Avannaa katersugaasivimmit soraarsinneqartumut isumaqatigiissuteqarpoq

Ilulissani eqqumiitsulianik katersugaasivimmiit Mads Mitchell martsimi soraarsinneqarneranut atatillugu Avannaata Kommunia eqqartuussissuserisulerluni soraarnermut atatillugu isumaqatigiissusiorpoq. Taama iliorneq SIK-mit eqqumiigineqarpoq, isumaqatigiissusiornerimmi HR-imit isumagineqartaraluarput.

Kilde: ilulissat kunstmuseum

Kassaaluk Kristensen

tallimann 03. juu 2022 16:45

Annonse

Ilulissani eqqumiitsulianik katersugaasivimmiit soraarsitsinermut suliaq naammassineqarpoq.

SIK-p isornartorsiutai:

Kommuni Mads Mitchellip soraarsinnissaanut tunngatillugu tusarniutimini sisamanik tunngavilersuuteqarpoq, soraarsitsinermili allarluinnarmik tunngavilersuuteqarluni, tassa "Atorfimmi misiliinerup nalaani suleqatigiinnerup ataatsimut nalilersornera" tunngavigalugu ullut tallimat ingerlaneranni 16. marts 2022-mut soraarsitsigami.

Soraarsitsinermut tunngavilersuutigineqartoq imaqanngitsutut taaneqarsinnaavoq, tigusisumullu arlalinnik apeqqutissaqartitsilerluni.

Kommunimi pisortaaneq suliffiup avataaniittumut (Jim Lyngvildimut) sms-ikkut ilisimatitsisimavoq sulisoq pillugu tusarniaaneq naammassisimasoq, kommunillu aalajangersimarpasikkaa Mads Michell sulinermut misiliinerup naammassineqannginnerani soraarsinneqassasoq. Sulisoq pillugu paasissutissat inniminartut suliamut attuumassuteqanngitsumut ilisimatitsissutigineqarput, aammali maluginiartariaqarluni illuatungeriit tusarniarneqarnissaat pimoorunneqarsimarpasinngitsoq.

Kommunip soraarsitsinermut allagaqaatimini Mads Michellip illuatungeriit tusarniarneqarnerannut atatillugu allagaanut kommuni akissuteqaateqarsimanngilaq.

Soraarsinneqartoq Mads Mitchell, Jim Lyngvildip saqqummersitsineranut oqallisaangaatsiartumut suliaqartuusoq, maanna isumaqatigiissuteqarfigineqarpoq qaammammik ataatsimik ajunngitsorsiassatut akissarsiaqartinneqassasoq.

- Isumaqatigiissusiortoqarnera eqqissiallaatigeqaara, misigisimagama eqqunngitsumik pineqarninnut uppernarsaataasoq, Mads Mitchell Sermitsiaq.AG-mut oqarpoq.

- Soorunami nuannaarlungarpunga, aammali aliasullunga. Pisut aliasuutingaakka. Suli paasisinnaanngilara sooq soraarsitaasariaqarsimanerlunga. Ajunngitsorsiassanilli isumaqatigiissuteqarneq nuannaarutigaara, soraarsinneqarninnut unnerluussutinik uannut tuttunik saliisutut isigigakku. Katersugaasivik taama qimattariaqarsimagakku suli aliasuutigaara.

SIK-p suliaq isornartorsiorpaa

Mads Mitchell kattuffini SIK peqatigalugu suliaq ingerlassimavaa. SIK-p eqqumiigilluinnarpaa kommunip suliaq eqqartuussissuserisumik ikiorneqarluni ingerlassimammagu. SIK-p suliami isornartuusinnaasut allaganngorlugit eqqartuussissuserisumut ingerlateqqissimavai, eqqartuussissuserisullu piffissap sivikitsup iluani akissutigisimavaa Mads Mitchell qaammammut ataatsimut akissarsiaata naliganik ajunngitsorsiassaanik isumaqatigiissuteqarfigineqarsinnaasoq.

SIK-p isummernera naapertorlugu Avannaata Kommunia soraarsitsinissap aallartinneranit naammassinissaata tungaanut isornartumik pissusissamisuunngitsumillu iliorsimavoq, taamaattumillu Mads Michellip soraarsinneqarnera tunngavissaqartumik apeqquserneqarsinnaalluni.

- Oqaatigineqarsinnaavoq takusagut tukalluinnarsimasut. SIK-p neriuutigaa suliap uumap kingunerisaanik Avannaata Kommuniata sulisuminut tunngatillugu suleriutsini sukatissagai, aamma soraarsitsinermut tunngasut pillugit, SIK-mi allattoqarfimmi pisortaq, Bjarne Petersen, Sermitsiaq.AG-mut oqarpoq.

Atorfininnerup misilinneqarnerani soraarsitsineq nalinginnaasoq

Atorfinittup atorfinitsitsisullu akornanni atorfininnermut atatillugu misilinneqarnissamik isumaqatigiissuteqartoqarsimatillugu, sulisitsisoq pisinnaaffeqarpoq atorfininnerup atorunnaarsinnissaanut. Suliamili matumani pisut tukalluinnartumik ingerlasimapput, soraarsinneqartorlu taamaasilluni ajunngitsorsiassaqartinneqarsinnaasimalluni. Tamanna kommunip nassuerneranik imaqartoq, SIK isumaqarpoq.

- Ajunngitsorsiassap qaammammik "ataasiinnarmik" naleqarnera maluginiarneqartariaqarpoq soraarsitsineq atorfininnerup misilinneqarnerata iluani pisimammat. SIK-lli isumaqatigiissut tunngavigalugu nalilerpaa Avannaata Kommunia suliami kukkuluttorsimanini nassuerutigigaa.

Suliami immikkoortoq siulleq taamaasilluni naammassineqarpoq. Suliap tullia suli naammassinngitsoq tassaavoq Avannaata Kommuniani pisortaanerup, nipangiussisussaatitaanini qaangerlugu Jim Lyngvildimut sms-ikkut ilisimatitsisimanini pillugu politiinut suliassanngortinneqarnerata naammassineqarnissaa.

kulturi nunatsinnit