Ane Hansen oqariartuuteqartoq: Naligiissitaaneq pimoorutissavarput
Ane Hansen (IA) isumaqarpoq, arnat ulluat nunamit maani arnat pitsaanerusumik atugaqartilernissaat pillugu oqaluuserinninnissamut ullutsialaasoq. Borgmesterip pingaartumik arnat ernisussat atugaat ernumanartoqartinnerarpaa.
Kommuni Qeqertarlimmi borgmesterip Ane Hansenip Arnat Ulluat atorluarlugu arnat ernisussat taakkulu ilaqutaasa pitsaanerusumik atugassaqartinneqarnissaat oqariartuutigaa.
- Arnat pisinnaatitaaffii sorsuutigissavavut. Arnat maani nunami toqqissisimallutik ernisalernissaat anguniarlugu, erninermut atatillugu suliaqartartut peqatigalugit politikkikkut suliniutissamik saqqummiussissaagut. Tamanna Kommuni Qeqertalimmit peqataaffigerusupparput, borgmesteri oqarpoq.
Ane Hansenip oqaatigaa nunami eqiterussisoqarsimanerata nassataanik, ullumikkut taamaallaat Ilulissani, Sisimiuni, Tasiilami, Nuummi Qaqortumilu ernisoqarsinnaavoq, maannakkorpiarlu ilaqutariit Namminersorlutik Oqartussat akiligaannik erniartorlutik aallartinneqartunut angalaqataasinnaanngillat.
Meeqqat qimallugit aallartariaqartarneq
Taamatut aaqqissuussisoqarsimanerata kinguneranik, arnaq ernisussaq kisimi aallarsinnaatitaavoq, ilaqutariillu akissaqarluartut kisimik ilaquttatik tamaasa ilangalugit aallarsinnaallutik, borgmesteri oqarpoq.
- Meerartaarneq arnamut ilaqutaasunullu pilluarnartuuvoq, nunamilu maani arnat toqqissisimanartumik avatangiiseqarlutik ernisussaapput. Tamanna arnatut, anaanatut aanaatullu pingaartitaraara.
Ane Hansenip oqaluttuaraa, arnat, aamma inuusuttunnguit erniartorlutik Nuummut kisimiillutik aallartariaqartartut. Allanillu meeraqarunik erninissartik sioqqutingaatsiarlugu taakku qimallugit aallartariaqartartut.
- Pissutsit taamatut ittut akuersaassanngilagut. Kalaallit Nunaanni erniussiortut peqatigiiffiata tamanna isornartorsioreersimavaa, taamatullu isornartorsiuisoqarnera uagut akisussaasutut politikkerusut tusaaanngitsuusaassanngilarput.
Naligiissitaaneq pimoorunneqassasoq
Arnat pisinnaatitaafiisa kiisalu pisinnaatitaaffinnut assigiinngitsunut tunngatillugit suliniutigineqartartut piviusunngortinneqarnissaat piffissanngorpoq, tassa naassaanngitsumik oqaluuseriunnaarlugit, Ane Hansen oqarpoq.
Taassuma oqaatigaa, ukiorpassuarni kisitsisitigut nalunaarusiatigullu takutinneqartarsimasut, inooqatigiinnermut pitsaasumillu inuuneqarnissamut tunngassuteqartut pimoorunneqartariaqartut.
-Suliat naligiissitaanermut tunngassuteqartut politikkikkut pimoorunneqarnerunissaat kissaatigaara. Arnat ulluanni oqallilluarnissassinnik kissaappassi, neriuutigaaralu peqatigiilluta angusaqarluarumaartugut, borgmesteri naggasiivoq.