Kalaallit Nunaanni suliffeqarfiit annersaat, Royal Greenland, aningaasaqarnikkut annertuumik ajornartorsiorpoq, taamaattumillu Namminersorlutik Oqartussanit aningaasaliiffigineqarnissartik pisariaqartissinnaallugu.
Inuussutissarsiortut kattuffiat Sulisitsisu taama isumaqarpoq.
Namminersorlutik Oqartussat Royal Greenlandimut aningaasaliisinnaanerat periarfissat pingasut ilagigaat GE-mi pisortap Christian Keldsenip kattuffik sinnerlugu eqqaasaasa ilagaat.
Aalisarnermik ingerlatseqatigiiffiup 2024-mut naatsorsuutai pillugit Naalakkersuisut siulittaasuannut Jens-Frederik Nielsenimut allakkamini immikkut ittumi pingasunik quppernilimmi eqqaavaa. Naatsorsuutit pingasunik kisitsisitalimmik amigartoorfiupput.
Allakkat Sermitsiap pissarsiarai, taakkulu Christian Keldsenip maajip aallaqqaataani, nunarsuaq tamakkerlugu sulisartut ulluanni, Naalakkersuisut siulittaasuannut nassiussimavai.
Tamannali Royal Greenlandimit tigulluarneqanngilaq. Ingerlatseqatigiiffik aningaasanik amerlanerusunik pisariaqartitsinngitsoq ingerlatseqatigiiffiup pisortaanera Preben Sunke mailikkut Sermitsiamut erseqqissaavoq.
Royal Greenland siullermeerluni aningaasatigut ajornartorsiunngilaq. Royal Greenland 2009-mi akiliisinnaajunnaarnissani pinngitsoortinniarlugu Namminersorlutik Oqartussanit 500 millionit koruuninik ikiorserneqarnikuuvoq. Tamanna 250 millionit koruuninik taarsigassarsinikkut aamma piginneqataassutinik 250 millionit koruuninik ilassuteqarnikkut pivoq.
Sulisitsisut: - Annertuumik annaasaqaqattaarneq ataavartuusinnaanngilaq
Ukiuni naatsorsuusiorfiusuni kingullerni marlunni, 2023-mi 2024-milu, Namminersorlutik Oqartussat suliffeqarfiutaa pingaarnerpaaq Royal Greenland akileraarutit suli ilanngaatiginagit katillugit 451 millionit koruuninik amigartooruteqarpoq, taakkunannga 2024-mi 196 millionit koruuniullutik.
Suliffeqarfiup nammineq aningaasaatai ukiup ataatsip ingerlanerinnaani 303 millionit koruuninik ikileriartut 2024-p naanerani 1.446 millionit koruuniupput. Suliffeqarfiup Namminersorlutik Oqartussanit pigineqartup nammineq aningaasaatai inuiaqatigiinnit iluaqutissaasartut Sulisitsisut pisortaat oqarpoq.
- Ingerlatseqatigiiffiup Royal Greenlanditut ittup angusat allanngorarnerat aningorsinnaasussaavaat, taamaattumik annertuumik annaasaqaqattaarneq ataavartuusinnaanngilaq.
GE-mi pisortaq Christian Keldsen Naalakkersuisut siulittaasuannut Jens-Frederik Nielsenimut allakkamini ilaatigut allappoq. Allakkat ima qulequtaqarput:
“Royal Greenlandip 2024-mut naatsorsuutai kingulliit ernumassutigalugit allakkiaq”.
Ingerlatseqatigiiffiup aningaasaqarnikkut ajornartorsiornera nunatta karsianut kinguneqarsinnaammat, taamaalillunilu inuiaqatigiinnut akileraartartunullu tuttussanngorluni, Namminersorlutik Oqartussat Royal Greenlandimut aningaasaliissuteqartariaqalersinnaasut Sulisitsisut isumaqarput.
Christian Keldsenilli aningaasatigut qanoq amerlatigisunik ikiueqqaartoqarsinnaanersoq allakkamini eqqaanngilaa.
