Aasiaat
Assit takukkit: Gammeqarfik ukiunik 60-inngortorsiorpoq
Ulloq nalliuttorsiutigineqarluarpoq
Aasianni meeqqat atuarfiat, Gammeqarfik, 1956-imi atoqqaarfissiorneqarpoq.
Ukiut 60-it qaangiuttut oktobarip 31-anni 2016-imi, ulloq nalliuttorsiorpalaartumik katerisimaartitsinermik malunnartinneqarpoq, anitsiarfimmilu pinnguarfimmi erfalasulertoqarpoq erinarsoqatigiittoqarlunilu.
Ullorsiornermut atatillugu aamma lagkagerujussuit 33-it klassinut, angajoqqaanut pilluaqqusiartortunut ilinniartitsisunullu tamanut agguaanneqarput.
Gammeqarfimmi ukiuni 40-ni ilinniartitsisutut, taakkunannga ukiut 18-it atuarfiup pisortaatut, Sara J. Brandt, atuarfiup oqaluttuassartaanik ilisimasaqarluarpoq.
Allannguutit annertuut marluk
Piffissami qaninnerusumi allannguutit annertuut marluk taassuma oqaatigai. Atuarfik tamarmi 1995-imi nutarterneqarnera, aammalu atuarfimmut inatsit 2012-imi allanngorneqarnera.
Atuarfik aamma rekortiliinikuusimavoq. 1960-ikkut naalerneranni Gammeqarfik naalagaaffeqatigiinnermi meeqqat atuarfiini atuartuuteqarnerpaasimavoq. Taamanikkut atuartut 1.100-t sinneqarimapput.
Affaannanngortut
- 1970-ikkut qiteqqunnerani maanga pigama, atuartt 650-it missaanniipput. Klassit atuartitsisarfiit tamarmik ulikkaaqqasut, klassimili atuartut 25-nit amerlanerunngisaannarsimapput. Klassimimi ataatsimi atuartut qanoq amerlatiginissaat inatsisitut killeqartinneqarpoq, Sara J. Brandt oqaluttuarpoq.
Atuaruk: Meeqqat atuarfianni ilinniartitsisut atuartitseriaatsinut nutaanut piareerput
Kalaallit ilinniartitsisut amerlanerusut
- 2005-imi ilinniartitsisut 63-t sulisuupput, taakkunannga kalaallit 36-iullutik, qallunaat qulingiluat, minnerit atuarfianni ilinniartitsisut arfineq-marluk aamma praktikkertut marluk. Ullumikkut ilinniartitsisut 47-uupput, kalaallit 42-t, qallunaat pingasut, minnernilu atuartitsisut marluk. Ullumikkut timelærerinik sulisoqaranilu praktikkertoqanngilaq, Sara J. Brandt oqaluttuarpoq.
Gammeqarfimmi atuartut ullumikkut 391-iupput.
Allaaserisap ataani assit takukkit