Københavnimi Tivolimi sisamanngornermi unnukkut qiimmassimaartoqalaavippoq.
Soorlulusooq inuppassuit erfalasut naasullu sikkersitersimasut akornanni nikorfasut pisarnermit qilanaarnerusut. Tassa Plænemi inuit hunnorujukkuutaat utaqqerrapput. Kalaallisut qallunaatullu oqalorrapput, ataasiakkaallu tuluttut oqalullutik – tamarmilli scenemut sammerrapput. Arfineq-marlunngungajalerpoq. Kalaallimmi nipilersortartut DDR-ikkut, tassa Disko Democratic Republicikkut, appinnissaannut minutsit 13-iinnanngorput –taakkualu sivisuumik tusarnaartitsinikuunatik tassa appittussanngorput.
Appittussat angutit sismaasut eqqissiivillutik aammali piareersimarpaseqalutik scenep tunuaniipput. Iikkat qernertut, kabelit, karsit puiaasat akornanni nikorfapput. Taakkunannga marluk DDR-imi nipilersortartutoqaapput, sinnerili nutaajullutik tassaasut: Hans Pavia Petersen, HP-mik ulluinnarni taaneqartartoq, aamma Lars Sørensen.
Pissangarsuaartoq
HP tallini paarlallugit nikorfavoq timinilu eqisartillugu qiiaammisutullusooq illuni. Qiianerulli pianiunngitsoq pissanganerulli pianik taamaaliorpoq.
- Sapaatip akunnera naavara uniffeqaavinnanga, taanna oqarpoq peqqusiilerpasilaartutullu isikkoqarluni qungujulluni.
Taassuma Ib ullualuit sioqqullugit sianerfigaa aperalugulu saneqqutilaarsinnaanerluni. Imaanngitsoq sungiusariarusukkami, ornilaaginnarusuppaali. Tuallakkumalluni, eqqarsaatinilu allamut saatilaarumallugit.
- Misigigama suut tamaasa uippakajaassutigalugit. Ima pissangatigaanga, allaat aqajannguummerujussuartaarlunga.
DDR-ikkut Københavnimi Tivolimi tusarnaartitsisut.
Assi: Martin Christiansen
Ib-ip HP nangaarianngivilluni akueraa. HP-mmi sigissutsit aqqusaagai ilisarai. Nipilersornermi ulluinnarnilu pisartut imminnut kallussuuppallaaleriaraangata qanoq misiginarnersoq nalunngilaa. Ib-ili unnuk taanna eqqissisimavoq. Piareersimarpaseqaluni isigassorfiit, mikrofonit nipilerinermullu atortut akornisigooqattaarpoq.
Lars Sørensen aamma pissangavoq – qasullunilu. Nulianimi Isaksen Designimik piginnittuusoq Tivolimi saqqummersitsivissaanik ullaakkut arfineq-pingasunulli piareersaaqatigalugulu tassani ikiorsimavaa, saqqummersitsiviallu ullaarnganiit ornigarneqarsimaqaluni.
- Appinnissattaluunniit eqqarsaatiginissaa piffissaqarfigerpiaavinngilara. Allaat tumerparpaat atugassakka nammineq piginngilakka – Tivolip pigai. Issiaviga aamma nassanngitsoorpara! Puullaaqinalaarpoq...
Ileqimisaarpoq illarlunilu – katuutilli inaalimmagit assai sajulaarlutik.
Puiaasaaqqat aarlorukkaat
DDR-ikkut ukiorpassuarni nipilersoqatigiiullutillu nunatsinni ilisimaarineqaraluarput, taamaakkaluartoq nuimaniartuunngillat. Nipilersuutitik tummeqqatigut nammineq majuuppaat, kabelitik nammineq aaqqissuuppaat qanorlu iliornissartik appinngilaattaa isumaqatigiissutigeqqaarlugu, soorlu: Anda sikiimilertoriarpat, "Sivittorpoq" appissavarput? Imaluunniit imminnut qissimeqqaassappat?
