tusarnaartitsineq
Assit: Rasmus Lyberth Tuukkamiittoq
Nipilersortartoq Rasmus Lyberth Tuukkaq Teaterimi Fjaltringimi tallimanngormat tusarnaartitsivoq
Rasmus Lyberth Danmarkimi Fjaltringimi Tuukkaq Teaterimi tallimanngormat tusarnaartitsivoq.
Tusarnaariat arlaqartut Kalaallit Nunaanni ukiuni arlaqartuni najugaqarsimapput.
- Tuukkaq Teaterimi tusarnaartitseqqilluni nuanneqaaq, soorluluunniit angerlaqqiinnarluni, Rasmus Lyberth tusarnaartitsinermini ilaatigut oqaluttuarpoq.
Tuukkaq 1975-imi pilersinneqarpoq, aappaagu ukiut 40-nngortorsiorluni nalliussineqassalluni. Rasmus Lyberth siulliit ilaanniilluni Tuukkami isiginnaartitsisartutut naammassivoq, 1976-imit 1978-imut atuarami.
Nipilersukkami aallartilinnginnerani atugassani tullinnguuttut nassuiaateqqaartarpai, tassani inuunermini misigisimasani eqqarsaatinilu assigiinngitsut nassuiaateqqaartarlugit.
- Nalunngikkaluarpara erinarsugakka paasinavianngikkissi kisiannili malugisinnaassavasi, tusarnaartiminut ilaatigut oqaluttuarpoq.
- Qallunaatut tuluttullu erinarsortaleraluaruma soqutigineerutissaanga amerlaqimmata taakkuninnga oqaasillit, ilaatigut oqarpoq.
Rasmus Lyberthip tusarnaartitsinermini ilisimaneqanngitsut, ilisimaneqarluartut nutaat qangarnisallu tusarnaartitsissutigai. Naammassimmat isiginnaartunit uneqquneqanngikkaluarluni.
Thulemi tulliani
Rasmus Lyberthip tusarnaartitsilinnginnerani Sermitsiaq.AG-mit apersorneqallatsiarpoq. Tuukkap eqqaani sissami tusarnaartitsilinnginnermi nukissanik aalleqqaarsimalluni oqarpoq.
- Sumiiffiit amerlanngitsut nukissanik aallerfigisinnaasarpakka, tamakkulu manna ilagaat. Kalaallit Nunaanni sumiiffiit ikitsuinnaat nukissanik aallerfigisarpakka, Rasmus Lyberth ilaatigut oqaluttuarpoq.
Rasmus Lyberth juunip aqqaneq aappaanni Pituffimmukassaaq tassanilu tusarnaartitsissalluni. Tassani tusarnaartitsereeruni Qaanaami aamma tusarnaartitsissaaq.
Assit ataani takukkit