Nukappiaraq 12-inik ukiulik Kangerlussuarmiit Sisimiunut – utimullu nammineq qimussertoq
Salik Andreassen aqqaneq-marlunnik ukiulik poorskikkunni immikkut ittumik misigisaqarpoq. Taannami Kangerlussuarmiit Sisimiunut nammineq qimusserpoq. Utimullu arni ilaasoralugu Kangerlussualiarlutik.
Salik Andreassen aqqaneq-marlunnik ukiulik, Kangerlussuarmut ingerlaallutik.
Assi: Arnarulunnguaq Andreassen
Salik Andreassen aqqaneq-marlunnik ukioqartoq nammineerluni Kangerlussuarmiit Sisimiunut utimullu qimusserpoq.
Aqqutaani arnaq qimussertartoq ingiaqatigaa, isumannaatsumik angalanissaa qulakkeerniarlugu.
Kangerlussuarmiit Sisimiunut apuutereernermi kingorna Saliup arni, Arnarulunnguaq Andreassen ilaasoralugu Kangerlussuarmut angerlarlutik qimusserput.
Arni ilaasoralugu.
Assi: Arnarulunnguaq Andreassen
- Kissaatigisorujussuugamiuk Kangerlussuarmiit Sisimiunut qimusserusulluni. Ingerlaannaq akuersivunga, arnaa Sermitsiamut oqaluttuarpoq.
Ilaqutariit nammineerlutik ATV-eerlutik snescootererlutillu Sisimiuliarput, poorskisioriarlutik. Tassani Salik nammineerluni qimusserpoq.
Salik Andreassen tallimat arfinillillu akornanni ukioqarluni Aasianniillutik qimmitaaqqaarpoq. Kangerlussuarmullu nuukkami Francisca Davidsen Olsenimit qimminik arfineq-marlunnik tunisippoq, tamanna siorna novembarimi pivoq.
- Nammineq qimusserneq ilinniarpaa. Sisimiunut qimusserami nutaqqat sisamat utoqqaallu qimuttorai, Arnarulunnguaq Andreassen oqaluttuarpoq.
Killitsittoq
Angalanissamut piareersarnissaarsuaqarpoq, Salilli angalanissaminut qilanaarpoq piareersarluarlunilu. Sisimiunut ajorani tikimmat anaanaa nuannaangaarami qiavoq - killitsilluni.
Salik Sisimiunut tikittoq.
Assi: Arnarulunnguaq Andreassen
Kangerlussuarmut arni ilaasoralugu angerlarput - aqqutaali oqitsuinnaanngilaq.
- Aputaarutiivingajassimagami, qimmillu qimmukajaakkut sungiussisimannginnamik, sakkortuvoq. Apuuppugulli. Maannakkorpiaq Kangerlussuarmut qimussertoqarnissaa innersuussutiginngilara aputaarutiivingajassimammat.
- Aasaavoq, Arnarulunnguaq Andreassen oqarpoq.
Assi: Arnarulunnguaq Andreassen
Salik nammineq oqaatigaa aqqutaani nuannisarsimalluni. Ittoqutinilu Sikkamik ateqarnerarpaa.
Aqqutaani unillatsiarnerit pilersaarutaavallaanngitsut pipput - ittoqutaa qimmeqatiminut nipitaqattaarami.
Aqqutaani ittoqutaa qimmerlu alla nipitartut.
Assi: Arnarulunnguaq Andreassen
Salik Andreassen anaananilu Sisimiuniit apriilip 21-anni aallaramik Kangerlussuarmut apriilip 23-anni apuupput.
