Anorersuarnera pissutigalugu Cirkus Arena Qeqqanukanngitsoorpoq
Sisimiuni Maniitsumilu innuttaasut ukioq manna Cirkus Arenanngitsuussapput. Cirkusimi inuttaasut Aasianniit Nuummut toqqaannartumik timmisartuullugit sisamanngornermi angallanneqarput, anorersuarnissaa sioqqutitsiarlugu.
Timmisartumik angallanneqartussat ullumi aqagulu anorersuarnissaannit kisimik eqqorneqartuunngillat.
Sisimiuni Maniitsumilu innuttaasut Cirkus Arenamut Julie Berthelsen aamma Bubber aqutsisoralugit takutitsinerannut isiginnaariartussat aamma isiginnaariarsinnaajunnaarput.
Timmisartuussinerni kinguaattoortorpassuit pinngitsoortinniarlugit Air Greenlandip angalasut ilaat siusinaarnerusumik angalatippai. DMI-p aarlerisaarutigaa Maniitsumi, Nuummi aamma Sisimiuni ullumi aqagulu anoraasuarujussuartarnissaa.
Timmisartumik angallanneqartussat angalaffissaata allanngortinneqarnerat isumaqarpoq Cirkus Arenami inuttaasut Aasianniit Nuummut sisamanngornermi toqqaannartumik angallanneqartariaqalersut. Taamaattumik cirkusi Qeqqata Kommuniani tallimanngornermi arfininngornermilu angalassanngillat.
- Ajoraluartumik timmisartoq taamaatiinnarmat Cirkus Arena Sisimiuni unitsiinnarneqarpoq. Ajuusaarutigivarput. Biletsit utertinneqarsinnaapput, Pisiffik Sisimiut Facebookimini nalunaarpoq.
Maniitsumi Pisiffik aamma taamatut nalunaaruteqarpoq.
Nunatsinni isiginnaartitsisaqattaartut
Cirkus Arena nunatsinni ukioq manna 3. - 8. oktober angalavoq. Illoqarfiit Ilulissat, Aasiaat aamma Nuuk tikinneqassapput, pilersaarutaasimagaluarporlu Sisimiut aamma Maniitsoq ilanngullugit tikinneqassasut.
- Takutitsinermi silaannarmi isiginnaartitsisartoq David Hammarberg, angakkuartartut klovnillu Bonbon aamma Martino takuneqarsinnaajumaarput. Meeqqat takutitsinermi peqataatinneqarnissaminnut periarfissaqarumaarput, Cirkus Arena Facebookimini allappoq.
Isiginnaartitsineq kingulleq Nuummi sapaammi 8. oktober pissaaq.