerisoq

Qeqertap Nunatta kitaaniittup sineriaata kujataatungaani meeraanermini timersorneq, nuannaarneq ataatsimoornerlu assut aalluppai.

- Arsartarlungalu, ujakkaartarlungalu, taekwondortarlungalu, assammik arsartarlungalu sulorartarpunga. Illoqarfitsinni sunaluunniit aallartinneqartoq peqataaffigisarpara, oqaluttuarpoq.

Arsarnerli aallunneruaa. Sila qanoq ikkaluaraangalluunniit – arsaq qerigaluaraangalluunniit – ikinngutinilu arsaaffimmi akunnerpassuit unammerujoortarput.

- Unammigaangama arlaatigut qisuariartarama. Nuannareqaara. Unamminermik nuannarisaqannguatsiarpunga. Imminut piumaffiginissaq nuannaraara, Mads Petersen eqqaamasarsorpoq.

Atualeqqaarnerminiit 11. klasse ilanngullugu meeqqat atuarfianni ”Qeqertarsuup Atuarfia”-ni atuarttarlunilu inersimasunngoruni timmisartortartoorusuppoq.

- Meeqqat atuarfiat uannut pingaaruteqaqaaq. Ilinniartitsisugissaarlutalu atuaqatigiittut ataqatigiilluarpugut, oqaluttuarpoq.

Mads Petersenip aanaava aataavatalu timersornernermik soqutigisaqarnerani, ilinniagasserinerani inuunermilu aqqusaagassani tamani tapersersortarpaat.

Meeqqat atuarfiat naammassingajaleraa aataava asasaa toquvoq. Inuuneq Madsip inuusuttuaraasup naatsorsuutiginngisaanik allamut ingerlavoq. Ukioq 1997-iuvoq.

- Aanannut assut sakkortuvoq, inuunerlu allanngorluinnarpoq, Mads Petersen oqaluttuarpoq.

Tamanna qanoq nammineernissaminik ilikkartariaqarneranik kinguneqarpoq. Illoqarfimmini ruujorilerisuni sulilerami nerisassani ineqarnermullu aningaasartuutini nammineq akilertarpai.

- Allat isumalluutiginagit imminut isumaginissara ilikkarpara, oqarpoq.

Atuarnermi paarinissaa sakkortugaluartoq meeqqat atuarfiat naammassigamiuk Danmarkimut efterskoleriarusuppoq. Ukioq 1998-iuvoq.

Angerlartitaasoq

- Oqarnittuut aanaga pikkunartorsiorami efterskolemut aningaasartuutit akilersinnaanngilai, taamaammallu angerlartitaavunga. Nuannarigaluaqaara, Mads Petersen oqaluttuarpoq.

Ajunngilaq, Qeqertarsuarmut uteqqippoq.

Suna ilinniarfigissanerlugu paasiniarlugu illoqarfimmi ukiut marluk sulivoq. Timmisartortartunngorniarnissaq eqqarsaatiginngilaa.

- Imarsiornermik misilittagaqanngiivikkaluarlunga aalisartunngoriataarpunga, oqarpoq.

Madsi meriutarereerluni kajumissuseqangaarnerminik umiartorneq arriikkaluamik sungiukkiartorpaa. Ukiorpassuarni aalisartuuvoq.

Imerissut. Qeqertarsuup Tunuani qeqertaqatigiit ukioq 2004.

Madsi ikinngutinilu aalisarlutik saattuarniarput. Raatiu ikumavoq KNR-ikkullu radioaviisi aallakaatinneqarpoq. Saattuat tunineqarnerminni kilomut tunngaviusumik akii 4 koruuninik qaffanneqartut nutaarsiassat ilagaat. Ingerlaannaq atuutilersumik.

Madsi ilanilu saattuanik usisut nuannaajallaqaat. Aamakorsuit.

- Akit taamanili allanngungaarnikuunngillat. Aalisartut nioqqutiminnut aki qaffasinnerusoq pissarsiarisinnaaniassammassuk tamanna Nutaaq Seafoodimik aallarniininnut pissutaasut ilagaat, oqaluttuarpoq.

Aalisartuunera inuuneranut sunniuteqangaatsiarpoq. Aalisartunik piniartunillu ataqqinninnera pingasoriaatinngorpoq, attatiinnarpaalu.

Ukiualuit aalisartooreerluni allamik misiliisussanngorpoq.

Mads Mittarfeqarfinni sulilerami kingorna Qeqertarsuarmi qulimiguulinnut mittarfimmi aqutsisunngorpoq. Timmisartortartunngorusunnera uteqqippoq.

Madsi Nuummi politiinngorniaraluarami imminut naleqqutinngimmat 2004-mi assartugalerisunngornialerpoq.

Arraa.. ilinniarnertuunngorniarfimmi? 

