Arctic Young Chef: Igasut inuusuttut nunanit avannarlerneersut nerisassiornermik unammilerput
Igasut inuusuttut Islandimeersut, Kalaallit Nunaannit, Savalimmiunit Norgemeersullu Arctic Young Chef-imi siullermeertumik maajip aqqarngani unammissapput.
Arctic Young Chef 2024
Arctic Young Chef nutaaliornermik unammisitsineruvoq, tassani inuusuttut igasut piginnaasatik, nutaalioriaasertik isumassarsisinnaassusertillu nerisassiornermi atueriaatsit atorlugit takutitsissallutik.
Inuusuttut igasut unamminermi semifinalimi peqataasut iganermik sapinngisamik pikkorissusertik takutinniartussaassavaat naliliisartullu tupaallatsinniartussaassallugit.
Bodømi ajugaaniutivinneq
Kalaallit Nunaanni, Islandimi, Savamimmiuni Norgemilu ajugaasut Bodømi ajugaaniutivinnermut peqataasinnaanngussapput, tassani nunartik ilisaritissavaat imminnullu unammillutik Arctic Young Chefinngorniutissapput.
Mikisoq Bendtsen 26-inik ukioqarpoq Narsaminngaanneerlunilu. Taanna unamminermi peqataassaaq. Mikisoq piniartut, aalisartut savaatillillu akornanni peroriartorpoq, tassanngaanniillu nerisassiornermut isumassarsiortarluni.
- Aataqqiikkut aanaqqiikkullu iganerattut igasarpugut, qangatut ilitsoqqussaralugu. Nerisassiat ileqquusut nerisassiatut mamartuunngortinnissaat nuannaraara. Ileqqunik taakkuninnga misissuineq pissanganartorujussuuvoq, naak aataqqima aanaqqiimalu iganerat nuannarigaluaqalugu, Mikisoq Bendtsen Arctic Young Chef Facebookimi quppernerani tuluttut oqaluttuarpoq.
Kalaallit amerlanerusut peqataassasut
Mikisoq Bendtsen unammisitsinermi kisimi peqataassanngilaq. Minik Fisker 30-inik ukioqartoq aamma peqataasussanut ilaavoq.
Taanna Ilulissaneersuuvoq:
- Nuannaarutigeqaara unammisitsinermi Kalaallit Nunaat peqataassammat. Kalaallit igasorpassuit isumassarsiorfigisinnaassavaat.
Ivalu Hansen Zeeb 22-inik ukioqartoq nuummeersoq aamma peqataassaaq. Ulloq unnuarlu angerlarsimaffimmi suligallarami silami sulinerminni iganermik soqutigisaqalersimavoq:
- Kalaallit nerisassaataannut soqutiginninnera meeqqat ulloq unnuarlu angerlarsimaffiani sulillunga soqutigisarilerpara. Nerisassat nammineq piniakkagut igasagullu soqutiginnilersitsipput. Pinngortitaq, uumasut oqaluttuarisaanerpullu uannut pingaaruteqartuaannarput.
Unammineq maajip aqqarngani aallartissaaq.
Arctic Young Chefimut tunngasillugu paasissutissat Facebookimi nittartagaanni takusinnaavatit, tassani aamma Lars Abelsen ilisaritinneqarpoq:
