Asimi pisuttuartarfiit pillugit atuagaq nutaaq
Bo Normanderip, “Naturguide Grønland”-imik (Kalaallit Nunaanni asimi pisuffissat nalunaarsorsimaffiat, aaqq.) atuakkiortup, pinngortitamik atuakkiaq, maannalu piviusunngortoq, ukiuni qulingiluani kingullerni allassimavaa.
Bo Normander Nunatta ilaani sumiiffinni assigiinngitsuni pisuttarsimavoq, sulili allarpassuit tikissimanagillu tikikkusuppai. Tasiilaq tikikkusunnerpaasaata ilagaat.
Assi: Nammineq pigisaq
Atuakkami “Turen går til Grønlands smukkeste
vandreruter”-imi (Kalaallit Nunaanni asimi pisuffissat aalianaannerpaat, aaqq.)
asimi aqqutit 30-t sinnerlugit nalunaarsorsimavai, namminerlu 2015-imiit
2024-mut taakkunani pisuttarsimalluni.
- Aqqutit ilaat arlaleriarlunga pisuffigisarpakka. Kisimiillunga,
ilaquttakka ikinngutikkaluunniit ilagalugit pisuttarpunga. Soorunami
aasaaneraniunerusoq pisuttarpunga, aammali Ilulissani Nuummiluunniit
aasaanngikkaluartoq pisuttarlunga, Bo Normander AG-mut oqarpoq, nangipporlu:
- Ilulissani najugaqarnikuuvunga, taamaammallu pisuffissat
sungaartumik tungujortumillu nalunaaqusikkat nuannareqisakka
qatsussinnaanngilakka. Kangerluk iigartartulik Kalaallillu Nunaata kitaani
pinngortitaq sungiusimasarput alianaalluinnarput.
Ilulissalli kisiat pinngilaa, pisuffissammi tamarmik
immikkuullarissumik alianaaquteqarput.
- Kalaallit Nunaata Kujataani Igalikumi pisunneq,
ulluinnarlugu imaluunniit isorartuumik Qaqortumut pisunnermi aqqutaani
pinngortitaq alianaalluinnartoq kiisalu oqaluffikoq Hvalsey
aqqusaarneqartarmata, aamma nuannareqaakka. Qeqertarsuup Tunua aamma
nuannerluinnarpoq. Taaguiinnarsinnaagaluarpunga, angut Kalaallit Nunaata
pinngortitaanik nnuannarinnilluartoq qungujuppoq.
