Atuakkiortut festivaleqarnissaat soqutigineqarluartoq

Atuakkat nunaqavissuinnaanngitsunut atuagassiaapput, aammali kulturikkut silarsuarmut attaveqaataallutik.

Pikialaartitsinermi atuakkiortut imminnut isumassarsiorfigalutillu nukittorsassapput, tassani oqaatsinik tammatsaaliunermi ineriartortitseqatigiissallutik. Kalaallit Atuakkiortut siulittaasua, Juaaka Lyberth tusagassiuutitigut nalunaarummi oqaluttuarpoq Issittumi aamma Nunani Avannarlerni inuiannguaqartoq ikittunnguanik, tamarmik immikkut oqaasii 50.000-it missaannik atorneqartunik. Taakku oqaatsiminnik tammatsaaliuillutillu atuiinnaratik aamma oqaatsiminnik ineriartortitseqataasuupput:

-  Issittumi aamma Nunani Avannarlerni inuiannguaqarpoq ikittunnguanik, tamarmik immikkut oqaasii 50.000-it missaannik atorneqartunik. Taakkua tassapput Kalaallit, Inuit Nunavik/Nunavut, Canada-miittut; naggueqativut Alaskamiittut, Samit Skandinaviamiittut aamma Savalimmiormiut. Taakkunani atuakkiortut taalliortullu ataatsimoorussaminnik soqutigisaqaqatigiipput, tassalu oqaatsiminnik tammatsaaliuillutillu atuiinnaratik aamma oqaatsiminnik ineriartortitseqataasuungamik, inuiaqatiminillu eqqarsaataannik atuakkianngorlugit taallianngorlugillu saqqummiussisaramik, Juaaka Lyberth oqarpoq nangillunilu:

- Aamma soqutigisaraat atuagaatitta nunarsuarmioqatitsinnut saqqummiussortarnissaat. Atuakkiavut aqqutigalugit inuiaat namminneq oqaluttuarisaanertik, kinaassusertik, kulturertik, siunissamullu takorluukkatik, assigiinngitsorpassuartigut, atuakkiarisarpaat.

Pikialaartitsinerup ilaa Nunatta Atuagaateqarfiani pissaaq ilaalu Hotel Hans Egedep inersuani. Iserneq akeqassanngilaq, aamma meeqqanut inuusuttunut inersimasunullu aaqqissuussineq ilaqarpoq.