Queen P. Issittup Pam Grieria.
Rappertartut dronningiat. Parnaq taaguuterpassuaqarpoq.
Immaqa taalliai
utoqqatsissutissaqanngitsut, toqqaannartut sapiissuseqartullu pissutaallutik.
Queen P. Issittup Pam Grieria.
Rappertartut dronningiat. Parnaq taaguuterpassuaqarpoq.
Immaqa taalliai
utoqqatsissutissaqanngitsut, toqqaannartut sapiissuseqartullu pissutaallutik.
Parnap nipilersukkani aqqutigalugit
tusarnaartuminut sakkortuumik toqqaannartumillu oqaluttarpoq. Kalaallit,
qallunaat inuiaqatigiillu isornartorsiortarlugit.
Parnaq Hammond Iversen Kalaallit
Nunaanni arnani rappertartuni siullersaatut isigineqarpoq.
Ilaatigut R. Katokra peqatigalugu
“Old School Native” aamma “Ningiu Freestyle” saqqummersippai.
Ilulissani inunngorfimmini
peroriartorfimminilu meeraanerminiilli hiphop soqutigilerpaa.
Ilulissani blokkini qaqortuni
betonnginik avatangerneqarluni Lil’Ki Foxy Brownilu ghettoblasterimik
tusarnaarusaajutigalugit Parnaq taalliortalerpoq. Ukiualuit qaangiuppata
nipilersortartut angutitaannaat akornanni arnanut amerlasuunut
aqqutissiuussiumaarluni taamani ilisimanngilaa.
Parnaq Katuami tusarnaartitsinermi kingullermi siorna decembarimi tusarnaartitsigami oqaluttuarisaanermut ilannguppoq. Kalaallimmi arnartaanni siullersaalluni rappertartutut tusarnaartitsivoq.
Foto: Privat
- Betongit akornanni peroriartorneq
ilaannikkut artornarsinnaasarpoq, assersuutigalugu inuiaqatigiinni
ajornartorsiutit pissutigalugit. Hiphop uannut qimaaffissaqqippoq,
nipilersukkat ikeriarlugit qamanngaanniit oqaatigiumasat annissuullugit, Parnaq
Hammond Iversen 30-nik ukiulik AG-mut oqarpoq.
Nipilersornermik soqutiginninneranut
kajumissuseqarneranullu Pilu Lynge pingaaruteqangaatsiarsimavoq.
- Kalaallimik arnamik nammineerluni
guitarertarlunilu erinarsortartumik takuvunga. Takusara sapiingaarmat
nuannaajallallungalu qiiaammerpunga. Nammineq saqqummersitsinissara
piumassuseqarfigilerpara, Parnaq Hammond Iversen oqarpoq.
Nipilersortarnini aqqutigalugu
kalaallit oqaasii attatiinnarniarpai, hiphop-ilu atorlugu oqaatsit kalaallillu
oqaluttuatoqaat tammatsaaliorniarlugit.
- Hiphop ordbogitut atorlugu
oqaatsivut pillugit paasisaqarnerusinnaallunilu ordbogit
quppeqqaanngikkaluarlugit nipilersukkanik tusarnaarnikkut
paasisaqartoqarsinnaalluni. Kalaallisut oqaatsit aamma oqariartaatsit
attatiinnarneqartariaqarmata oqaatsivullu qanoq ititiginerat ingasammat,
oqarpoq.
Sanngiitsunoortuunngilaq
Parnaq Katuami ukiumoortumik
tusarnaartitsinermi siorna decembarimi tusarnaartitsigami oqaluttuarisaanermut
ilannguppoq.
Kalaallini arnani rappertartutut
siullersaalluni tusarnaartitsivoq.
- Sanngiitsunoortuunngilaq,
tusarnaartitsineq pillugu oqarpoq.
Parnaq arnaanini pissutigalugu
sakkortuumik isornartorsiorneqarsimalluni oqaluttuarpoq.
- Angutinit unatarneqarnissannik
sioorasaarneqartarpunga. Arnaagama nakkarsartarpaannga, soorlu oqartarnerattut:
"Arnat rapperneq ajorput“. Arlalinnik illaruaatigineqartarpunga,
aqqusinermi oqaatsitigut aamma nittartakkatigut attaveqaqatigiiffiit aqqutigalugit,
Parnaq oqaluttuarpoq.
Misigisani sakkortusangaarmata
ukiumi tusarnaartitsineq kingulleq sioqqullugu tusarnaartitsinermik
aaqqissuussisut sioorasaarneqartarnini pillugit ilisimatittariaqarsimallugit.
- Aaqqissuisut isumagilluarpaannga.
Toqqissisimanissannik eqqissisimallungalu saqqummersinnaanissannik
isumaginnipput. Misigisimavungami aaqqissuisut oqaluttuutinngikkukkit
piareersimaannaavittariaqarlunga, oqarpoq, nangillunilu:
- Angutit taamatut pineqarneq
ajorput. Arnaalluni allaaneruvoq. Angutit allaanerulluinnartumik
misigisaqartarput uangali sianiutitigut piareersimajuaannartariaqarpunga,
Parnaq oqarpoq.
Qujanartumik ajunngitsumik
qisuariarfigineqartarnera annertuneruvoq.
- Nuanniitsumik qisuariartunut
piffissara asuli atornianngilara. Tusarnaartitsineq nuannerpoq. Nuannisaqaanga
naak scenemi orlugaluarlunga, illarluni oqarpoq.
- Tusarnaartitsineq naammassimmat
maluginiarpara arnat amerlasuut nuannaarsuaartut oqarlutillu kiisami arnamik
rappertoqartoq. Inuit nuanneqaat nuannisarsuaarpungalu, Parnaq oqaluttuarpoq.
Inuit excellence
Parnap nipilersortartutut
siunissarisani oqaluttuarillatsiarpaa. Canadamioq alla, Timothy Kowcharlie
alias YskTuna, maanna suleqatigaa.
- ”Old School Native” saqqummermat,
Kalaallit Nunaanni nipilersortartut oqaluttuarisaaneranni siullerpaamik
hiphop-imik nipilersortartut taamatut suleqatigiipput. Maanna canadamiumik
allamik suleqateqarluni nipilersugaliorpunga, Parnaq oqarpoq.
Aamma kalaallimik arnamik allamik
rappertartoqarpat suleqatigerusuppaa.
- Nassaarnissaq
ilungersunartorujussuuvoq, oqarpoq.
Taamaattumik hip-hop-ip silarsuaannukaartunut
oqariartuuteqarpoq.
- Neriuppunga maannakkut
amerlanerusut sassarumaartut, ingammik arnat. Piffissaq eqquutinngisaannarpoq,
taamaammat maannakkut sassarit aqagumi qanoq pisoqassanersoq naluarput.
Nakkarsarneqarnissalli piareersimaffigiinnassavat. Immineersuit akiligassatimmi
akilernavianngilaat, oqarpoq.
Rappertartuussagaanni, ingammik
arnalluni, tusarnaartunit ajunngitsumik ajortumillu qisuariarfigineqarnissaq
piareersimaffigineqartariaqartoq Parnaq isumaqarpoq.
- Kikkut tamarmik
nuannarinavianngilaatsit, Parnaq oqarpoq.
- Uagut kalaallit maligassiuisutut
immitsinnut isigisariaqarpugut immitsinnut ajortumik piunnaarluta.
Oqartoqarsinnaavoq akornatsinni "inuit excellenceqartugut", Parnaq
oqarpoq.
