Aalisartut aamma Boliviami naasorissaasut sarsuatitami
Silaannaap allanngoriartornera pinngortitap allanngoriartorneranik kinguneqartoq. Ilitsersuisartut marluk inuiaqatimik tamarmik nunarsuup isuini najugaqartuusut assigiissutaannik nassaarniarniarput.
- Kalaallit Nunaanni sinerissap qanittuani piniartut aalisartullut aamma Boliviami qaqqani portusuuni naasorissaasut suna assigiissutigaat, imaluunniit suna assigiinngissutigaat.
Tamakkuupput sarsuatitanik isiginnaagassiornermi ilitsersuisartut inuusuttut marluk, Alvaro Numezip Boliviameersup aamma kalaallip Ujarneq Fleischerip, imminnut apeqqutigisassaat, aggustip ulluisa 31-at aallarnerfigalugu septembarip 13-iata tungaanut pivisut tunngavigalugit, nunap inoqqaavi marluk tamarmik nunarsuup isuani najugallit pillugit sarsuatitaliornissaminni.
Boliviami qaqqani portusuuni naasorissaasut nunaqarfinni amerlasuuni nunap inuviinik najugaqarfiusuni misigaat silaannaap allanngoriartornera nunap panernersuanik kinguneqartoq. Sumiiffinni allani arlalinni nuna ima panertigaat mingutsinneqartigalunilu, eqqillit naasorissaanut inuussutissarsiornissaminnut tunngavissaat tammariartorlutik. Tassa Boliviami misigisaat tamakkuupput.
Kalaallit Nunaanni sinerissami qanittumi aalisarnermi aamma silaannaap allanngoriartornera misinnarpoq.
Immiussat aamma apersuinerit Sisimiuni aalisartut piniartullut peqatigiiffiat qanimut suleqatigalugu ingerlanneqassapput.
Ilisimatussaatit tunngavigalugit silaannaap allanngoriartornerata issittumi piniartunut aamma aalisartunut kingunerisai qaqinneqassapput, Lene Kielsen Holm ICC-meersoq, tamanna pillugu ilanngussippat, Boliviami nunap inoqqaavi pillugit isumasioqatigiinnermi tikeraarnerup ulluani kingullermi, sapaammi 13. septembari Nuummi Ilimmarfimmi ingerlanneqartussami.
Pilersaarutaat sarsuatitaliap minutsinik 15-inik sivisussuseqartussap Københavnimi silaannaap allanngoriartornera pillugu ataatsimeersuarnermi, CKU-p ingerlatsineranut ilaatillugu takutinneqarnissaa, taanna aamma internettimi aaneqarsinnaalissaaq.
Dansk Center for Kulturudveksling, CKU, (Danskit kulturikkut paarlaasseqatigiittarneq pillugu ingerlatsiviat, nuts.) aamma qallunnaat La Pazimi aallartitaqarfiat sarsuatitaliornermut pingaarnertut aningaasaliissuteqartuupput.