Assit oqaluttuarisaanermut pingaarutillit maanna akeqarunnaartut
Nunarsuarmi Nunatsinni kulturimut tunngasunik assilisat amerlanersaat Københavnimi Arktisk Institutimiipput. Maannamut akiliilluni atorneqarsinnaasimapput, maannali tamanit atorneqarsinnaalerput assillu ilisimasanik annertuunik imaqarlutik.
Asserpassuit 250.000-it Arktisk Institutip assinut toqqorsivianiipput. Pisoqaanerpaat 1860-ikkunneersuupput, assilisallu ilaat ullutsinneersuullutik 2018-mit.
Amerlanersaalli 1890-1960-imeersuupput. Assit 180.000-it digitalinngortinneqarsimapput taamaalillutillu www.arktiskebilleder.dk atorlugu aaneqarsinnaallutik, aamma namminerisamik qarasaasiamiit.
Aviisi AG taama allappoq.
Nutaarluinnartut assit tamarmik oqaluttuarisaanermut tunngasut atornerat akeqarunnaarpoq, tamannalu ingerlatsiviup pisortartaavata Anne Mette Randrup Jørgensenip nuannaarutigeqaa:
Ilisimasanik tutsuiginartunik pissarsiniarnerup ilungersunarsinnaanerata nalaani toqqorsiviit najoqqutallu piviusut aatsaat taama pingaartigipput. Taamaattumik suli saqquminerulernissarput pingaartipparput amerlanerillu toqqorsivimmit uagutsinnit atuinissaannik ilinniartillugit. Kulturikkut kingornussat immikkuullarissut tamatta pigaavut, taamaattumik inuit ilisimassavaat maaniittugut, najoqqutassiatsinnillu inuit amerlasuut iluaquteqaqqunaqaat, Anne Mette Randrup Jørgensen oqarpoq.
Arktisk Institut asserpassuaateqarnermi saniatigut aamma allakkianik nunallu assinginik toqqortaqarpoq kiisalu eqqumiitsulianik pigisanillu allanik katersaateqarluni.
Assit immikkuullarissut namminerlu pigisat
Assilisarpassuit Kalaallit Nunaata aamma qallunaat kalaallillu attaveqatigiinnerat oqaluttuaraat, qallunaat isaanniit nalinginnaasumillu qallunaanit sulinerminnut atorfeqarnerminnullu atatillugu Kalaallit Nunaanniittunit assilisaasarlutik, angalanermi imaluunniit Knud Rasmussen allalluunniit Issittumi ilisimasassarsiortut angalaqatigiineranneersut.
Arktisk Institut 1954-imi tunngavilerneqarpoq aallaqqaammullu Issittoq pillugu kiisalu Kalaallit Nunaata, Danmarkip nunallu allat attaveqaqatigiinnerat pillugu toqqorsivittut suliaalluni. 1906-08-imi Danmarkimit ilisimasassarsiornerit, assiliisartullu Jette Bangip assilisarpassui tassunga anngussimasut tassaniipput, ullumikkut tassaasut atuakkanit, saqqumersitsinernit plakatinillu ilisimaneqartut, ilaat immikkuullarilluinnartutut taaneqarsinnaallutik.
Aviisimi AG-mi atuarnerusinnaavutit. Aviisi uani pissarsiariuk:
