Pinngortitami nipaalluinnartumeereerluni illoqarfimmut pisorpaluttumut uterneq

Pinngortitami nipaalluinnartumiillutit takorluulaaruk. Imarsunnialaami, paarnaqutersunnialaami, nunasunnialaami oqquartumilu anorsaartumi. Nalunaaqutaq naalagarinngilluinnarlugu kiffaanngissuseqarujussuarneq misigalugu, ataatsimuualaarnissarlu kisiat qitiutillugu asimiillutit takorlooriassagit.

Sevarina Enoksenip ukioq manna sapaatip akunneri marluk missaanni aavarnerminni qanoq misigisimanini taama oqaluttuaraa.

- 16-iulluta Itinnerup Tasersuaani aavarlutalu tupeqarfeqarpugut. Ulluni taakkunani nuannisaqatigiissuaarpugut, Sisimiormiu Sevarina Enoksen oqarpoq.

Taassuma aappani panitsillu arfineq-pingasunik ukiulik, angajoqqaani, atsani, akkani taakkununngalu aappaasut qitornaallu, qatanngutini illooqqanilu aggustip aappaaniit 13-iata tungaanut pisarnermisut aavaqatigai.

- Aatakkukka meeraallungali aavaqatigisarpagut. Sivittajaamik asimiinneq sungiutiinnarnikuuara, Sevarina Enoksen oqarpoq.

Sevarina 33-nik maanna ukioqarpoq, aappani panitsillu Niviâna qulingilualiingajalersoq Sisimiuni najugaqatigai. Niviâna aalajumatullunilu asimiikkumatuvoq. Taamaammat immap sermersuullu akornanniittuusumi sapaatit akunnerini kingullerni Itinnerup Tasersuaaneeqatigiinnerat Niviânamut immikkut aamma misigisaqarfiuvoq.

Perngartoq

Ukioq manna aavarnerminni tuttumik aamma perngarpoq – tamannalu ilaqutariit tamarmiullutik puigunngisaannagassaminnik misigisaqarfigaat.

- Misigisaq tupinnaqaaq, nuan! Perngartama nulorsui nalliukkuma kaffilliutigissavarput, hahah! Sinnera qeritissavarput piumalleraangami mamarinerpaasama ilaannik, tassa tuttup neqaanik suppatortarniassagatta, Niviâna Hammeken aavaqqinnissaminnut qilanaalereersimasoq oqaluttuarpoq.

- Ullorpaalunni asimiinneq nuannarersuaarpara, aappaagulu aavaqqinnissatsinnut aallaniaqqinnissannullu qilanaarpunga, taanna oqarpoq.

Niviânap angajoqqaavisa perngartaanik aattuisuupput, misigisarlu tamanna angajoqqaavinut aamma immikkuullarilluinnarsimavoq.

- Soorlu tassa tuttumik aatsaat taama immikkuullaritsigisumik aattuilluni, killitsinnartorujussuullunilu. Panima takummanga nuannaangaarami qullipittuinnaavoq, Niviânap arnaa Sevarina Enoksen tulluusimaaqaluni oqarpoq.

Tuperminnut uteramik Niviânap aanakkui aatakkuilu persuarsioqalutik aningaasanik mamakujuttunillu aamma paggatsitsipput.

Toqqissisimaffigalugulu ilitsoqqussarigaa 

16-iullutik sapaatit akunnerini marlunni aavaqatigiinnertik Sevarina Enoksenip immikkorluinnaq toqqissinartumillu misigisaqarfigaa.

- Soorlu tassa nunamut amigaateqarfiunngitsumut pilluni, itisuumik anersaartorsinnaalluni, aamma sunut tamanut angumersiniaannaavittutut pinanga silasilerpunga. Pilluarsuaarlungalu toqqissisimarsuaarpunga, taanna oqarpoq.

Sevarina aanakkunilu aavarfigisarnikuusaminnut peqqikkami aamma aliannaarpoq.

- Meeraaninnut utersaarpunga. Sivisuumik asimiinneq qanoq nuannertigalunilu toqqissisimanartigisoq eqqaavara. Siuaasagummi nalunaaqutaq naalagarinnguarnagu aamma pilisarnikuupput. Nuannersuaarpoq, Sevarina Enoksen oqarpoq.

Aavarneq taassumunnga aavarnerinnaanngilaq. Ilitsoqqussanimi tamanna meeqqaminut aamma ingerlateqqikkusuppaa. Qitornanimi pinngortitamik mianerinninnissamik pisanillu avitseqateqarnissamik ilinniartikkaangamiuk, kalaaliussutsitsinnik suminngaanneersuunitsinnillu aamma ilinniartillugu misigisarpoq.

- Kalaallit ileqqutoqqatsinnik ingerlatitseqqiinissara pingaartippara. Kinaassutsitsinnummi kinguaariinni amerlasuuni atajuarsimasuusumut ilaalluinnarmat. Kalaalimerngimmi ileqqutoqqavullu timikkut tarnikkullu pinngitsoorsinnaanngilavut, taanna oqarpoq.

Pisorpalummut utertut

Ilaqutariit pinngortitami nipaalluinnartumeereerlutik illoqarfimminnut pisorpaluttumut inuaqerpaluttumullu uteqqammersimalerput. Sevarina puullaaqeqqajaanini malugisinnaavaa. Aavarnerminni eqqissisimaarneq, qanilaarneq tuaviuuteqannginnerlu misigai – tassa illoqarfimmini atugaat allarluinnaapput.

- Uissanngungajaannarporluunniit, soorlu tassa anersaartorpiarsinnaanani. Puullaaqeqqajaallunga malugisinnaavara, soorlu taamaannerlunga nassuiaruminaatsippara. Immaqaana pinngortitamiinnitsinni pilluarsimangaarama toqqissisimasimangaaramalu inuiaqatigiinnut akuliuteqqinnera sakkortunaariga, Sevarina Enoksen oqarpoq.

Aavarneq pilinerlu ileqqutoqqatsinnut ilaaginnarnatik inooriaatsitsinnulli aamma ilaalluinnartut taanna isumaqarpoq. Ileqqutoqqatta ulluinnatsinni suli atugaanerat inuiaqatigiinni tusarnissaa amigaatigisarpaa. Taakku isumassarsiorfigineqarsinnaallutillu misigisassarsiorfiusinnaasumillu inissaqartinneqarsinnaakutsoortut isumaqarami.

Pilineq, pinngortitamik mianerinninneq inuiaqatigiittullu ukiuni untritilikkuutaani pingaartitatta ingerlateqqinneqartarsimasut atuartunut ilinniartitsissutaasalernissaat aamma neriuutigaa.

- Kalaallit namminiilivinnissamik taamaallaat anguniagaqanngillat. Ileqqutoqqatta attannissaat qulakkeerniarutsigu meeqqat atuarfiini ilinniartitsissutigineqartalertariaqaraluarput, taanna oqarpoq.

Illoqarfimmi inuuneq pinngortitami misigisimasaminut assingunerulersinnaasutut Sevarinap takorloorpaa. Inuiaqatigiit kalaallit ileqqutoqaannik killilimmik pissuseqaannarani, ulluinnarnili inuunermut tunngaviusunngorsinnaasutut takorloorpai. Inuiaqatigiit aaqqissuussaanerat allaanerulluinnartoq, siuaasatta iliusaannut inissaqartitsisut.

Takorluulaaruk.