Nuummi eqqumiitsuliornikkut kulturikkullu ulluni sisamani pikialaartitsisoqarnissaa piareertoq
Illoqarfiit pingaarnersaanni Suialaa Arts Festivaleqarnerani Issittumeersut Nunanilu Avannarlerneersut tusarnaartitsillutik, isiginnaartitsillutik isumasioqatigillutillu oktobarimi ataatsimuussapput.
Suialaa Arts Festival – siornatigut Nuuk Nordisk Festivalitut atilik – sapaatip-akunnerata tulliani pissaaq.
Assi: Visit Greenland
Suialaa Arts Festival oktobarip 23-aniit 26-anut ingerlanneqarnerani isiginnaartitsinerit, tusarnaartitsinerit, qitinneq, saqqummersitsinerit, atuakkat workshoppillu illoqarfimmi sumi tamani pissapput. Pikialaartitsineq Nuuk Nordisk Kulturfestivalitut siornatigut ateqarpoq.
- Eqqumiitsuliortut Nunanit Avannarlerneersut Issittumeersullu naapeqatigiillutik paasisaqarusunneq ataatsimoornerlu qitiutillugit isumassarsioqatigiissinnaanerat pilersikkusukkatsigu, Sikkerneq Hvistendal Egede oqarpoq.
Tusaamasat oqaluttuallu nutaat
Kalaallit nunanilu tamalaaneersut tusaamasat aatsaallu tusakkat appisimaartussat ilagaat. Tusarnaariat Torluut!, Nive & The Deer Children, Ánnámáret Finlandimeersut aamma erinarsortartoq sami Ella Marie Hætta Isaksen nipilersoqatigiinni ISÁK-mi erinarsortutut tusaamasanngortoq ilaatigut tusarnaariarsinnaavaat.
Pikialaartitsinermi isiginnaartitseriaaseq nutaaliaq, ilaatigut isiginnaagassiaq Kiurnaq, arsarnerit pillugit oqaluttuanik Alaskameersunik, Kalaallit Nunaanneersunik, Canadameersunik Sápmimeersunik katersukkanik isiginnaagassiaq takuneqarsinnaassalluni.
- Suialaa pikialaartitsinerinnaanngilaq - nipit oqaluttuallu uagut silarsuatsinnik ilusiliisut pillugit nalliuttorsiorneruvoq, Sikkerneq Hvistendal Egede oqarpoq.
Pikialaartitsineq NAPA-mit – Nunani Avannarlerni Piorsarsimassutsikkut Attaveqaammit aamma Kommuneqarfik Sermersuumit aaqqissuunneqarpoq, pilersaarutillu uani takuneqarsinnaapput www.suialaa.gl
