Ajoqi: Oqaluffimmi asanninneq malugalugu pilluarnarnerpaasarpoq

Qaqortup oqaluffimmut iserpunga. Inoqanngivippoq. Juullileriarmallu soorlu sapaataanngikkaluartoq iserluni tipaatsunnartoq. Arnaq inuusuttunnguaq kujataani ajoqiusoq naapilerpara.

Taqqama allaffimmiit tikilluaqqusilluni nueratarpoq. Atsa Tittussen Qaqortumi ajoqiuvoq kujataanilu nunaqarfinni illoqarfinniluunniit atorfissaqartinneqaraangami taakkununnga aamma naalagiartitsiartortarpoq.

-Ilagiinni sulileqqaarpunga atuaasutut taartaasinnaasarlunga. Taamani Narsamiippugut. Atuaasutut sulilereerlunga ajoqip aperinikuuaanga naalagiartitsisinnaannginnersunga, nammineq pisinnaannginnami. Ataasiarluni misilikkaminga anivoq, kisianni tassani taamani misigivunga piareersimananga, Atsa Tittussen ajoqitut taartaaqqarnermini taama illalaarluni oqaluttuarpoq.

Atuaasutut sulilernerminiit sivikitsup ingerlanerani ajoqimut taartaassalerpoq. Taamani 24-inik ukioqarpoq. Tassanngaanniillu ajoqitut ilinniarluni aallartilluni. 2019-imilu ajoqinngorpoq.

-Atualeqqaarnerput sakkortoqaaq. Misigissutsit tamaasa aqqusaartussaagatsigit immitsinnut qiviarluta. Taanna pikkunarnikooqaaq, kisianni meeraagallaramali misigissusilerineq soqutigiuaannarnikuugakku taamaammat immaqa sakkortunaarsinerusinnaallunga ajunngitsumik naammassivunga, Atsa Tittussen oqaluttuarpoq.

Minnerpaamik ataaseq pissarsiguni naammappoq

Juullilernerani naalagiartitsinerit amerlanerusarput. Oqaluffimmi kisiat naalagiartitsisoqarnani utoqqaat illuanut, napparsimavimmilu naalagiartitsisoqarsinnaasarpoq qinoqatigiittoqarlunilunniit. Juullimilu naalagiartitsineq Atsa Tittussenimut immikkuullarittuaannarpoq.

- Naalagiartitsinermi nuannernerpaasarpoq asanninneq. Takusinnaallugu tamarmik pigigaat. Juulli meeraallungalu takorloortarpara nuannersorujussuartut. Soorlu naalagiarnermi tussiaqatigiinneq – erinarsorneq nuannareriarakku tussiutit aamma uannut imartoorujussuusarput. Asanninnerlu kikkunnit tamanit pigineqarnera takuneqarsinnaasarnera pilluarnarnerpaajusarpoq, Atsa Tittussen oqarpoq.

Taanna Qaqortumi inunngorpoq, 1995-imilu anaananilu Nanortalimmut nuupput 2000-ip tungaanut.

Atsa Tittussen maanna 30-inik ukioqarpoq, naak inuusukkaluaqaluni malunnarpoq nunamut tunngasoorujussuusoq eqqissisimalluni ilakkuminarlunilu.

Ajoqiiginnarnani palasitut qaffassarnissani takorloorsinnaavaa.

-Ataasiaannarlunga palasitut ilinnialernissannut kaammattorneqanngilanga. Amerlasuunniit kaammattorneqartarpunga ilinniaqqinnissannut. Eqqarsaatigissavaralu. Tassami ajoqitut sulilluni nuannersorujussuuvoq aamma ilaanni palasinngorusunnarsisarpoq. Qaffassarnissaq soqutiginartorujussuuvoq, suullu tamaasa naqqaniit uanga ilinniarusuttarakkit. Ajoqitut misilittagaqalilaariarlunga siunissap takutissavaa susoqassanersoq, Atsa Tittussen naggasiivoq.

Taanna ulluni makkunani naalagiarnissanut piareersarluni ulapileruttorpoq. Juullimi naalagiartitsinerit saniatigut ilisisussaavoq.