Keldsen: - Ingerlatseriaaseq eqqortumik ingerlavoq
Apeqqut pillugu Royal Greenlandip Naalakkersuisut saaffiginissaanut aningaasanik ikiorsiissummik qinnuteqaqqinnissaanut Christian Keldsen Sermitsiamut oqarpoq:
- Tassunga atatillugu allakkatsinni takussutissiaraagut. Ingerlatseriaaseq eqqortumik ingerlavoq, kisianni allat suli pisariaqartinneqarput. Rammevilkårit nutarterneqarnissaat ujartorparput, taamaalilluni Royal Greenlandip niuerfimmi pitsaanerpaamik periarfissaqarnissaa niuerfimmi pissutsinut naleqqussarsinnaanissaminut.
Selskabimut aningaasanik ikiorsiissuteqartoqarsinnaanera saniatigut GE naapertorlugu aamma tassaasinnaapput Royal Greenlandip Selvstyremut agguaassisarnera annikillineqarsinnaasoq aammalu suliffissanik sanaartornermillu periarfissat annikillineqarsinnaasut.
Keldsen: - Ingerlatsineq ajunngitsumukaarpoq
Royal Greenlandip Naalakkersuisunut aningaasatigut ikioqqulluni saaffiginneqqittariaqalernissaa Christian Keldsenip annilaanngatigineraa Sermitsiamit apeqqutigineqarmat ima akivoq:
- Taamaattoqarsinnaanera allakkami eqqaavarput. Ingerlatsineq ajunngitsumukaarpoq, sulili suliassaqarpoq. Sinaakkutit misissorneqaqqissasut piumasaraarput, taamaalilluni Royal Greenlandip niuernermi pitsaanerpaamik atugassaqartinneqarluni niuernermi atugassarititaasut iluatsissinnaassammagit.
Sulisitsisut naapertorlugit ingerlatseqatigiiffimmut aningaasaliissutigut tapiisoqarsinnaanerani periarfissap saniatigut Royal Greenlandip iluanaarutiminik Namminersorlutik Oqartussanut akiliutigisartagai annikillisinneqarsinnaapput, taamatumalu suliffiit attaveqaasersuutillu tungaasigut inuiaqatigiinnut tapersiisinnaanerata annikillisinneqarnera malitseqarluni.
250 millionit koruuninik annaasaqarneq
Royal Greenland suliffeqarfiusoq angisooq, inuiaqatigiinni qitiusumik inissisimasoq namminersortunullu unammillertartoq Christian Keldsenip Jens-Frederik Nielsenimut allakkamini nassuiaatigalugu aallartippaa. Tamannalu Sulisitsisut ernumassutigneqarpoq. Sulisitsisut suliffeqarfinni pisortanit pigineqartuni pissutsit ammanerulernissaat ujartorpaat.
Royal Greenland 2024-mi 250 millionit koruuninik amigartooruteqartoq Sulisitsisut nalilerpaat. Isertitalli immikkut ittut ingerlatsinermilu angusat siuariarnerulaarnerat pissutigalugit amigartoorutit 250 millionit koruuninik amigartooruteqarnissaraluaq pinngitsoortinneqartoq. Ukiumoortumik naatsorsuutiniunngitsoq.
- Royal Greenlandip 2024-mut naatsorsuutai atuaraanni 196 millionit koruuninik amigartooruteqarneq Kalaallit Nunaata avataani pisut, pingaartumik Chilemi Norgemilu aningaasaliinerit iluatsinngitsut kingunerisaannik, takuneqarsinnaavoq.
- Naatsorsuutit atuaqqissaarneranni naammattumik nassuiaasoqannginnera takuneqarsinnaavoq, tamannalu nunatsinni suliffeqarfiup unammilligassaanik iluamik saqqummiissoqarani allamut saasaasoqarneratut isigineqarsinnaanera ernumanarsinnaalluni.
- Ataatsimut isigalugu minnerpaamik 250 millionit koruunit sinnerlugit tunngasut nassuiaatigineqarnissaat amigaataasinnaavoq, Christian Keldsen ernumassuteqarluni allappoq.
Politikkikkut oqallisigineqassasoq neriuutigineqartoq
Sulisitsisut Naalakkersuisunut allagaat tigusimallugit uppernarsarsimagaat Sulisitsisut pisortaat oqaarpoq. Sulisitsisut allagaat politikikkut oqallinnermik pilersitsillunilu, Naalakkersuisut inuiaqatigiit iluaqutissaannik suliaq pimoorullugu iliuuseqarfigissagaat Keldsenip neriuutigaa.
