Assiliisartoq: Kalaallit Nunaanniikkaangama allatorluinnaq malussarniartarpunga
Assiliisartoq uppertuunngitsoq, Henrik Saxgren, atuakkamik "Ultima Thule"-mik suliaqarnermi nalaani anersaanik malussarniartarsimavoq. Politikenimi taama allaatigisaqarpoq.
Assiliisartoq ilisimaneqarluartoq Henrik Saxgren, 2017-imi upernaakkut atuakkamik Ultima Thulemik saqqummersitsivoq. Atuakkamik suliaqarnermi nalaani arlaleriarlutik nunaqarfimmut Savissivimmut tikeraartarsimavoq piniartunullu ilaalluni qimusseqataasarsimalluni. Asimut angalasarnermini imminut allatorluinnaq takusinnaasimalluni, Politikenimi allaatigisaqarpoq.
- Upperisaqartuunngilanga, qanganitsanillu upperisanik sakkortunerusutut isigisanik upperniartuunanga. Tipigissaatinik sianeeqqanillu angerlarsimaffinni peqanngilanga. Kalaallit Nunaanniinninnili misigisaqartarpunga anersaajusorilluinnakkannik. Danmarkimiittarninnut sanilliullugu, allatorluinnaq misigisaqarniartarpunga, allappoq.
Anersaanillu misigisaqarniartarnerit maluginiaruminartuusinnaasarput.
- Taamaallunga illuaqqami ulluni 14-ini kisimiillunga najugaqarpunga, qularinngilluinnarparali allamik illuaqqamiittoqartoq. Ajorinngilluinnarpara. Eqqumiiginanngilaq quilertanaranilu.
- Atuakkamik suliaqarnerma nalaani aamma malussarilluartuunera misigaara ineriartortillugulu.
- Soorlu arlaata takusaqartinniartaraanga.
- Qamutinut soorlu ingiinnassasunga, ingerlanneqarlungalu.
- Angorusutakka ilungersuutinngikkukkit namminneerlutik angujuminartunngorlutik takkukkumaartut.
- Issittumi avannarlermi pinngortitap inuunermi atugassarititaasut inissittarpai.
- Inuuneq tamarmiusoq AAPPIMUT NAAGGAMULLU millisinneqarpoq. Peqataarusuppit, imaluunniit peqataarusunngilatit?
- Inuuneq taamaattoq eqqissilluni eqqarsaqqissaarnertut ingerlanneqarsinnaavoq.
- Pisinnaasarlu taanna – ullumimiiginnarsinnaaneq – inuuninni kingusissukkut aatsaat pisinnaasarilerpara, tamannalu tunissutaavoq qaqutigoortoq. Atuakkamik suliaqarnerma nalaani malugisinnaavara navianartut aqqusaakkakka qaangeraangakkit, ilungersornerujussuullu kingunerani, taava pinngortitaq pitsaalluinnartumik annertunerungaartumillu tunniussaqartartoq. Unammillernartut annertuut qaangeraangakkit – taava pinngortitaq kusanarneqaaffissaminiilertarpoq – assiliivimma saavani. Allaanngilaq silaannarsuup tunngavianik ingerlataqartoq: Tunniussinnaasatit naammatsillugit pissaatit!