Assit: Qaamarngup ullua malunnartinneqartoq
Ataasinngornermi decembarip 13-ani katuullit iluartuutitaat Santa Lucia nalliussineqarpoq. Tamanna ilaatigut Nuummiittumi Atuarfik Hans Lyngemi ingerlanneqarpoq, 4. klassini atuartut qaqortunik atisaqarlutik, ukiuunerani ulloq taartoq atuarfik qaamaneqartilerlugu ingerlaarput.
Atuarfik Hans Lyngemi qaammaqqutit ataasinngornermi ullaakkut qaminngapput, kingornalu 4. klassini atuartut qaqortunik atisaqarluik naneruummillu tigummiarlutik ingerlaalermata atuarfimmi tummeqqat torsuusarsuillu qaamaneqartinneqalerput.
Ulloq iluartuutitap Sankta Luciap nalliussineqartarnera, sumiiffippassuarni erinarsorluni ingerlaarlunilu malunnartinneqartarpoq. Aamma nunami maani atuarfinni.
Luciap oqaluttuassartaa
Oqaluttuaq malillugu, Lucia arnaasimavoq inuusuttuulluni kristumiuusoq, Siciliamiittumi illoqarfimmi Syrakusimi 300-kkunni inuusimasoq. Lucia Romamiut upperisaat upperinagu kristumiuusimavoq, tamannalu taamanikkut ulorianarluinnartuusimalluni.
Romamiummi kristumiut Romap naalagaaffianut akeqqatut isigisimavaat, taamaammallu kristumiuunissaq inerteqqutaasimalluni.
Luciap ulorianartorsiorsinnaanini soqutiginagu unnuakkut piitsut nerisassaannik agguaasiartortarsimavoq. Niaqqumigut nigaleqartarsimavoq naneruutitalinnik, tassa isigisaqarluni assani ikiuunnissaminut atorsinnaajumallugit.
Lucia angummut taamanikkut ileqquusoq malillugu angajoqqaavisa uissaatut toqqarsimasaannut katikkumanngimmat, uissaraluata akiniaalluni Lucia kristumiuuneralugu oqartussanut unnerluutigisimavaa. Kaasarip Diocletiansip kristumiunik malersuinerata nalaani tigusarineqarsimavoqq, kingusinnerusukkullu pillakkatut toqutaasimalluni.
Pissarsiffik: Folkekirken.dk