Aserorterisoqarnissaa katersugaasiviup ernumagigaa
Ilulissani eqqumiitsuliamik saqqummersitsisoqaqqammerpoq. Facebookikkullu aserorterisoqarnissaanik kaammattuerpalaartoqarmat aserorterisoqarnissaa katersugaasiviup pisortaata ernummatigaa, politiillu qinnuigalugit pinaveersaartitsillutik nakkutiginnissasut.
Ilulissani oqaluffiup eqqaa saneqqukkaanni eqqumiitsuliamik illuliaq saqqummersinneqaqqammersoq arajutsisassaanngilaq.
Illuliaq mikisoq qernertoq napavoq. Tassa taanna amerikamiup, nunarsuaq tamakkerlugu ilisarisimaneqarluartup Ilulissanukarluni eqqumiitsuliatut suliariartugaa.
Ilulissani Eqqumiitsulianik Katersugaasiviup Arctic Culture Lab suleqatigalugu, nunarsuaq tamakkerlugu ilisarisimaneqarluartoq, illussanik titartaasartuullunilu ilusilersuisartuusoq, Virginia San Fratello, Ilulissanukartissallugu iluatsissimavaa, Ilulissani Oqaluffiup ataani eqqumiitsuliornermik suliniummik ingerlataqartinniarlugu.
"Unnungu uppisissuarput"
Eqqumiitsuliap isikkua inissisimaffialu inuit nittartakkakkut attaveqatigiittarfiini oqallisaavoq. Facebookikkullu isummerluni allattarfikkut atuarneqarsinnaallutik aserorterinissamik kaammattuerpalaartut.
Ilaatigut allattoqarpoq "Unnungu uppisissuarput", "Ikuallanniarsiuk nunguuillungu nungullungu" aamma "Ingutserniarsiuk!" Taakku allakkat katersugaasiviuk pisortaanut qisuariartitsipput:
- Eqqumiitsuliap ikkussorneqartup isikkua inissisimaffialu oqallisigineqangaatsiarpoq - tamanna nuannaarutigaarput. Kisianni ajuusaarnarpoq ilai aserorterinissamik kaammattuuteqarmata, ilaatigut peerneqassasoq ikuallanneqassasorlu allanneqarluni.
Politiinut saaffiginnittoq
- Isumaqarpunga tamanna pingaarnerpaamik demokratiimik paasinninnginnermut ersiutaasoq, tusagassiuutit qisuariarfigisinnaasaat, Andreas Hoffmann, Ilulissani Eqqumiitsulianik Katersugaasiviup pisortaa allappoq imalu naggasiillunilu:
- Taamaammat politiit saaffigisimavakka piumaffigalugillu saqqummersitap aserorteriffigineqannginnissaanut pinaveersaartitsillutik nakkutiginninnissasut.
Ilulissani politiit uppernarsarpaat saaffigineqarsimallutik.
House of Snow ippassaq sisamanngornermi saqqummersinneqarpoq, maajillu naanissaata tungaanut takuniarneqasinnaassalluni.