Aningaasaateqarfik tapiivoq: Kalaallit Danmarkimi innuttaasut 17-it nunatsinnut tikeraassapput

Aningaasaateqarfik Den Grønlandske Fond, ikiuiniarnikkut, ilisimatusarnikkut kulturikkullu Kalaallit Nunaanni Kalaallit Nunaatalu avataani suliniutinik tapiisartoq aammalu Danmarkip nunatsinni sinniisoqarfianit aqunneqartoq, siunertanut assigiinngitsunut 13. oktober agguaassivoq.

Kalaallit Danmarkimut nuussimasut ilarpassui periarfissaqarput nunatsinnut tikeraallattaarnissaminnut, tamarmilli taamatut periarfissaqanngillat. Taamaammat Den Grønlandske Fond aqqutigalugu qinnuteqartoqarsinnaavoq sivitsortumik nunatsinnut tikeraarsimanngikkaanni. Asseq matumani atorneqartoq 2023-mi Grønland i Tivolimeersuuvoq allaaserisamullu attuumassuteqarani.

Leiff Josefsen

Jensine Berthelsen

Published 3 November 2023 - 15:51

Annonse

Den Grønlandske Fond ukiaq manna aningaasanik agguaassinermini kalaallit 17-it Danmarkimi ukiuni arlalinni najugaqartut nunatsinnullu tikeraarnissaminnik pisariaqartitsisunut aningaasaliiffiginnippoq, taamaalillutillu taakku periarfissaqalerlutik tikeraarnissaminnut.

Den Grønlandske Fondimit aningaasaliiffigineqartut:

Danmarkimit nunatsinni illoqarfinnut tikeraarnerit 17-it, illoqarfinnut makkununnga; Qaqortoq, Nuuk, Qasigiannguit aamma Aasiaat
Peqatigiiffiit ingerlataannut tallimanut
Atuakkanut marlunnut
Piorsarsimassutsimut sammisumik ingerlanneqartunut marlunnut
Tusagassiornermik sulianut marlunnut
Ilinniarnermut atatilllugu ingerlanneqartumut ataatsimut

Aamma meeqqat kisermaanik pilersorneqartut ilaqutariissuarneersullu taperneqarput

Suliniutit aningaasaliinikkut tapersersorneqartut assigiinngisitaarput, aningaasaateqarfiullu meeqqat kisermaanit pilersorneqartut imaluunniit ilaqutariissuarnit meerartaqartortuuneersut ataatsimoorlutik angalasinnaanissaannut ilanngullugit tapiiffigivai, ilaatigut meeqqat taakku Tivoli, Zoo Have, Lalandialu Danmarkimi misigisassarsiorfigissavaat.

Tamatuma saniatigut kalaallit peqatigiiffiata Kilitap 30-liinersiornerminut atatillugu aaqqissuussaanut, Aasiaat eqqaani annaassiniarsimasup Ole Schmidtip eqqaassusernissaanut, kalaallit Danmarkimi ataatsimoorlutik peqatigiiffiat Inuit, atuakkiornissamik suliniutinut marlunnut, Hans Anthon Lynge-p atuakkiaa "umiarsuup tikinngilaattaani" filminngortinneqarnissaanut suliniummut, issittumi timersuut/Denne games pillugu piviusulersaarummut, nalorsitsaarutip grønlands quiz'en-ip naqiteqqinneqarnissaanut aammalu Sisimiuni aaqqissuunneqartartumut annertuumut Nordic, Art, Music & Performance Workshop-imut peqataanissamut tapiissutit ilaatigut agguaanneqarput.

Aningaasaateqarfimmi siulersuisuupput Naalagaaffiup sinniisaa Julie Præst Wilche, taanna siulittaasuuvoq, tamatumalu saniatigut siulersuisoqatigai Miki Jensen, IA-p allattoqarfiani pisortaq Jane P. Lantz aammalu Naalakkersuisut siulittaasuata naalakkersuisoqarfiani pisortaq Hans-Peder Barlach Christensen.

Aningaasaateqarfiup suliniutinut assigiinngitsunut ukiaq manna agguaassai aningaasanngorlugit 401.361,00 koruunit agguaanneqarput.

Aningaasaateqarfik ukiumut marloriarluni aningaasaliissuteqartarpoq, qinnuteqarnissamullu killiliussat marluupput, tassalu 1. april aamma 1. oktober.

kulturi nunatsinnit