Aamma allanik ileqqoqarput. Tassa appinngilaattaa pujortaqqaapallalaartarpu, appittussallu taamaallaat pujortarfigeqqusaanni taamaaliupallalaarput – Tivolimmi sinnerani pujortartoqaqqusaanngilaq. Qillertuusarmiunik immiaarartulaarput. Quiasaalaarput. Appinngilaattaalu ileqqumisut tamarmik immikkut puiaasarmiuaqqamik Underbergitorput. Puiaasaaqqat taakkua agguaateriarlugit pisaasertik aalajangersimasoq malillugu aarloruppaat, qanorlu iliortarnerlutik Andap ima nassuiaateqqissaarpaanga:
- 45 gradinngorlugu uerteriarlugu imissavat. Taava aqqanileriarluni puaasarpaloreeraangat nunguttarpoq.
Sisamaallutik Underbergituutereernermi kinguniatsiannguagut eqillutik iloqqasunngorput. Anda taava oqaaseqarpoq:
- Sungiusareerpugut. Sapinngilagut. Nuannisakutsuuinnassaagut.
Taava tallini qullariarlugit scenep tungaanut aallarpoq – tassalu tusarnaartitseriaannanngorput.
Tusarnaartitsinerat ataatsimoorfiusoq
Seqerngup scenep saamiatungaa qinnguaa, aamma Tivolip sinnera uisorilasutullusooq isikkoqalersillugu. DDR-ikkut - eqqissisimarpaseqalutik appinnissaminnulli aamma piareersimarpaseqalutik - saqqummermata, tusarnaariat nuannassuaarput.
Tassalu appiinnaqaat. Nuna sajutsittutullusooq illugu piffissarlu eqqoqqissaarlugu qiimarpaseqalutik appipput. Nipilersugassiatik nutaanik perngaammillu tusarnaartitseqatigisaminnik nipilersoqateqarlutik atorpaat. Anda guitari ersullugu saarliuvoq, pisarnermisullu qungujulalluni. Sungiussisimarpaseqaluni nipilersoqatiminit ingiorneqarluni tusarnaartitsinerminni aqutsisuuvoq. DRR-ikkut ukiorpassuarni bassertuat Ib Uldum aamma eqqissisimarpasippoq. HP sikiiminertoqarnissaanut malinnaaqqissaarpaseqaluni quitarertuuvoq Lars Sørensenilu uummaareqaluni torallaalluinnarlunilu tumerparpaartuulluni.
Imminnut qissimillatsiartarput. Qungujulapput nipilersukkatillu akuttoqatigiissaarneri malillugit ileqimisaallattaarlutik. Sisamaallutik nipilersoqatigiiginnanngillat, oqaloqatigeerujoortutullumisooq aamma ipput – taakkunannga marluk nukariiupput nipilersukkaminnik ilisimaarinnilluartut sinnerilu aamma marluusut inissaminiilluinnarpasillutik oqimaatigiissumillu appisimaaqataallutik DDR-ikkunni nipilersoqataasalerlaajupput.
- Sungiusareerpugut. Sapinngilagut. Nuannisakutsuuinnassaagut.
Assi: Martin Christiansen
Nipilersugassiatik ilisimaarineqarluartuusut nutaanik ilaartullattaarlugit appisimaarmatikkit tusarnaartuminnut nuannisartitsilaavissorput. Nipilersugassiatik allanngortingaarsimanngikkaluarpaat, qiimarpaseqalutilli tassa appisimaartarpaat. Tusarnaartitsinerminni torrallaarujussuarput – uummaarissuaarlutimmi, sapiissuseqarlutik imminnullu tapersersoqatigiippaseqalutik appisimaaramik.
Isumaqatigiissutertik eqquutinngiinnaraa
Kisianni pisoqariataarpoq: Andammi Gasolinikkut nipilersugassiaat kalaallisuunngortillugu nammineq suliartik, tassa "Kap Farvel til Ümanarsuaq" aperatarpaa, naak unnukkut taanna appinniarnagu aalajangiusimaqqissaarsimagaluaritsik. Nipilersuusiartimmi taanna pillugu politikkikkut isummat assigiinngissinnaaqimmata appinniarnagu aalajangersimagaluarput.
