Ajornerpaamik pisoqarsinnaaneranut ernumaneq: Ulerujussuarsinnaanera imaluunniit ikuallattoqarsinnaanera ernumanarput
Oqariaaseqarpoq nalerput tassaasoq mannik – qanga pisimasunit manniliarineqarsimasoq. Oqaluttuarisaaneq nunamut aamma inuiaat imminnut paasisimasaqarfiginissaannut pingaaruteqaqaaq. Taamaattumillu qangarsuaaniilli pigisatoqqat paarilluarneqartariaqarput.
Nunatta ilorpiaata kusanartup ilarpassuineersut Nuummi Nuutoqqami Nunatta Katersugaasiviata illuutaanni paarineqarput. Tassani Nunatta oqaluttuarisaaneranut tunngasorpassuit paasissutissiissutigineqartarlutillu paarilluarneqarput. Katersugaatigineqartut Nunatsinnit tamarmeersuupput.
Katersugaatigineqartulli aarlerinartorsiorput.
Aviisi AG taama allappoq.
- Sanaartukkat qisuit pisoqqat kulturikkut oqaluttuarisaanermi pigisanut eqqumiitsulianullu toqqorsivittut atorneqarnerat immikkut isornartuuvoq. Taamaalillunimi aarlerinartuummat toqqortaatigineqartut silap pissusiata allanngorneratigut, ikuallattoqarneratigut aamma illorsuit sissamut qanittumiinnerisigut ulerujussuartillugu sanaartukkat malinnit anguneqarsinnaasarnerisigut ajoquserneqarsinnaammata annaaneqarsinnaallutilluunniit.
Qulaani mianersoqqussutitut taaneqartoq Nunatta Katersugaasiviata illuutaanut immikkoortortassatut pilersaarummi nutaami taaneqarpoq. AG-p pisortaq Daniel Thorleifsen attaveqarfigaa, tamanna qanoq isumaqarfigineraa paaserusullugu:
- Ernumanartoqartippara, uppernarsaalluni oqarpoq.
Aviisimi AG-mi atuarnerusinnaavutit. Aviisi uani pissarsiariuk:
