Atuarfimmi siulersuisut aalajangiissapput
Naalakkersuisut isumaqarput atuarfimmi siulersuisut, atuarfimmik atuisartut peqatigalugit aalajangissagaat atuarfimmi mamakujuttut sodavandillu inerteqqutigineqassanersut
Illoqarfimmi suliniutit, qitornatta inuulluarnerannik peqqissuunerannillu nukittorsaasut Naalakkersuisut ilalerpaat. Taamatut allappoq ilinniartitaanermut ilisimatusarnermullu naalakkersuisoq Palle Christiansen, Siumut sinnerlugu Inartsisartunut ilaasortamut Kristian Jeremiassenimut akissummini, taassuma ujartormagu meeqqat atuarfianni mamakujuttut sodavandillu nassarneqartut inerteqqutigineqarnissaannut Naalakkersuisut qanoq isumaqarnersut. Kristian Jeremiassenip ilaatigut innersuussutigaa Kommuneqarfik Sermersuup tamatumani politikkia.
- Kommuneqarfik Sermersuup atuartut atuartut pitsaanerusumik nerisaqartarnissaannik anguniagaat, ilaatigut meeqqat atuarfianni mamakujuttunik sodavandinillu inerteqquteqarluni, Naalakkersuisut malinnaaffigaat, Palle Christiansen oqarpoq, oqaatigaluguli taamatut inerteqquteqarnerup atuartut peqqissusaannut sunniuteqarneranut uppernarsaatit assigiinngitsuusut.
Taamaattumik inassutigaa atuarfiup peqqissutsimik siuarsaaniarluni inerteqquteqarneq ilaasoq tapersiillunilu.
Inerteqquneqarnissaq itigartippaa
Naalakkersuisunut ilaasortap meeqqat atuarfianni mamakujuttut sodavandillu inerteqqutigineqarnissat eqqunnianngilaa. Taanna isumaqarpoq atuarfiit siulersuisuisa tamanna suliassarigaat. Kristian Jeremiassenimut akissummini taamatut paasissutissiivoq.
Kristian Jeremiassenip aamma apeqqutigaa mamakujuttut sodavandillu peqqissutsimut ajoqutaanerannik nalinginnaasumik ilisimasat aallaavigalugit meeqqat atuarfianni mamakujuttut sodavandillu inerteqqutigineqarnissaat naalakkersuisut sulissutiginiarneraat.
Tamatumunnga Palle Christiansen akivoq atuarfimmi siulersuisut atuarfimmi malittarisassiortuusut, atuartitsinerup ingerlannerata qulakkeernissaanut iliuusissat pillugit kiisalu atuarnerup nalaani atuartrut atuarfimmit nakkutigineqarnissaannik nalunaarut naapertorlugu.
Taamaattumik Naalakkersuisut isumaqarput meeqqat atuarfianni nerisassanik najooqqagassanillu inerteqquteqarnissamik aalajangiinerit taamaattut atuarfimmi siulersuisut aalajangigassarigaat, atuarfimmik atuisut soqutigisallillu allat, pingaartumik atuartut angajoqqaavilu, qanimut oqaloqatigereerlugit.
- Taamaattumik naalakkersuisut meeqqat atuarfianni nerisassanik najooqqagassanillu nalinginnaasumik inerteqquteqarnissamik eqqussinianngillat, Palle Christiansen oqarpoq.