- Qiviarakku qungujuinnarpoq. Nukillalaajummerfigaara, Ib oqarpoq qungujuusaarlunilu.
HP Larsilu akunnattuullatsiariarlutik susoqarnersoq paasilertorpaat. Anda tassa aalajangeriataarsimasoq paasivaat – maleruutiinnarlutillu. Tusarnaartuisa qiimmatsaatigaat. Tupaallatsitsilaavissorunarput.
Aammali ilimagineqapajaareerunarluni taamaaliussaqqaartut.
- Andap tusarnaartitsinermi tupaallatsitseriartaarumatuujugami qanoq ilioriataarsinnaanera nalunapajaartuaannarpoq, HP Larsilu qungujuutigalutik ataatsikkut oqarput. Taamaaliornissaanullumi tusarnaartitsinissaminnut nipigissaanerminni pasitsamisaareersimasutut ippasipput.
Apeqqillutillu assileqatiseriumaneqaqattaartut
Nalunaaquttap akunnerani tusarnaartitsilaavissoreeramik scenemiit aqqarput. Kasuupput, tuimikkut imminnut pattalaallattaarput qungujulaqalutillu. Tusarnaarialli aammaloortorlutik appeqquseqqusisaqattaarput. Taava DDR-ikkut scenemukaqqeriarlutik appeqqipput –appisimaagatillu suli naanngitsut erinnamik allamik torrallaalluinnarlutik appittarput.
- Kukkuluttulaarpugut, Lars kingorna oqarpoq.
Andap ima akivaa:
Kalaallit Nunaat Tivolimi ukioq manna aaqqissuunneqarnerani inunnik ulikkaarpoq.
Assi: Martin Christiansen
- Aap, tusarnaartulli nuannisarsuaarput – tamannalu pingaarnerpaavoq.
Tusarnaartitsereeramik nipilersuutitik poortorpaat. Tusarnaartitsereernerummi kingorna nipilersuutinik aqqussugassaqartuaannarpoq, torersagassaqartuaannarpoq atortullu ajunnginnersut paasiniarlugu misissugassaqartuaannarluni. Qiimmassimaarpulli. Tassa oqiliallassimaarlutillu nuannaarput.
Tivolip naatsiivianukarnerminniit minutsialuit qaangiutiinnartut, nuannarinnitsiminnit unitsinneqallattaalerput. Taakkunannga assileqatiseriumaneqarput, eqitaarneqarput oqaluunneqarlutillu kalaallisut qallunaatullu.
Arnap ataatsip mobilini amoriarlugu aperai assilisinnaanerini.
- Ilaana, Anda akivoq nukkanilu Ib aamma HP qeqqeqatigalugit.
Lars nuliani ikioriartorlugu saqqummersitsivianukaqqereerami assiliseqataanngilaq.
Makkuallappoq.
Tusarnaartitseqqittut: Canadami
DDR-ikkut aggustip aqqaneq-aappaani tusarnaartitsiseqqipput, tamatumuuna Canadami. Tamatumuunalu imminnut tatiginerullutik aallarput. Nipilersoqataasalerlaartortaammi tassa tusarnaartitseqataasimalerput nipilersoqatigiittullu imminnut ilikkarsimalerlutillu ataqatigiilluarsimalerput. Sulili pissangapput – tamatumuunali taamarsuunngitsoq: nipilersoqatigiittummi misilittagaqarnerulersimalerput, ataqatigiinnerulersimapput sapinngikkitsillu upperalugu.
Tivolimili Erfalasorportalimmi, naasut naamajuminartut akornanni inuillu illartut erinarsoqataasullu saavanni tusarnaartitsinerat puiguikkiussiffiuvoq. Tusarnaartitsineriinnaananimi allanik aamma misigisaqarfiuvoq. Unnukkut ataatsimoorfiuvoq. Tassa DDR-ikkut nipilersornikkut suli ataatsimoortitsillaqillutillu nuannisartitsillaqqeqalutik takutipaat.
