Nuummi skakkertartut Islandilialersut

Skakkertartut tallimat Nunatsinneersut Islandimi skakkernermik unammisaqattaarnermi Reykjavik Openimi peqataassapput.

Skakkertartut tallimat Nunatsinneersut Islandimi skakkernermik unammisaqattaarnermi Reykjavik Openimi apriilip qulingiluaannit 15-iannut peqataassasut, Nuuk Skakklub nalunaaruteqarpoq.

Skakkertartut Islandilialersut tassaapput Thomas Thorleifsen, Mikael Mikiki, Niels Kristian Skou, Bo Top Fisker aamma Brian Biilmann.

- Nunanit assigiinngitsorpassuarneersunut unammisartunut unamminerit qaffasissumilu unamminerit, ilaasortatsinnut tamatigut ilinniarfiulluartarput, Malik Brøns, peqatigiiffiup siulittaasua oqarpoq.

Nuummi Skakkertartut peqatigiiffiat ukiut pingajussaanni Islandimi unammisaqattaarnermut peqataassaaq, Canadamiullu suliffeqarfiutaat Amaroq Minerals angalanermut tapiissuteqarsimasut ilagaat.

Skakkertartut peqatigiiffiata neriuutigaa, ukiut allortarlugit aaqqissuunneqartartumut skak-olympiademut, Uzbekistanimi pisussamut aappaagu peqataasinnaassallutik. Tamatuma piviusunngortinniarnissaa suliassaavoq angisooq, taamaattorli peqatigiiffiup qanoq iliortoqarsinnaanersoq misissoraa, siulittaasup ilisimatitsissutigaa.