KL

DK

Aalisakkat saarngi sapangaaraliaralugit: Kalaallit ileqqutoqaat uummarteqqinneqarput

Aalisakkat saangiinit sapangaaraliat ullutsinni nutaaliarineqarlutik uteqqipput. Nunatta Katersugaasivianut iseraanni Tunumit kalaallisuut sapangaarartallit takuneqarsinnaapput. Sapangaarartai isigillualeraanni takuneqarsinnaapput aalisakkaneersuusut. 

Ammassaat qiteraliisa saaniiniit sapangaaraliat, kigutaarnat isseraniit qalipaasersukkat.
Dorthea Reimer-Johansen
Journalist
Offentliggjort

Aviâja Egede Lynge ileqqutoqqat malillugit maanna suliaqarpoq.

Aalisakkat qiteraliisa saaniannik sapangaaraliorniaraanni ilitsersuuteqanngilaq, Aviâjali ulluni makkunani nammineq misileraalluni eqqumiitsuliorpoq.

- Siulitta iliuuserisimasaat ileqquilu soqutigisuaannarpakka, taavalu iverutinik nuannarisaqartuullunga. Takorloorsimanngilara nammineq sananissara, kisianni suliaqarusussusera ikikkami, misissuilerpunga misileraalerlungalu, Aviâja Egede Lynge oqaluttuarpoq.

Anersaanut ajortunut illersuutit

Aviâjap misissuinermini Tunuminngaanniit oqaloqateqarnermini paasivaa kusassaataaginnaratik anersaanut ajortunut, nappaatinut inunnullu ajortisaariniartunut illersuutaasut paasivaa.

- Paasivara pinnersaataaginnaratik kalaallit kulturitsinnut attuumassuteqartut.

Aallaqqaataaniit naammassinissaanut

Aviâja Egede Lyngep aalisakkat saaniinik sapangaaraliorneq naqqaniit nammineq ilinniarpaa. Aalisakkat saarulliit, ammassaat eqaluillu misileraaffigai. Taassuma nassuiaatigaa eqaluit suliassaanerusartut, eqaluit nerpii orsoqarnerugamik.

- Maannakkut eqaluit qiteraliisa saanii misileraaffigaakka, suliassaaneroqaalli aalisakkat nerpii orsoqarnerugamik, orsualu piiaruminaalluni.

Misigisaq immikkuullarissoq

Aalisakkat qiteraliisa saaniiniit sapangaaraliorneq pisariusinnaagaluaqisoq Aviâja maanna assigiinngitsunik angissusilinnik sapangaaraateqarpoq, nammineq pilersitaminik. Sapangaaqqanik nuiseqqaarneq misigissusaavoq immikkuullarissoq.

- Nueqqaarlugit misigissuseq pikkunaq, Aviâja Egede Lynge oqaluttuarpoq.

Qanga kalaallit ileqqutoqaat ullutsinni takussaajunnaarsimagaluartoq kisimiilluni pigiinnarnagu misilittagarilikkani inuit attaveqatigiittarfiatigut siammarterpai. Facebookimi videomi takuneqarsinnaavoq Aviâjap aalisakkat saaniinik aallaqqaataaniit naammassinissaata tungaanut suliarigai.

Tassani aalisagaq imermut qalaateriarlugu saanit piiarpai, naggataatigulu sapangaaraliaralugit.

kulturi kultur

ATORFIIT Se alle jobs

Powered by Labrador CMS