- Ernummatigut pimoorunneqarlutik sulinermik kinguneqarsinnaasut isumaqarpunga. Naqissuserusuppara paatsoorneqarsinnaannginnera. Royal Greenland immikkoortortaqarfippassuaqarluarpoq tunisassiaalu tusaamaneqarluarlutik, inuiaqatigiinnili suliassat mikisut immikkualuttut iluaqutaasullu pissutigalugit ingerlanniarneranut ajornakusoortitsisartoq.
- Pisortat suliffeqarfiutaat pineqarpata atugassarititaasut naleqquttuusariaqarput, aamma tamakkiisumik namminersortunut, Christian Keldsen Sermitsiamut oqarpoq.
Royal Greenlandip akissutaa
Pisoq Royal Greenlandimut oqaaseqarfiginissaa saaffiginnissutigaarput:
- Royal Greenlandip aningaasanik tapiiffigineqarnissaminik pisariaqartitsinnginnera erseqqissartariaqarpara. Aqutsisut siulersuisullu pilersaarusiorlutillu periusissiamik naleqqussaapput. Unammilligassallu 2023-mi naatsorsuutini paasineqartut iliuuseqarfiginiarneqarlutik.
- Inuiaqatigiinnut Royal Greenlandimilu sulisunut tunniusimalluinnartunut iluaqutaasumik sinneqartooruteqaqqilernissaq siunertaralugu, Royal Greenlandip ingerlatsinera pilersaarutit malillugit ingerlasoq, suliffeqarfiup iluani nalunaarusiani takusinnaavarput, pisortaaneq Preben Sunke oqarpoq.
Oqaloqatigiinnissaq ammaffigigaat
2024-mut naatsorsuutit aqutsisut missingiutaannik imaqarnerat nassuiaatigaa, tassani ingerlatseqatigiiffiup siulersuisui kukkunersiuisullu sukumiisumik oqaloqatigiissutigineqarsimanerat allassimalluni.
- Naatsorsuutit siulersuisunit akuerineqarput, kukkunersiuisunillu nangaassuteqarfiginerani akuerineqarlutik. Tamanna inuussutissarsiortut kattuffianniit tatigineqartariaqarpoq, taamaanngippat suliffeqarfiit amerlasuut naatsorsuutit suliarineqareersut misissoqqissaartariaqarpaat.
- Royal Greenlandimi oqaloqatigiinnissamut ammajuaannarpugut, suliamilu matumani naatsorsuutinik atuartup kinaassutsiminik isertuussisup Sulisitsisut aqqutigalugit tusagassiuutinut saaffiginagit ingerlatseqatigiiffik toqqaannartumik saaffigisimasuuguniuk pitsaanerusimassagaluarpoq, Preben Sunke oqarpoq.
Royal Greenlandip 2024-mut naatsorsuutai pillugit Sulisitsisut kattuffiat arlalinnik isumaliutissiissummik saaffigineqarpoq.
Saaffiginnissutit pissutigalugit kattuffiup Naalakkersuisut siulittaasuat Jens-Frederik Nielsen allaffigaa, allakkani ernumassutigineqartuni tamanna atuarneqarsinnaavoq.
Sulisitsisunut oqaatilliineq
Sulisitsisut Royal Greenlandimut naatsorsuutit pillugit erseqqissaaqqusillutik saaffiginneqqaaratik Naalakkersuisunut allakkiorsimanerat Preben Sunke ajuusaarutigingaarlugu Sermitsiamut oqarpoq.
- Paasiuminaatsippara sooq kinaassutsitsinnik isertuussisoqartariaqarsimanersoq, allaat naatsorsuutinut akuerisanut tunngatillugu kattuffik tunuliaqutsiullugu apeqqutinik pingaarutilinnik apeqquteqarniartoqarluni.
- Naatsorsuutinik atuartup kinaassutsiminik isertuussisup naatsorsuutit akuersissutigineqarnikut pillugit paasinninnissaa siunertaralugu Sulisitsisut ikiorsinnaasimanngimmasuk ernumanartoqarpoq. Ikiornagulu suliffeqarfimmut Namminersorlutik Oqartussanit pigineqartumut ajoqusiisinnaasumik oqariartuuteqarnera ingerlateqqinnera ernumanartoqarpoq, Preben Sunke oqarpoq.
