Arctic Circle Trail: Nuannarineqaleriartuinnarpoq
Kangerlussuup Sisimiullu akornanni pisulluni aqqut soqutigineqaleraluttuinnarpoq. Kisitsisit nutaat takutippaat inuit minnerpaamik 760-it nunanit allaneersut Arctic Circle Trail pisussallugu aalajangertaraat.
Inuit nunanit allaneersut, soorlu Nord Amerikamiit, Tysklandimiit, Tuluit Nunaanniit, Czech Republikkimiit, Danmarkimiit, Europamiit nunatsinniillu Kangerlussuarmukanngikkunik Sisimiunukartarput aqqut Kangerlussuup Sisimiullu akornanniittoq, 65 kilomiiterit missaanik isorartutigisoq pisunniarlugu.
Arctic Circle Traili pillugu sulisut Kanocenterimi illuaqqamut pappilissanik apeqqutinik imaqartunik ilisinikuupput, tassani pisuttut apeqqutinik periarfissaqarlutik. Maanna kisitsisit kisinneqalersimalerput.
Nuannarineqaleraluttuinnartoq
Arctic Circle Trailimi manageriusoq Lisa Germany naapertorlugu naatsorsuutigaa inuit ukiumut 1.000-it sinnerlugit ukiumut tassani aqqummi pisuttartut. Apersorneqartuni 83%-ii akisimapput Kangerlussuarmiit pisullutik aallartartut. Kisitsisittaaq aamma takutippaat qaammammi augustimi pisuttartut amerlanerpaajusut.
Issittumi pisuffiusinnaasuni suli kingulliit ilaanniittooq ilanngullugu Lisa Germanyp oqaatigaa. Assersuutigalugu Islandimi inuit pisuffigisartagaat Laugaveguri suli tusaamasaalluartoq. Taamaattumillu Arctic Circle Traili pitsanngorsarneqassasoq oqaatigalugu. Soorlu pisuttut eqqagassaatiminnik angerlaassinissaminnut pikkorinnerulissapput, illuaqqanik eqqiaanermut aamma piumaffigineqarnerulissasut, anartarfinnik silamiittunik pilersitsisoqassaaq kiisalu aqqut kujasinnerusoq illuaqqamik ataatsimik sanaartorfigineqassaaq.
Arctic Circle Trailimi illuaqqat katillugit qulingiluaapput, atornissaanut akeqarani. 165 kilometerisut isorartutigisoq ulluni tallimani aqqaneq marlulluunniit akornanni pisunneqartarpoq.