Tillinniat katersugaasivimmit Louvremit pinnersaatinik tillittut
Parisimi Louvremi tillinniartoqarsimavoq, tillinniarnermilu ”pinnersaatit nalilerneqarsinnaanngitsut” tillinneqartut, Frankrigimi nunamut namminermut ministeri ilisimatitsivoq.
Politiit sapaammi ullaakkut Frankrigimi katersugaasivissuarmut tillinniartoqarnerata kingorna Louvrep saava assersorpaat.
Assi: Thibault Camus/AP/Ritzau Scanpix
Frankrigip illoqarfiisa pingaarnersaanni Parisimi eqqumiitsulianut
katersugaasivimmi nunarsuarmi tusaamasami Louvremi tillinniartoqarsimavoq.
Taama Frankrigip kultureqarnermut ministeria Rachida
Dati, X-kkut allappoq.
Katersugaasivik ”pissutsit immikkut ittut
peqqutigalugit” sapaatip sinnerani matoqqassasoq, Facebookimut ivertitami
allassimavoq.
Nalunaaqutaq 12.15-p missaani Frankrigimi nunamut
namminermut ministerip Laurent Nuñezip ”pinnersaatit
nalilerneqarsinnaanngitsut” tillinneqarsimanerat uppernarsarpaa.
Taanna taama franskit tusagassiorfiinut France
Interimut, France Infomut Le Mondemullu oqarpoq.
Nuñez naapertorlugu tillinniarneq minutsit arfineq
marluk missaannik sivisussuseqarpoq.
Tillinniat marluk pingasulluunniit pineqartut taanna nutaarsiassaqartitsivik
AFP naapertorlugu oqarsimaneragaavoq. Saqqummersitat marluk inimi Galleri
d'Apollonimiittut tillinniarfigisimavaat.
Frankrigip nunamut namminermut ministereqarfianit
oqaaseqaat malillugu misissuinerit ingerlanneqartut, nutaarsiassaqartitsivik
Reuters allappoq.
Tillinneqartunut allattuiffik sukumiisoq
suliarineqaleruttorpoq.
- Niuerfimmi nalingisa saniatigut tillinneqartut
taakku kulturikkut oqaluttuarisaanikkullu nalilerneqarsinnaanngitsut,
oqaatigineqarpoq.
Franskit nutaarsiassaqartitsiviata AFP-p tusarfiit
aterminnik taaseqqqqusinngitsut oqaloqatigisimavai, taakkulu tillinniat
amerlassusaat ilisimaneqanngitsut pilattuutinik motoorilinnik sakkullit
sapaammi ullaakkut katersugaasivimmut iserput.
