Avannaata Qimussersuani ajugaasimasoq Tivoli nalliuttorsiutigineqassaaq
Milan Mathæussen 15-inik ukiulik Ilulissaneersoq 1. august Tivolimi nalliuttorsiutigineqalerpoq. Nalliuttorsiutigineqarnissani eqqissisimasumik tiguaa.
Grønland i Tivolimi Avannaata Qimussersuani ukioq manna ajugaasoq, Iluliarmiu 15-inik ukiulik Milan Mathæussen 1. augustimi nalliuttorsiutigineqassaaq.
Tamanna pissaaq Plænenimi 1. august nal.17.45 Danmarkip nalunaaqutaa malillugu. Milan Mathæussen nalliuttorsiutigineqarnerup nalaani qamutiniissaaq.
Milan Mathæussen Ilulissani najugaqarpoq aalisartutullu inuuniuteqarluni. Nalliuttorsiutigineqarnissani eqqissisimalluni tiguaa.
- Soorunami pissanganarpoq, aammali ajunngilaq. Nalliuttorsiutigineqarnissara imatut persuarsiutiginngilara. Qimmeqarneq inuuniutigereerpara, Milan Mathæussen Sermitsiaq.AG-mut oqarpoq.
Taanna ilaquttanilu Grønland i Tivolip aallartinnissaa sapaatip akunneranik sioqqullugu Københavniliassapput.
Ataataata Kaaleeraq Mathæussenip ernini Avannaata Qimussersuani ukioq manna pissartanngussasoq naatsorsuutigisimanngikkaluarpaa, ajugaammalli tupaallaatigisimanagu.
Qimmit perorfigigai
- Milan Mathæussen qimussernermik qimmilerinermillu soqutigisaqartuujuaannarsimavoq. Sisimiuni apuuffissamut tikikkiartulermat misigissuserpassuit aqqusaarsimavakka. Aammali tupaallaatigisimanagu, siuttuujumaarnissaa takorlooruminarami. Qimmit attaveqarfigilluarnissai pingaaruteqarpoq, tamannalu Milanip pikkoriffigaa, Kaaleeraq Mathæussen oqaluttuarpoq.
Taanna oqaluttuarpoq Milan Mathæussen qimmileriuaannarsimasoq. Meeqqat atuarfianni atuarunnaarnissamik aalajangersimavoq, aalisartutut inuussutissarsiornissani kissaatigigamiuk. Taamaasilluni ukioq kaajallallugu qimmilerisarpoq.
Grønland i Tivoli ingerlanneqalerpat pisussat Facebookimi qupperneranni atuarsinnaavatit.