Assit takukkit: Peronard filmiliortartunut nersornaammik Innersuarmik nersornaaserneqarpoq
Film.GL-ip filmiliornermut tunngatillugu ukioq manna nersornaasiinini Nuummi aaqqissuussinermi ingerlappaa. Filmiliortartoq Emile Hertling Peronard Innersuarmik nersornaaserneqarpoq, ukiunilu arlalinni suliaqartumut ataqqinaammik nersornaat tunniunneqarluni.
Filmiliortartoq Emile Hertling Peronard Film.GL-ip nersornaasiuttangaanik Innersuarmik ukioq manna nersornaaserneqarpoq. Tamanna pivoq sisamanngornermi ualikkut.
Nersornaat filmiliortartunut nunarput pillugu nunanut allanut nittarsaassilluartunut ukiut tamaasa tunniunneqartarpoq.
Emile Hertling Peronard nunarput pillugu, nunatsinnilu ukiuni arlalinni filmiliortareerpoq.
- Emile Hertling Peronardip nunatsinni filmilianik suliaqarnera Polarama Greenlandimi aamma Anorak filmiliarinerani iluatsilluarsimavoq, nunarpullu pillugu nunanut allanut nittarsaassinini tassani iluatsilluarsimavaa, Film.GL-imiit nersornaasiinermi oqaatigineqarpoq.
Filmiliortartup naatsuliaq Oscarinnannissamut innersuunneqarsimasoq Ivalu aamma suleqataaffigisimavaa.
- Filmiliani Twice Colonized aamma Ivalu Emile Hertling Peronardip nunatsinnit oqariartuutit pingaaruteqarluartut siammartereqataaffigai, tamannalu ataqqinaataavoq.
Film.GL-ip nersornaataa Innersuaq qulissaat tunniunneqarpoq.
Ukiorpassuarni suliaqartareersoq ataqqinaammik nersornaaserneqarpoq
Film.GL aalajangerpoq ukioq manna ataqqinaammik nersornaasiisoqassasoq. Ataqqinaammik nersornaat ataasiaannarlugu tunniunneqarsimavoq, tassa Canadamiumut Alanis Obomsawinimut 2018-imi.
Peter Jensen ukioq manna Honorary Innersuaq 2023-mik nersornaaserneqarpoq. Taanna filmiliornermik ukiuni arlalinni suliaqareersimavoq.
Inuk Mediamik piginnittuuvoq ilaatigullu ”Selvstændighedens vej” filmiliarineqarnerani suliaqaqataalluni.
Peter Jensen nulianilu Liv Aurora Jensen Naalakkersuisut kulturikkut nersornaasiuttagaannik inuiattut ullorsiornitsinni ukioq manna aamma nersornaaserneqarput.