Nuummili suliffimmik misiliiffissaqanngilaq. Ajunngilaq. Madsi pineqaatissinneqarsimasunut inissiisarfimmi sulilerami ukiut marluk tassani sulivoq.

Aataavatali siunnersuutaa suli eqqaamavaa. Ilinniagaqassaaq.

- Ilinniarnertuunngorniarfimmi misiliutaasumik ilinniartitsinermi ilinniartuugama 2008-mi ilinniarnertuunngorpunga. Nuummi ilinniarnertuunngorniarfimmi misiliutaasumik ilinniartitaasuni siullersaavugut. 32-iulluta aallartikkatta 32-iulluta naammassivugut, tulluusimaarluni oqaluttuarpoq.

Mads Petersen ilinniarnermi saniatigut namminersortutut taxartartuuvoq.

Ilinniarnertuunngoqqammerlunilu anguniagaqarusussuseqarluarluni aasit tulliani sussanerluni nalornivoq. Taavami?

Mittarfinnut uteqqippoq. Kingorna AFIS-operatøritut ilinniarpoq. Timmisartortartup paasissutissat isumannaatsumik timmisartuussinissaminut atugassai AFIS-operatørip tunniuttarpai.

2013-imi isumannaallisaanermut siunnersortinngorlunilu isumannaallisaanermi akisussaasunngorpoq, kingornalu Maniitsumi timmisartoqarfimmi pisortanngorpoq.

Mads Petersen pisortatut atorfeqarnermi saniatigut timmisartoqarfimmi qatserisartutut ilinniarpoq. Ilinniakkani qaffassarlugu Århusimi pujorsiortutut aamma ilinniarpoq. Mads Petersenittaaq pisortatut atorfeqarnermi saniatigut Maniitsumi qatserisartoqarfimmi upalungaarsimanermut aqutsisunngorpoq.

Mittarfeqarfinni Nuummi, Paamiuni, Narsarsuarmi, Maniitsumi, Stauningimi Koldingimilu mittarfinni AFIS-operatøriunermi saniatigut 2008-miit 2017-imut Nuummi, Narsarsuarmi Maniitsumilu qatserisartuuvoq.

Mads Petersenip namminersorluni suliffeqarfiutini Arctic Unmanned aqqutigalugu 2016-imi dronenik ingerlatsisunngorpoq.

Timmisartortartunngorusunnini piviusunngortikkaa

Danmarkimi timmisartortartunngorniarnissaminut 2018-imi akuerisaavoq. Inooriaaseq kulturilu allarujussuit. Taamanili Danmarkimi najugaqarpoq.

- Namminersorluni timmisartortartutut allagartara ernerma inuuiani tiguara, Mads Petersen oqaluttuarpoq.

Coronap tuniluunnerata nalaani allarpassuit assigalugit soraarsitsiortornerit ikilisaanerillu misigai.

Taavami? Mads Petersen maanna eqqarsaqqittariaqalerpoq.

Taamaalilluni Billundimi Maersk Air Cargo-mi sulilerami nunanit allanit Danmarkimut eqqullugit assartukkanut tamanut akisussaasunngorpoq.

Piffissami tassani Nutaaq Seafood Aps pilersippaa.

- Aalisakkanik qaqerlaanik nunanut allanut assartuineq suliarerusupparput, Verner Hammekenilu 2024-mi suliffeqarfimmi piginneqataalerpoq, oqaluttuarpoq.

Aallaqqaammut saattuanik uumasunik 1.600 kilonik oqimaassusilinnik Air Greenlandimit Danmarkimi akitsorterivimmut timmisartuunneqartunik avammut tunisinermut atatillugu ikiuuppoq.

- Ingerlalluarpoq, nuannareqaarpullu. Ingerlatsivimmik aallartitsinissatsinnut kajumissaarneqarpugut, kingornalu Nutaaq Seafood aallarnerparput, oqaluttuarpoq.

- Suliniut annerumaartoq qularnanngitsumik Kalaallit Nunaannut iluaqutaasussaq ingerlatileruttorparput, sukumiinerusumik eqqartorsinnaanngilara, kisianni upernaamut qilanaarpugut, Mads Petersen oqarpoq.

Mads Petersenip sulinngikkaangami aappani ernertillu ilagalugit angalaneq nuannarisuuaa. Katillugu tallimanik qitornaqarpoq.

- Nunat allat tikillugit kulturiat inooriaasiallu paasisaqarfigissallugu nuannaraarput. Billundimi timmisartoqarfimmiit 20 minutsinik ungasitsigisumi najugaqarpugut, nunanullu allanut sapaatit akunnerisa naanerini ullualunni angalasaratta sulinngiffeqartarattaluunniit tamanna uagutsinnut iluaqutaavoq, Mads Petersen oqaluttuarpoq.