Arctic Circle Trail: Pisuttartut akiliuteqartalernissaat kissaatigineqartoq

Arctic Circle Trail, tassa Kangerlussuup Sisimiullu akornanni pisulluni aqqut nunanit allaneersunit soqutigineqaleraluttuinnarpoq. Pisuttartut nunaniit allaneersut aqqut 165 kilometerit missaannik isorartutigisoq pisunniarlugu Kangerlussuarmuanngikkuni Sisimiunukartarput. Soqutigineqaleraluttuinnarnera ilutigalugu nunanit allaneersunut pisunniartunut akeqalissasoq Arctic Circle Businessimiit kissaatigineqarpoq.

Akiliisarnissamut qinnuteqaat Kultureqarnermut Naalakkersuisumut januaarip ulluisa 22-anni nassiunneqarpoq.

Pisunneq 700 koruuninik akeqassasoq

Nunanit tamalaaneersoq ataaseq pisunniaruni 700 koruuneqartalernissaa Arctic Circle Businessimit siunnersuutigineqarpoq. Taanna akiliut aserfallatsaaliuinermut akiliutaasassaaq.

- Nunanit allaneersoq pisuttoq ataaseq aserfallatsaaliinermut 700 koruuninik akiliisassasoq siunnersuutigaarput. Agguaqatigiisillugu Kalaallit Nunaanni ulluni qulingiluani pisunnissamut akikippoq. Savalimmiunut sanilliutissallugu akikippoq, tassani inummut ataatsimut pisunneq nalunaaquttap akunnerini marlungajanni 200 koruuneqarmat.

Nunani avannarlerni pisunnermut akiliutit qiviaraanni pisunneq aningaasanik isertitsillutaalluartarpoq. Savalimmiunimi Trælanípa/Bøsdalafossurimi takornarialerisumik angallassisulerluni nalunaaquttap akunnerani ataatsimi minutsinilu 30-ini pisunneq 450 koruuneqarpoq.

Aserfallatsaaliineq ineriartornerlu

Arctic Circle Business naapertorlugu pisunnermut akiliutinit isertitat tamarmik aqqutip aserfallatsaaliornissaanut, tallinissaanut aqqutinillu pilersitsinissamut atorneqarumaarput.

Assersuutigalugu Itinnermi ikaartarfiup UNESCO-mut nunarsuarmioqatigiinnut kingornussassanut allattorsimaffimmi inissisimasup tallineqarnissaanut kuullu sinaanut patajaatsumut nuunneqarnissaanut aningaasat atorneqarsinnaapput. Ikaartarfik siorna ajutoorpoq kuugussaanissaanullu ulorianartorsiorluni. Umiarianik arlalinnik isumannaallisaanermullu atortunik pisinissaq aamma siunertaavoq.

Arctic Circle Businessip aamma pilersaarutigaa inuit namminneq aalajangikkaminnik pisuffigisinnaasaannik aqqutiliornissartik. Assersuutigalugu Kangerlussuarmiit Itillimut aamma Sarfannguaniit kitaanut aqqutiliorneq:

- Akiliutip aamma pisuttut eqqarsalersissinnaavai aqqut sorleq namminermut pisuffigissallugu naleqqunnerussanersoq. Pisuttut ilai akisussaaffimmik tigusinissaminnut misilittagaqanngillat. Arctic Circle Trailimi aasaq ujaasinerit annaassiniaanerillu arfinillit pisimapput.

Ukiut tamaasa nunanit tamalaaneersut qassit pisuttarnerannik kisitsinermi aningaasat aamma atorneqassapput. Tassani paasiniarneqassalluni qanoq qaqugukkullu pisuinnaat aqqutaat atorneqartarnersoq. Arctic Circle Trailimut periarfissiissaaq atuisut qanoq amerlatiginersut nakkutiginissaanut.

Arctic Circle Business qinnuteqaammini tunngavilersuivoq aningaasat Arctic Circle Trailimut immikkut kontomut pilersinneqarsimasumut nakkartinneqartarumaartut.

Atuisut akiliisimanerminnut uppernarsaat e-mailikkut tigussavaat, taannalu pisunnerminni nassartussaavaat. Arctic Circle Business angalaffiunerpaaffiup nalaani ilinniartut sapaatip-akunneranut akunnerni arlalinni Sisimiut eqqaanni pisuttuartunut nakkutilliisorisassavai akiliisimanersut misissorniarlugit.

Naalakkersuisut akuersippata, akeqalersitsinissamut qinnuteqaat decembarip ulluisa 31-ani 2024-imi atuutilissaaq.