Arnanut nutaaq: Kinaassuseq atisalersortariaatsikkut pinnersartariaatsikkullu
Arnanumi atisalersortariaaseq pillugu aaqqissuisup nutaap HH Suersap Seqininnguaq Poulsen atisalersortariaaseq kinaassuserlu pillugit oqaloqatigissallugu naapippaa.
Seqininnguaq Poulsen 19-inik ukiulik qalipaatigissunik pinnersartarnermigut aamma allanarsinnaasunik atisalersortariaaseqarnermigut ilisarineqarsinnaasarpoq. Taanna Nuummi inunngorpoq peroriartorlunilu Ilinniarnertuutullu naammasseqqammerluni. Ilinniarnertuutut atuarnermi saniatigut eqqumiitsuliornermik isummersornermillu suliaqartuuvoq.
Aktivistiorusunnerit qanga aallartissimava?
- Peroriartorpunga anaanaga inuit pisinnaatitaaffiinik suliaqartuusoq. Piffissap ingerlanerani paasiartulersimavara inuit kulturiminnut suminngaanneernerminnullu atassuteqarpallaarunnaarsimasut. Aktivist-inngorninnut tamanna aallartisaaqataavoq, inuiaqatigiinnullu qanoq uanga aamma nammineerlunga allanngueqataasinnaaninnut. Suna tamarmi aallarteqqaarpiarpoq atuakkap saqqassaanut qalipaasussatut piumaffigineqarama. Taamaasillunga FN-ikkunnut nunap inoqqaajussuseq pisinnaatitaaffiillu pillugit qaaqquneqartalerpunga. Taamanikkulli suna tamarmi siumuinnaq ingerlanikuuvoq.
Pinnersaatimmi? Qanga illit pinnersartalernikuuit?
- Meeraallunga. Pinnersaateeqqanik qalipaatigissaartunik uummataasatut ilusilinnik peqarnikuuvunga, prinsessemoortut. 13-inik ukioqarlunga special effects makeup misileralerpakka, soorlu aak ilumuunngitsoq, ikiusat imaluunniit qileruusat. 15-inillu ukioqarlunga goth-isut pikisalerpunga, piffissallu ingerlanerani qalipaatigissaartunik pinnersartalerlunga, tassalu taakku ullumikkut pinnersaatigisartakkakka.
Misigisimavit kinaassutsit suminngaanneernerillu taninnikkut takutissinnaallugit?
- Periarfissaavoq. Takusinnaavat kakiorneqareertunga. Pinnersarniaraangama kiinnama pisatai malunnartikkusunnerusarpakka. Instagramimi videoliornikuuvunga kiinnatta pisataat aallaavigalugit qanoq pinnersarsinnaanermik, apeqqutaalluni kiinaq qanoq iluseqarnersoq. Taamaattuaannanngilanga, kisianni ilaanni taamaassinnaasarpunga. Periarfissaavoq.
Apersuineq tamakkerlugu Arnanumi nutaami atuarsinnaavat: