Aaqqissuisuuneq innersuussivoq: Kalaallisuunit marlunnit pitsaanerpaat
Katharina S. Qvist GUX-imi ilinniakkaminik naammassilluni tallimanngormat allagartartaariartorami arnat angutillu kalaallisuui akuleriisillugit atorlugit takkuppoq. Suiaassutsimik paasinnittaatsimik nutaaliornissaq siunertaraara, oqarpoq. Toqqaaneq nuanniitsunik nuannersunillu qisuariartitsisimavoq.
Katharina S. Qvist sapaatip akunnerata matuma siorna ataasinngornermi Nuummi GUX-imi misilitsinnermi kingullermi angusigami nasassani sivisuumik utaqqisimasani ativaa.
- Oqiliallannaqaaq. Kiisami iluamik sinissinnaanngorluni eqqissisimaarlunilu, ilinniarnertuunngortoq 20-nik ukiulik oqarpoq.
Tallimanngornermi ilinniakkaminik naammassinnilluni allagartartaartussaavoq nalliuttorsiornermilu atisassani siusissorujussuakkut toqqarsimavai: angutit kalaallisuuisa qaavat, annoraaq qaqortoq, arnallu kalaallisuuini alliit.
Atugassai Katharinap arnaata Facebookiani nalunaarutigineqarmat misileraanermut isummat aveqqapput.
- Atisassat allagartartaannginnermi nalunaarutigineratigut anorersuup ajornersaa atorparput.
Taamaalilluni allaanerusumik takusaqartoqarnissaanik inuit piareersimapput, Katharina oqarpoq, ilisimavaali ajortumik oqaaseqaatit allagartartaarnerup kingorna aamma takkussinnaasut.
- Kalaallisuut Kalaallit Nunaannillu takutitsinerat tulluusimaarutigineqartarpoq, nangilluni oqarpoq erseqqissaassutigalugulu ajuallatsitsiniarluni iliuuseqannginnami. Inuit internetikkut naapittarfianni qisuariaatit takkutinngitsuunngillat. Ataaseq qiterlermik titartagaaqqanik taamaallaat oqaaseqarpoq. Allat isumaqarput quiasaarnerusoq toqqaanerluunniit nikanarsarlugu, amerlasuulli nuannersumik oqaaseqarput. Tamannalu nakussassaasoq, Katharina oqarpoq.
- Inoqarmat paasinnittunik kalaallisuullu allatut suiaassuseqartunik peqataatitsinissamik pisariaqartitsisinnaaneranik takunnittoqarmat qujamasuutigeqaara, kulturimi ineriartortuarpoq allanngujaatsuukkajunnanilu, oqarpoq.
Kalaallisuut issuttuutilaarnissaannik kissaateqarneq tiguinnagaanngilaq oqallitsitsiniaannarlunilu iliuuserineqarani. Ilaqutariinni toqqaanermik tapersersuisunit eqqarsaatigilluarneqarpoq.
- Kalaallisuut taamannak aveqqanerat suiaassutsit marluunerannik paasinninnermiippoq, suiaassutsillu marluinnaanerannik eqqarsariaaseqarneq kitaamiorpalaartorujussuunera oqaatigerusuppara, oqarpoq.
Aniguinerup suiaassutsit killeerutitippai
Suiaassutsit pingasut pillugit ukiut pingajussaanni allaaserisaqarnermini nammineq paasivaa qanga suiaassuutsit killeqannginnerusimasut.
- Taamanili aniguinissaq pillugu taamaappoq. Assersuutigalugu inoqarfimmi angutit arnalluunniit ikippallaarpata, inoorlaaq suiaassutsimut ikinnerussuteqartumut perorsarneqartarpoq, taamaalilluni mersortussanik piniartunilluunniit amigaateqartoqassanani, nassuiaavoq.
- Kitaamiut oqaasii qiviaraanni suiaassutsinut immikkoorutinik oqaaseqanngilaq, toqqaannartumik »angut« imaluunniit »arnaq« oqaatiginngikkaanni taaneqartarlutik »taakku«, oqarpoq.
Katharina S. Qvistip neriuutigaa kalaallisuunik atueriaatsini inuusuttunut allanut siunissami oqinnerulersitsissasoq.
- Neriuppunga allanut anguterpaluttutut arnarpaluttutulluunniit, imaluunniit akuleriinnik suiaassuseqartutut suiaassuseqanngitsutulluunniit misigisunut aqqutissiuissasoq, oqarpoq.
Ullutsinni Kalaallit Nunaanni suiaassutsit sorlaqarfimminnut uternissaat pisariaqarsoriivippaa.
- Kalaallit Nunaanni suiaassutsinik paasinnittaatsimik nutaaliornissaq siunertaraara. Nammineq arnatut arnanoortutut isigaaq. Massakkut.
- Siunissami allanngorsinnaanera ammaffigaara, inuttummi ineriartortuarpugut. Inummik naapitsigaangama ingerlaannaq eqqarsarparpunga taanna/taakku, imannak eqqarsarnanga angut/arnaq. Taamaalillunga tamanut taaguutit atornissaat sungiunnerussavara, Katharina oqarpoq.
Sammisamut misigissuserpassuit
Nunatta Katersugaasiaviani Toqqorsivianilu pisortaq, Frederik Fuuja Larsen, oqaluttuarpoq kalaallisuut Katharina S. Qvistitut sapaatip akunnerata matuma siorna atorneqartarsimanerannik takusaqarsimanani atuagaqarsimananiluunniit.
- Arnat angutillu kalaallisuuisa immikkoortinneqarnerat ataqqineqarpoq, kisianni allassimasunik malittarisassaqanngilaq, erseqissaavoq.
- Ukiuni nutaajunerusuni assuutit, atisat allallu misilerarneqarnerujartuinnarput, taakkunani qanga ileqqut nutaaliallu akuleriisinneqartarlutik. Taamaalisoqaraangat assigiinngisitaartumik imaluunniit illuinnaasiortumik oqallittoqartarpoq, oqarpoq.
Ph.d.-mik suliniummi »Atisat atorlugit nittarsaassineq – Kitaani arnat kalaallisuui assersuutitut«- mi, Kulturimut, Oqaatsinut Oqaluttuarisaanermullu institutimi adjunkti immikkoortortamilu aqutsisoq, Rosannguaq Rossen, allappoq kalaallisuunik allannguiniartoqarpat tamanna ajortumik sunniuteqarsinnaasoq.
- Kitaani arnat kalaallisuui sapanngallu, kalaallinut taamaallaat atuuttunik ileqqutoqqat kulturillu assersuutaasa qanoq isumaqarnerannik ilisimannittunit taamalu inuiannit allanit immikkoortinneqarnissamut atuisunit, kinaassutsimik takutitseqataasut atorlugit Kalaallit Nunaanni atisat pillugit apeqqut sammisaavoq ulloq manna tikillugu suli takkuttartoq. Sammisaq misigissuserpassuaqarfigineqartoq aalajangersimasumillu inerneqarani.
Aviisi AG uani pisiariuk: