Trommedans
Assit takukkit: Kullorsuarmi piginnaanillit saqqummertut
Nunaqarfimmi Kullorsuarmi uaajeerneq annertuumik nuannassutaavoq
Sapaatip-akunnerani kingullermi Kullorsuarmi innuttaasut immikkut ittumik kulturikkut misigisaqarput, tamannalu kaperlanneranut naggasiutaavoq.
Najattaajaraq Joelsen isiginnaartitsisartoq Nuummeersoq uaajeernermi workshoppertitsinerani tamanna pivoq. Tamanna arfininngornermi isiginnaartitsinermik naggaserneqarpoq.
Oqummiartagaq nerineqarsinnaasoq
Sisamanngornermi tallimanngornermilu pingasoriarluni workshoppertitsivoq - meeqqanut marloriarluni, inersimasunullu ataaseriarluni.
- Peqataasut aallaqqaataaniilli uaajeernerup silarsuaanut tiguartipput, Kullorsuarmi sunngiffimmi aqutsisoq, Birgitta Kammann tusagassiuutinut nalunaarummi allappoq.
Atuaruk: Naalagiaqatigiinneq qilaatersornertalik
Qisumineq oqummiartagaq meeqqanut nalinginnaasumit allaanerulaarpoq. Tassami taakku kuuloruujut atorpaat, takutitsinerullu kingorna nerisinnaasimavaat.
Inuusuttut inersimasullu qisuminermik oqummiagassamik namminneq sanasariaqarsimapput.
- Najattaajaraqqap takusani pikkorigigai Birgitta Kamman nangilluni allappoq.
Assit: inngertartut Nuummi katerisimaartut
Takutitsineq iluatsittoq
Unnuk kulturisiorfimmut atatillugu peqataasut ilikkakkatik takutippaat. Inuusuttut aamma inersimasut nammineerlutik qitinnissartik aaqqissuussimavaat. Nunaqarfiup innuttaasui amerlasuut takutitsinermut ornigupput.
- Takutitsinerlu aallartippoq: meeqqat siullermik, isiginnaartut akornanni ingerlaarput - ilaat ittuulaartut - allat inuit allatut illutik imminut tatigisorujussuullutik nuannaartut. Birgitte Kamann oqaluttuarpoq.
Atuaruk: Qilaatersorneq breakdancelu
Meeqqat pereermata inuusuttut inersimasullu takutitsipput.
- Isiginnaartut tamarmik tiguartipput, tassami quilertanarlutik imaluunniit quianarlutik aalammata - ilaat allaannginnamik saaneqaratik ingerlaartut, nangilluni oqaluttuarpoq.
Atuaruk: Qimmussertarnermut kulturimut ulloq pitsaasoq
Kullorsuarmilu uaajeerneq ataasiannarluni pissanngilaq. Inuusuttut inersimasullu naapittarnissaminnik pilersaaruteqarput.
Workshoppertitsineq Nunatta Isiginnaartitsisarfianit, Air Greenlandimit aamma Nunafondenimit taperserneqarpoq.