Nuuk Snow Festival: Kipparissut angisuut qerisut ilusilersuganngoraangata
Inuit apummik Katuap saani alutornartunik ilusilersuinerat sapaatip tungaanut takuniarneqarsinnaavoq.
Aallaqqaammut kipparissorujussuaq kisimi takussaavoq, taavali Kêrte inuusuttullu ulappuserput.
Alle fotos: Oscar Scott Karl
Nuuk Snow Festivaleqarnissaa sioqqullugu Nuummi februaarip aallartinnerani issangialermat kajumissutsiminnik sulisut ilusilersuisussallu isumakululeraluarput.
Qujanartumik sila allanngoqqippoq, sisamanngormallu ukioq manna festivali pilersaarut malillugu aallartippoq. Apummik kipparissuliat angisuut Katuap saani pisuinnaat aqqutaani ilusilersorneqalerput.
Taamaalilluni festivali 1994-imi aallarteqqaarfimmini pivoq, tassa Katuamiit pisoqaanerulaarlunilu.
Festivali Nuutoqqami ingerlanneqartaraluarpoq. Aaqqissuussarli illoqarfiup ilaanut nalinginnaasumut akuutinneqaruni pitsaanerussasoq aaqqissuisut aalajangerpaat.
Borgmesteri Avaaraq S. Olsen (IA) tikilluaqqusivoq peqataasunut aningaasaliisunullu tamanut qujalluni.
Amerlasuut peqataaniarlutik nalunaarsimapput, ingammik ilinniarfinneersut allaallu Finlandimeersut nalunaarsimallutik. Taakkuli alakaanitsinni najuutinngillat. Ilinniarfissuaq arlalinnik peqataatitaqarpoq.
Assimi ataani Kêrte Jeremiassen, Kommuneqarfik Sermersuumi meeqqanik inuusuttunillu ulluinnarni sullissisoq, nivassuataartoq takuneqarsinnaavoq.
Kêrte ikiortinilu inuusuttut qanga angakkut isumassarsiorfigalugit putuliorput.
– Iluaniitilluni ilimmartarpoq. Tamannalu ukioq manna qulequtarineqartumut, tassa silamut, naapertuuppoq, Kêrte nassuiaavoq.
- Silataa ullorissanik, nuianik, seqinermik qaammammillu assigiinngitsunik pinnersaaserneqassapput, ilanngullugu oqaatigaa.
Sisamanngornermi ualikkut maaniinnitsinni amerlanerit ilusilersuillutik aatsaat aallartilaarput, soorlu assimi ataani takuneqarsinnaasoq sakkut assigiinngitsut nivaattallu atorneqartut.
Sapaatip tungaanut assigiinngitsunik aaqqissuussaqartarluni ilusilersuineq ingerlanneqassaaq, tassanilu dommerit tallimat ukiumi ilusilersugaq kusanarnerpaaq toqqarumaarpaat.
Visit Greenland naapertorlugu Nuuk Snow Festival tiingalerlaanut alakkassallugu tulluarpoq. Aaqqissuisoqarfiulli ajoraluartumik tamanna uppernarsarsinnaasimanngilaa. Atuartartutsinnulli isumassarsiatut ingerlateqqipparput.
Festivalimut pilersaarut tamakkiisoq nittartakkami snow.gl-imi takusinnaavat.
