Aqqit
Angajoqqaajusut suli sukataarput
Inuit Aqqinik Akuersisartut 'Inuuneq' aterineqarnissaa akuerinngilaat. Niviarsiaqqamulli angajoqqaajusut suliaq suli ingerlappaat, Inuit Aqqinik Akuersisartut siulersuisui ataatsimeeqatiginissaat kissaatigaat
- Pisoq ima misigaarput, soorlu Inuit Aqqinik Akuersisartut inuiaqatigiit ineriartornerattut peqataasimanngitsut. Immaqa nutaaliortoqarniarneranut ilaarusunngillat, kisianni inuiaqatigiit oqaasiilu ullut tamaasa ineriartortuarput.
Niviarsiaqqamut 'Inuuneq'-mik ateqartoqaqqusaanngitsumut angajoqqaajusut oqarput. Inuit Aqqinik Akuersisartut 'Inuuneq' aterinissaanut itigartitsinikuupput, pisorlu tusagassiuutini sammineqangaatsiarluni.
- Tupaallaatigaarput inuit taama amerlatigisut panitsinnut Inuunermik atsiiniarnitsinnut soqutiginnissimammata. Inuit assigiinngitsorpassuit atsiiniarnitsinnut isummersornikuupput. Oqallinnerni nassuiartarpagut sooq taama atsiiniarnerluta, Mads Peter Heiselberg oqarpoq.
Sermitsiaq.AG-mi Inuunermik atsiiniarneq pillugu oqallittoqarsimaqisoq maluginiarpaa.
- Inuit ilaasa nassuiarniartarpaat inunniit qaffasinnerulissasoq. Imaattussaanginnerluni oqaaseq 'Inuik' taamatut inissiiniartoqassappat. Ordbogini takusinnaavarput Inuuneq danskisuunngorlugu Liv. Inuuneq allatut isumaqarsimappat ordbogi allanngortariaqassaaq. Uagut 'Inuuneq' danskisuunngorlugu 'Liv'-imut isumaqartipparput, Liv-imimmi ateqartoqartarpoq, Mads Peter Heiselberg nassuiaavoq.
Maluginiarpaa inuit ilaannit oqartoqarsimasoq, Inuuneq/Liv akuerineqassappat taava akerlia Toqu/Død aamma akuerineqartariaqassasoq.
- Nunani assigiinngitsuni Liv-imik ateqartoqartarpoq, akerliali atorneqanngisaannarpoq. Nukappiaqqalli atiat 'Pullaq' sooruna akerlianik ateqartoqanngitsoq? Imaluunniit Anarfik? Taamaattumik Inuunerup akerlianik atsiiniartoqarsinnaanngilaq, Mads Peter Heiselberg aperaaq. Inuit Aqqinik Akuersisartut imminnut akerliusumik oqaaseqartarnerat aamma malugaa:
- Sisamanngornermi februaarip arfineq-aappaanni Inuit Aqqinik Akuersisartut una pillugu oqaaseqaqqinnianngillat naammassereersutut isigimmassuk. Aqaguani oqaaseqarsinnaanngillat una pillugu sulissuteqartoqarnera pissutaalluni. Inuit Aqqinik Akuersisartut ilumut piviusumik tunngavilersorluakkamillu sulinersut apeqquserparput. Ilami arlaatigut equngasoqarpoq.