Anaanaga meeraalluni mikisunnguulluni
Maya Sialuk Jacobsen, soqutiginnilluinnarluni naggueqatigiittut Inuttut kakiuisartoq, eqqumiitsuliamini saqqummersitamini arnami oqaluttuassartaa, tassa kalaaliulluni Danmarkiliartitaasimanera isumassarsiorfigisimavaa.
Maya Sialuk Jacobsenip ukiup ataatsip ingerlanerani eqqarsaatersuutigisimavaa kinguaariit pillugit oqaloqatigiinnermut qanoq tapersiisinnaanini, tamannami Københavnimi Kunsthal Charlottenborgimi saqqummersitsinissap ”Verden er i dig” (Nunarsuaq ilinniippoq) ilagisussaammagu, aviisi AG allappoq.
Arnami assinga, meeraalluni Danmarkimut tikittoq kalaallisoorlunilu atualeqqaartoq aallaavigalugu, Maya Sialuk Jacobsenip arnami nuilarmiui eqqumiitsuliamini pilerseqqissimavai taasimallugulu ”Inumineq”, taannalu saqqummersinneqartussaalluni. Taamaattorli nuilarmiut nalinginnaasutut sapangaaqqanik aappaluttunik, tungujortunik aamma qorsunnik suliaanngillat, sapangaaqqalli tassaallutik qernertut qaqortullu, ataasiakkaanik kuultitallit.
Arnaa Danmarkimut tikissimavoq qallunaamit angummit qitornavissiartaarineqarsimalluni, eqqumiitsuliaalu tassaalluni iigaq arnaata assinginik imalik aamma pappiara nipinneqummik akoorlugu inuusaliaq, sapannganik nuilarmiulik. Assammi illuani tigumiarpaa nerlerup meqqua illuanilu tigumiarlugit uillut qaleruai arlallit.
- Aliatsannartumik mikivoq ajuallajallunilu. Anaanagali aamma inuunini tamaat mikivoq, Maya Sialuk Jacobsen oqaluttuarpoq, taassuma arnani 2013-imi toqukkut annaavaa.
Allaaserisaq tamaat uani AG-mi pisiarisinnaasanni atuaruk: