Qilatersortartup Nuka Alice Lundip atuakkiani nutaaq"Inngerta" saqqummersippaa
Nuka Alice Lundip atuakkiaa nutaaq "Inngerta" ullumi tallimanngornermi apriilip 18-ani Sisimiuni kulturip illorsuani Taseralimmi saqqummersinneqassaaq. Atuagaq Bolatta Silis-Høeghip qalipagaanik kusanartunik imaqarpoq. Atuakkap saqqummersinneqarneranut atatillugu Bolatta Silis-Høeghip qalipagai Taseralimmi aamma saqqummersinneqassapput.
Foto: Iperaq
Inngerpalaaq kulturikkut illorsuarmi Taseralimmi ullumi tallimanngornermi apriilip ulluisa 18-anni tusarsaassapput.
Nuka Alice Lundip atuakkiaa nutaaq "Inngerta" ulloq taanna saqqummersinneqassaaq.
Saqqummersitaq nipilersorpalaamik eqqumiitsulianillu imaqartoq arnaannanit sanaajuvoq.
Atuagaq "Inngerta" aqqaneq-marlunnik inngeruteqarpoq. Nuka Alice Lundip allanik suleqateqarluni, soorlu Hivshu aamma Anda Poulsen suleqatigalugit suliaavoq.
Nuka Alice Lundip aamma Sermitsiamut paasissutissiissutigaa nipilersuusiortartoq Line Groth suleqatigalugu inngerutit erinarsoqatigiinnit atorneqarsinnaanngorlugit suliarisimallugit. Tamannalu aatsaat nunatsinni misilinneqarpoq.
- Nuannaarutigaarput inngerutit erinarsoqatigiinnit atorneqarsinnanangorlugit suliaasut saqqummersissinnaanngoratsigit, tamanit atorneqarsinnaanngorlugit, Nuka Alice Lund oqaluttuarpoq.
Aqaat
Inngerutini immikkuullarittut ilagaat Fritza Egedep paniata Aviulap aqaataa. Atuakkami aamma inngerutit isumaat siunertaallu nassuiaatigineqarput, tassani atuartumut paasinarsarneqarlutik.
Bolatta Silis-Høeghimit eqqumiitsuliat
Atuagaq qalipakkani kusanartunik imaqarpoq, taakkualu eqqumiitsuliortumik Bolatta Silis-Høeghimit suliarineqarput. Atuakkamik saqqummersitsinermi qalipakkat ilanngullugit saqqummersinneqassapput.
Erinarsoqatigiit Sikkersut Upernaarsiut aamma Aviula atussavaat.
