KL

DK

Aaqqissuisuuneq innersuussivoq: Bendop suppaliaanik uunnassarit

Benedikte Thorsteinsson arnaavoq taama ukioqaleraanni assigerusunnartoq, ilisimalluguli taamaannaviarani. Immaqali nerisassiaasa ilaannit isumassarsioraanni iluaqutaasaaq.

Jette Andersen
Published

Benedikte Thorsteinsson – imaluunniit Bendo – tusagassiorfimmi nutserisullammaavoq. Maanna aamma igallammak. Tusagassiorfimmilu tusaamasartarput. Septembarimi uinilu Kofoeds Skolemi pisortaq Gujo Thorsteinsson Islandip præsidentiata nersornaasiuttagaanik Falkeordenimik nersornaaserneqarput oktobarimilu Fredensborg Slotimi oqaluffimmi tusarnaartitsisunut qaaqqusaavoq Dronningi qaaqqusisoralugu naalagaaffeqatigiinneq unnersiutigineqarmat.

Aaqqissuisuuneq innersuussivoq:

Allaaserisaq una aviisimit AG-mit tigusaavoq, aaqqissuisuunermit Christian Schultz-Lorentzenimit toqqarneqarluni.

Taamaalillutit nittartakkami atuartartutut aviisimi allaaserisamik, nalinginnaasumik aningaasanik akeqartartumik atuarsinnaallutit. Neriuppugut allaaserisaq aviisit allaanerunerannik aamma tusagassiutini akeqanngitsuni issuakkatut nutaarsiassaannaannginnerannik takutitsiumaartoq. Aviisit pitsaassusaat annertooq itisiliinernit aamma tunuliaqutinik aamma minnerunngitsumik inuit pillugit allaaserilluakkanik pissuteqarput.

Neriuppugut misiliummik pisartagaqalernissannut isumassarsiorfigisinnaagit, taamaalillutik inuiaqatigiit ineriartornerannut malinnaalluarsinnaanerussagavit.

Aviisimut neqeroorummik pissarsigit – 38 39 40 sianerfigiul imaluunniit mail adm@sermitsiaq.gl allaffigalugu

Sapaatit akunnialui matuma siornagut uinilu neqitornaveersaalersimapput. Taamatukanneq. Suli kalaaliminertortarput. Assersuutigalugu ungasinngitsukkut qaaqqusani arferup neqaanik gullaschitortippai juullimullu qangatut nerisannaaminnik nerissallutik. Aqissinik.

- Imaassinnaavoq naatitartornerulissasugut, aammali aqissit pinngortitameersuupput, 69-inik ukiulik Bendo aamma qeerlutuumik sassaalliiniartoq oqarpoq.

Nerisatik allanngortikkaat

Naatitartuumanerulerneranut peqqutaavoq Netfliximi nerisaqarneq pillugu piviusulikkersaarut.

- Allaannginnami uumasut nerisanni inuussutissat pissarsiariniarlugit neqitortartugut. Taava uumasut nerigaangatsigit vitaminit ilaat pissarsiarisarpavut. Assersuutigalugu ivikkanit inuussutissat pissarsiariniarlugit uumasut nerisarpavut, ivigartornata. Taamatut nassuiarmassuk ingerlaannaq upperaara, Bendo illalaarluni oqarpoq.

AG-mut suppaliani nammineq piliaraa, taamaattoq najoqqutassanit assigiinngitsunit isumassarsiorluni nammineq uimilu mamarisaminnut naleqqussarlugu. Aamma Gujo peqqutigalugu nerisatik allanngortis-
simavaat.

- Uiga oqinnerulerusuppoq, taamaattumik nerisassanik assigiinngitsunik misileraavugut, immaqa peqqinnarnerusinnaasumik.

Sapaatit akunnerisa pingasut ingerlaneranni kilomik ataatsimik oqalivoq. Imaanngilaq atorfissaqartikkamiuk.

Suli neqitortarpoq

- Ilaannikkut suli neqitortarpugut. Ajunngilaq. Kisianni nunatta nammineq pissarititaannik soorlu tuttumik, arfermik aalisakkanillu. Ingasattajaannnginnissaq pingaartuuvoq, neqitunngikkaannimi vitamiinit pingaarutillit amigaataagineqalersinnaapput, Bendo oqarpoq, neqilu maqaasinnginnerarlugu. Proteinitugassani eertanit kikærterinit pissarsiarisarpaa.

- Uagutsitut ukioqaraanni proteininik naammattunik pissarsinissaq pingaartuuvoq.

Igaava aalatilaarpara takulaaginnarniarlugu, tupaallaatigeqaaralu suppaliaa taama akoqartigimmat. Taama akoqartigitillugu neqi atorfissaqanngilaq. Tipigeqaarlu.

Bendop nerriviata qaaniittut ilagaat pupiit kantarellit panertut, sulili misilissimanngilai. Qanorpiaq pissanerlugit suli nalornivaa, taamaattumik uninngagallarput.

- Suppa aqaguani mamarseriaannarsimasarpoq, maluginiaqquaa.

Nutaatillunili mamarluartoq oqarusuppunga.

Takanna. Thorsteinssinip nammineq suppapiaa. Maanna misilissinnaalerpat.

Leiff Josefsen

Najoqqutassaq:

  • Peberbrugt ataaseq aggorlugu
  • Forårsløgit qilertat aggukkat
  • Hvidløgit angisuut marluk
  • Chilip jalapenosilluunniit affaa – sorleq mamarinerunerlugu apeqqutaalluni
  • Pupiit champignonit poortat affaa
  • Gulerodit 4-5 aggukkat
  • Sweet potatoe (naatsiisaq tungusunnitsoq) affaq issoqqaarissuaqqanut aggugaq
  • Kartonip affaa tomatit sequtsikkat mamalikkat
  • Naatitanit bouillon ataaseq
  • Imeq 1 literi
  • Katoni ataaseq kikærter
  • Squash ataaseq aggorlugu
  • Olivenolia
  • Karry
  • Qaasilitttut
  • Taratsut alussaatip aappaata affaa (havsalt)
  • Sukkut alussaateeraq ataaseq

Imaaliussaatit:

Olivenoliangaatsiaq igamut kuineqassaaq qasilittulilaarlugu karrulerlugulu. Peberfrugt, forårsløg, hvidløg, chili, champignonillu minutsialunni igami kajortillaakkit. Kingorna imilerneqassaaq tomatillu sequtsikkat – Bendop oreganolik basilikumimillu atortarpaa – kiisalu gulerodit sweet potatoesillu. Aamma bouillon, taratsut sukkumerngillu. Minutsini 15-ini qalarusaassaaq. Squash kikærtillu kuineqassapput, minutsini tallimani kissanneqarlutik.

Piumagaanni crème fraiche timiusiarlu sassaalliinermi ilaatinneqarsinnaapput.

Aviisi AG-p juullimut ukiortaassamullu aviisiliaa uani ataani pissarsiarisinnaavat:

kulturi
Powered by Labrador CMS