Arlallit Lyngvild illoqarfimminni saqqummersitseqqugaat
Katersugaasiviit tallimat borgmesterillu ataatsip Jim Lyngvildip saqqummersinniagai akerleriissutaaqisut soqutigalugit takutereerpaat.
Jim Lyngvildip Ilulissat Katersugaasiviani saqqummersitsiniarnera sisamanngornermi ajutoorpoq.
Eqqumiitsuliortormi danskiusoq katersugaasivimmi saqqummersitsiumajunnaarpoq, kommunip Mads Mitchelle katersugaasivimmit soraarsimmagu. Mads Mitchell Jim Lyngvildimut attaveqarsimallunilu saqqummersitsisoqarnissaanik isumassarsisimavoq.
Saqqummersitsisoqassasorli ilimanarsivoq - taamaallaat sumiiffimmi allami.
Jim Lyngvild talliamnngornerup ullaavani Facebookikkut allappoq, katersugaasiviit allat borgmesterilu ataaseq assit saqqummersinneqarnissaannik soqutiginnittut:
- Suleqatigisara Mads soraarsitaasimavoq, pisumilu matumani politikkerit kommunilu ingerlatsinerlussimapput. Sorsuuteqarnerali ingerlatiinnassavara.
Kulturikkut illorsuarmi ataatsimeeqateqassasoq
- Ullumi qulingiluanut (Kalaallit Nunaanni nalunaaqutaq malillugu) illoqarfiup Kulturikkut illorsuani saqqummersitserusuttumi ataatsimeeqateqassaanga, aamma Nuummi borgmesterip - katersugaasiviillu allat tallimat ippassaq attavigivaannga, saqqummersitsinissaq soqutiginerarlukku. Taamaammat saqqummersitsisoqassaaq… qanorli tamanna aaqqissuunneqassanersoq suli nalunarpoq, Jim Lyngvild allappoq.
Saqqummersitsiniarneq assit Jim Lyngvildip assilisimasai pissutigalugit oqallisaasimaqaaq. Assini kalaallit puisit amiinik meqqunillu atortut takuneqarsinnaapput.
Isornartorsiuisut isumaqarput, Jim Lyngvildip kalaallit kulturiat paatsoorlugu kalaallit kukkulluinnartumik takutikkai.